Қазақистан уйғур әдәбияти еғир җудалиққа учриди

Йеқинда қазақистан уйғур әдәбияти, уйғур җамаәтчилики орни толмас җудалиққа учриди. Талантлиқ, вәтәнпәрвәр шаир савут искәндәроф 76 йешида алмата шәһиридә аләмдин өтти.

Савут искәндәроф 1939-йили уйғур елиниң җағистай йезисида дуняға кәлгән болуп, мәктәпни тамамлиғандин кейин ғулҗадики дарилмуәллиминдә оқуған. 1959-Йили қазақистанға көчүп чиқип, алмата шәһиридә орунлашқан. У, абай намидики педагогика институтиниң тил-әдәбият факултетини пүттүриду. Өзиниң әмгәк паалийитини “коммунизм туғи” йәни һазирқи “уйғур авази” гезитидә, кейинирәк болса мәзкур гезитниң қошумчиси “йеңи һаят”та мухбир вә бөлүм башлиқи лавазимлирида елип барди. Шу чағларда униң дәсләпки шеирлири мәтбуат сәһипилиридә йоруқ көрүшкә башлиған иди. С. Искәндәроф “түгимәс арман”, “тинчлиқ илһамлири”, “ким күчлүк?”, “ғенимәт дәмләр”, “һиҗран”, “дәрди йоқ дәмсән мени”, “кәчүр мени, диярим” намлиқ шеирий топламларниң апторидур.

С. Искәндәроф болупму вәтән мавзусини өз иҗадийитиниң асасий йөнилиши қилип алған иди. Бу мавзуниң һәр қандақ бир шаир үчүн нәқәдәр қиммәт икәнликини тәкитлигән с. Искәндәроф сөһбәтлиримизниң биридә мундақ дегән иди: “вәтән сени дуняға кәлтүргән, вәтән сени сап һаваси билән, шерин, сүзүк сулири билән тәрбийиләп өстүргән әзиз макан....”

Радиомиз зияритини қобул қилған шаирлар аблиз һезимоф вә абдуғопур қутлуқоф с. Искәндәрофниң шаирлиқ маһарити, униң әсәрлириниң бәдиий алаһидиликлири, шаирниң уйғур әдәбиятида тутқан орни һәққидә тохталди.