Uyghur yashliri murat nasirning qebrisini yoqlidi

Yéqinda qazaqistanning kona paytexti almuta shehiridiki bir top Uyghur yash medeniyet pa'aliyetchiliri we aktipliri meshhur Uyghur naxshichisi we kompozitori murat nasirofning qebrisini ziyaret qildi we uning sen'et hayati, jümlidin Uyghurlarning sen'et ishlirigha qoshqan töhpisini eslidi. Musteqil döletler hemdostluqi sehniliride tonulghan murat nasirof buningdin 7 yil ilgiri moskwada qaza qilghan idi.

Bu heqte qazaqistanda chiqidighan “Uyghur awazi” gézitining xewiride éytilishiche, mezkur pa'aliyet qazaqistan Uyghurlirining milliy medeniyet merkizining qarmiqidiki Uyghur yashliri birlikining teshebbusi bilen uyushturulghan bolup, buninggha qazaqistan jumhuriyetlik Uyghur milliy medeniyet merkizi we bashqa sen'et guruppilirining wekilliri, ataqliq naxshichilar, kompozitorlar we bashqilar qatnashqan.

Murat nasirof 2007-yili moskwada hazirghiche téxi éniq bolmighan sewebler tüpeylidin öz öyining balkonidin chüshüp kétip qaza qilghan bolup, eger hayat bolsa bu yil 45 yashqa kirgen bolatti.

1991-Yili, pütün sowét ittipaqi boyiche yash talantliqlarning naxsha éytish musabiqiside birinchi orunni igilesh bilen sen'et sépige kirgen murat nasirof moskwadiki muzika mektipini püttürgen hemde 1995-2000-yilliri arisida pütün musteqil döletler hemdostluqigha keng tonulghan cholpanlarning birige aylan'ghan idi. 5 Naxsha albomi neshr qilghan kompozitori we naxshichi murat nasir özining eng axirqi Uyghurche naxsha albomini“Qaldim yalghuz” dep atap, uni Uyghur muzika muxlislirigha atighan idi. Tehlilchiler mezkur naxshining muratning öz atisi we Uyghur xelqige béghishlighanliqini perez qilishmaqta.

U, tunji bolup, Uyghur tilida “Gülayim” naxshisini éytip moskwa sehniliride orundighandin kéyin, musteqil döletler hemdostluqidiki ruslar we bashqa xelqler Uyghur naxshiliri bilen tonushushqa bashlighan.

Murat nasirof 1969-yili almuta shehiride tughulghan bolup, uning ata-anisi 1950-yillarda, Uyghur élidin sowét ittipaqining qazaqistan jumhuriyitige köchüp chiqip olturaqlashqan idi.

Uning dadisi merhum isma'il nasirof esli qeshqerdin bolup, 1945-1949-yilliri arisida milliy azadliq inqilabigha qatnashqan milliy armiye jengchisi idi. U, 1950-yillarda bir mezgil général muhemmed imin iminof qomandanliqidiki 5-korpus 13-déwiziye qomandanliq shtabigha tewe sen'et guruppisida ishligendin kéyin, herbiy septin boshighan we uzun ötmey sowét ittipaqigha köchüp ketken idi.

Isma'il nasirof özi naxshichi bolup, murat ösmürlük dewrliridin tartip, dadisining tesirige uchrighan idi. Murat ösmürlük dewridin tartip naxsha -muzika heweskari bolup, 1980-yillarning axirida sowét armiyisi sépide türkmenistanda xizmet qilish jeryanida özining talantini körsetken we herbiy septin boshighandin kéyin, moskwagha bérip, gnésin namidiki muzika mektipige oqushqa kirgen.

Murat bu mektepte kompozitorluq we naxsha kespini ögen'gen we özining sewiyisini téximu ashurup, 1990-yillarda, özining sen'et guruppisini qurup, konsértlarni uyushturghan we bezi kino filimlirige naxsha éytip bergen. Emma, 1990-yillarning axiridin bashlap dangqi chiqqan idi.

2007-Yili, 1-ayning 19-küni murat nasirof tuyuqsiz qaza qilghandin kéyin, uning mezkur tuyuqsiz ölümi bir sir süpitide rusiye we bashqa dölet axbarat wasitiliride bir meydan ghulghula we türlük qiyaslargha seweb bolghan idi. Saqchi terep uni özni öltürüwaldi dégen bolsimu, biraq gumanliq qiyasalar izchil dawamlashqan idi.

Almutadiki Uyghur yashliri murat nasirofni xatirilesh pa'aliyetlirini izchil dawamlashturmaqta. Yéqinda almutida mexsus murat nasirofqa béghishlan'ghan “Leyli -mejnun> namda naxsha-muzika kéchiliki bolup ötti. Almutidiki bir sen'et erbabning éytishiche almuta Uyghur yashliri we jama'iti murat nasirofning namini birer kocha we yaki orun'gha qoyushni ümid qilghan, biraq bu ümidning emelge ashqan-yaki ashmighanliqi namelum.