Almatada ataqliq naxshichi murat nasirof xatirisige béghishlan'ghan musabiqe ötti

Ataqliq naxshichi murat nasirof xatirisige béghishlan'ghan musabiqining ghalipliridin biri almata chaykowskiy namidiki muzika mektipining oqughuchisi méhrat rexmetjanof(otturida) musabiqe méhmanliri bilen. 2016-Yili 13-dékabir, almata.

Ataqliq naxshichi murat nasirof xatirisige béghishlan'ghan musabiqining ghalipliridin biri almata chaykowskiy namidiki muzika mektipining oqughuchisi méhrat rexmetjanof(otturida) ata-anisi bilen. 2016-Yili 13-dékabir, almata.

13-Dékabirda quddus ghojamyarof namidiki dölet akadémiyelik Uyghur muzikiliq komédiye tiyatirida ataqliq naxshichi we kompozitor murat nasirofning xatirisige béghishlan'ghan yash ijrachilar musabiqisi bolup ötti. “Doppalayf. Kom” yashlar tori we Uyghur tiyatirining uyushturushida, “Janan” ayallar fondi we “Ipar” soda shirkitining hamiyliqida, “Perwaz” Uyghur ijrachiliri birleshmisi hem “Tengritagh” téléwiziye qanilining uchur wasitiliri arqiliq qollap-quwwetlishide ötken mezkur musabiqige asasen qazaqistanliq naxshichilar ishtirak qildi. Igilishimizche, mezkur musabiqe peqet qazaqistandila emes, belki memliket sirtidimu keng tonulghan ijrachi-kompozitor polat hézimofning layihisi boyiche teshkillen'gen bolup, bu musabiqe bu yili altinchi qétim ötmekte.

Musabiqe uyushturghuchilirining biri adilem mesimjanning éytishiche, uninggha yigirmige yéqin mahir qatnashqan bolup, ularning barliqi dégüdek naxsha éytish jehettin öz hünerlirini körsetken. Musabiqige méhman süpitide teklip qilin'ghan “Dildar” topi, “Tarim” ansambili, shundaqla dilnaz exmediyéwa, alimjan zulpiqarof we bashqilar öz naxshiliri bilen sen'et kéchilikini téximu janlandurdi. A. Mesimjan musabiqe heqqide toxtilip, mundaq dédi: “Bu musabiqide yash cheklimisi bolmidi. Qatnashquchilarning tolisi mushu almata wilayitidin boldi, andin tashkenttin kelgenlermu boldi. Bu musabiqide, mesilen, molutjan toxtaxunof, ablikim tursunoflar naxsha éytish tereptin küchlük boldi. Bular yéngi naxshichilardur. Shexsen manga yaqqan naxshichi ablikim tursunof boldi”.

A. Mesimjan musabiqe qazilirining qarari boyiche, orunlarning töwendikiche bölün'genlikini körsitip, mundaq dédi: “Üchinchi orunni tashkenttin kelgen ömerjan qasimof, ikkinchi orunni yarkentlik molutjan toxtaxunof, birinchi orunni bolsa bahar yézisiliq adiljan ximétof aldi. Ikki bash mukapat tesis qilindi. Birige maliwayliq rexmetjanof méhrat muyesser boldi we dilnaz exmediyéwaning ming dollar mukapat sommisi chéleklik ablikim tursunofqa buyruldi. Barliq qatnashquchilargha Uyghur tiyatiri namidin pexriy yarliqlar (guwahnamiler) bérildi. Janan fondi namidin tashkenttin kelgen taxmine aliyéwagha pulluq mukapat bérildi”.

Musabiqe qaziliridin biri ataqliq naxshichi nuralim warisof murat nasirofning sabiq sowét ittipaqi jumhuriyetliri da'iriside tonulghan naxshichi we kompozitor bolghanliqini, uning xatirisige béghishlan'ghan köpligen pa'aliyetlerni ötküzüshte uning yéqin sepdishi we dosti polat hézimofning alahide küch chiqirip kéliwatqanliqini otturigha qoyup, mundaq dédi: “Musabiqide yigirme nomur körsitilip, ularning ichidin ikki-üch naxsha m. Nasirof ijadidin boldi. Musabiqige qatnashqanlarning hemmisi nahayiti talantliq yash balilar. Qazaqistanning xizmet körsetken erbabi dilnaz exmediyéwa özining ikki naxshisini teqdim qilip, kélerki musabiqilerde peqet m. Nasirofning naxshiliri orunlansa dégen teklipni qoydi.Musabiqe nahayiti yaxshi ötti. Biz her bir naxshida m. Nasirofni eslep öttuq. Biz uni héch qachan untumaymiz”.

Biz m. Nasirof xatirisige béghishlan'ghan musabiqining ghalibi, almata shehiridiki chaykowskiy namidiki muzika mektipining oqughuchisi méhrat rexmetjanofni ziyaret qilghinimizda u aldi bilen pütkül qazaqistanliqlarni musteqilliq küni bilen qizghin tebriklep, mundaq dédi: “Men özüm sen'et adimi bolghachqa, méning üchün muhim weqelerning biri Uyghur tiyatirining akadémiyelik unwan'gha ige bolushi boldi. Musabiqige qatnishishqa türtke bolghan polat hézimof, nuralim warisof, sabirjan manashéf. Elwette, bu musabiqige qatniship, ataqqa ige bolush emes, asasiy meqsitim xelq naxshilirini ijra qilip, özümning qabiliyitimni sinap körey dégen ümidte boldum. Men bash mukapatni igilep, qabiliyitimni bahalidim, xelq naxshilirigha bolghan hérsmenlerning nurghunluqini kördüm”.

M. Rexmetjanof shundaqla özining sen'etkar bolushigha bolupmu uruq-tughqanlirining qattiq tesir qilghanliqini bildürdi.