Qazaqistan Uyghur edebiyati éghir judaliqqa uchridi

Yéqinda qazaqistan Uyghur edebiyati, Uyghur jama'etchiliki orni tolmas judaliqqa uchridi. Talantliq, wetenperwer sha'ir sawut iskenderof 76 yéshida almata shehiride alemdin ötti.

Sawut iskenderof 1939-yili Uyghur élining jaghistay yézisida dunyagha kelgen bolup, mektepni tamamlighandin kéyin ghuljadiki darilmu'elliminde oqughan. 1959-Yili qazaqistan'gha köchüp chiqip, almata shehiride orunlashqan. U, abay namidiki pédagogika institutining til-edebiyat fakultétini püttüridu. Özining emgek pa'aliyitini “Kommunizm tughi” yeni hazirqi “Uyghur awazi” gézitide, kéyinirek bolsa mezkur gézitning qoshumchisi “Yéngi hayat”ta muxbir we bölüm bashliqi lawazimlirida élip bardi. Shu chaghlarda uning deslepki shé'irliri metbu'at sehipiliride yoruq körüshke bashlighan idi. S. Iskenderof “Tügimes arman”, “Tinchliq ilhamliri”, “Kim küchlük?”, “Ghénimet demler”, “Hijran”, “Derdi yoq demsen méni”, “Kechür méni, diyarim” namliq shé'iriy toplamlarning aptoridur.

S. Iskenderof bolupmu weten mawzusini öz ijadiyitining asasiy yönilishi qilip alghan idi. Bu mawzuning her qandaq bir sha'ir üchün neqeder qimmet ikenlikini tekitligen s. Iskenderof söhbetlirimizning biride mundaq dégen idi: “Weten séni dunyagha keltürgen, weten séni sap hawasi bilen, shérin, süzük suliri bilen terbiyilep östürgen eziz makan....”

Radi'omiz ziyaritini qobul qilghan sha'irlar abliz hézimof we abdughopur qutluqof s. Iskenderofning sha'irliq mahariti, uning eserlirining bedi'iy alahidilikliri, sha'irning Uyghur edebiyatida tutqan orni heqqide toxtaldi.