Алмата атақлиқ язғучи турған тохтәмоф намида мусабиқә өткүзүлди

Ихтиярий мухбиримиз ойған
2016.06.22
h-abdrimof-t-toxtimof-ershat-esmetof.jpg Баш мукапат игиси һ. Абдримоф(оңдин иккинчи) әршат әсмәтоф(оңда) вә туғлуқ тохтийоф(солда) қатарлиқлар билән. 2016-Йили 18-июн, алмата.
RFA/Oyghan

18-Июнда алматадики язғучилар өйидә атақлиқ язғучи турған тохтәмоф намидики иҗадкарлар ара мусабиқиниң йәкүни чиқирилди.

Мәзкур мусабиқә җумһурийәтлик “уйғур авази” гезити тәрипидин уюштурулған болуп, мусабиқиниң шәртлири мушу йилниң бешида гезит бетидә елан қилинған иди. Шәрт бойичә униңға һәм һекайә, һәм публистикилиқ мақалә билән қатнишиш мумкин болуп, әсәрләрниң бәдиийлики юқири, бүгүнки күн мавзусини өз ичигә елиши шәрт, дәп тепилған иди. Шундақла униң йәкүнини мәхсус комиссийә қазақистан мәтбуат күни һарписида чиқириш, әң яхши дәп тепилған әсәр муәллиплирини 50 миң тәңгидин ахчилиқ мукапат вә мәхсус пәхрий ярлиқ билән тәқдирләш көздә тутулған.

Қазақистан язғучилар иттипақи йенидики уйғур әдәбияти кеңиши вә “уйғур авази” гезити бирликтә өткүзгән мәзкур йиғинға шаир вә язғучилар, алимлар, журналистлар вә мәрһумниң уруқ-туғқанлири қатнашти. Уни ачқан кеңәш башлиқи әхмәтҗан һашири т. Тохтәмофниң уйғур әдәбиятида тутқан орни һәм униң иҗадийитиниң бәзи алаһидиликлири һәққидә тохтилип, мусабиқини уюштурған гезит коллектипи һәм т. Тохтәмофниң аилисигә миннәтдарлиқини билдүрди.

“уйғур авази” гезити әдәбият вә маарип бөлүминиң башлиқи шәмшидин аюпофниң ейтишичә, мусабиқә елан қилинип, гезит редаксийисигә уйғурлар зич олтурақлашқан алмата вилайитиниң панфилоф, уйғур, әмгәкчиқазақ, талғир наһийилиридин аблимит мәрданофниң “яминимизни заманғила артип қоймайли, қериндашлар”, нурәхмәт әхмәтофниң “бир пурсәт вә бир өмүр”, һасил абдуриһимофниң “нәдисән, мениң балилиқим”, абдухалиқ махмутофниң “кепилсиз келин” вә әкрәм садирофниң “аниниң көз йеши” намлиқ әсәрлири келип чүшкән.

Ш. Аюпоф мусабиқиниң қандақ өткәнлики һәққидә мундақ деди: “биз яшлар тәвринип кетәмдекин дәп, улардин көп үмид күткән идуқ. Сәвәби һазир чоң әвлад билән яш әвладниң арисида бир бошлуқ пәйда болди. Худаға шүкри, чоң язғучилиримиз саламәтликигә қаримай, мушу әдәбиятимиз йоқап кәтмисун, өчүп қалмисун, дәп йезиватиду. Бирақ шуларниң ишини давамлаштуридиған, уларға варислиқ қилидиған варислиқ йипи үзүлүш алдида туриду. Биз әнә шу йип үзүлмисә икән, пилдирлап турған чирағ янса икән дегән мәқсәт билән уюштурған идуқ. Әпсус, униңға яшлар қатнашмиди. Шундақтиму биз һеч кимниң көңлини қалдурмаслиққа тириштуқ. Қазилар һәммимиз қарап чиқтуқ. Иккинчи тәрипи, һәр бир мақалә чиққанда гезитханиларниң пикирлирини инавәткә алдуқ. Нурғун пикирләр кәлди.”

Йиғинға қатнашқучилар т. Тохтәмоф намидики бу мусабиқини өткүзүшниң әһмийити вә униңға иҗадкарларни җәлп қилишниң йоллири, уйғур әдәбияти вә уйғур язғучилири алдида туруватқан мәсилиләр һәққидә өз пикирлирини оттуриға қойди.

Мусабиқә қазилириниң қарари бойичә н. Әхмәтоф, а. Мәрданоф, а. Махмутоф вә ә. Садирофлар мәхсус диплом вә ахчилиқ мукапат билән, уйғур наһийисиниң ават йезиси турғуни һ. Абдуриһимоф баш мукапат билән тәқдирләнди.
Һ. Абдуриһимоф радийомиз зияритини қобул қилип, мәзкур мусабиқиниң иҗадкарлар арисида алаһидә тәвриниш һасил қилғанлиқини билдүрүп, мундақ деди: “турған акиниң балилиқ вақти уруш йиллириға тоғра кәлгән иди. У шу йиллардики еғирчилиқларни көрүп чоң болди. Мениң балилиқ чеғим 60-йилларға тоғра келиду. У йилларда урушниң яриси сақийип кәтмигән иди. Турған ака әсәрлиридә атап кәткән тағлар мәлимиздә бар иди. Урушта қолидин, айиқидин, көзидин айрилған кишиләр мениңму көзүмдин кәтмигән иди. Шу сәвәбтин һекайәмни ‛нәдисән, мениң балилиқим‚ дәп алдим. Адил қазилар һекайәмгә баһа берип, шу мусабиқиниң ғалиби атилип олтуримән. Рәһмәт дәймән һәм әнә шу язған азду-тола әмгиким билән турған акиниң роһини хуш қилалидим, дәп ойлаймән.”

Ш. Аюпоф һ. Абдуриһимофниң мәзкур һекайиси елан қилинип, наһайити көп инкасларниң болғинини тәкитләп, мундақ деди: “әсәр ‛нәдисән, мениң балилиқим‚ дәп атилиду, сәвәби өтмүштики әһваллар бүгүн қандақ болуватиду, бурун биз чоңларни қандақ қәдирлигән болсақ, әдәбиятқа болған иштияқимиз қандақ болған болса, һазир қандақ, нәгә кетип баримиз дегән нәрсиләр билән йезилған. Нурғун пикирләр кәлди. Биз шуларниң һәммисини инавәткә елип, баһалидуқ. Мән мушу бәш мақалиниң муәллиплиригә қазилар намидин миннәтдарлиқимни изһар қилимән.”

“уйғур авази” гезитиниң баш муһәррири ершат әсмәтоф мундақ мусабиқә биринчи мәртәм өтүватқачқа бәзи кәмчиликләрниңму йоқ әмәсликини, йиғинда ейтилған пикир-тәклипләрни һесабқа алған һалда, келәчәктә мусабиқини башқичә шәкилдә вә мәзмунда өтүшниң мумкинликини, болупму яшларни көпрәк җәлп қилишқа тиришидиғанлиқини билдүрди. У буниңға охшаш башқиму мусабиқиләрни уюштуруш һәққидә тохтилип, мундақ деди: “биз бурун бир нәччә адәмгә мураҗиәт қилип бақтуқ. Уларниң арисида ойлинип қалғанларму бар. Бирақ т. Тохтәмофниң оғли туғлуқ бизниң тәшәббусимизни бирдинла қоллап, йеқиндин арилашти. Келәчәктә, мәсилән, долқун ясеноф намидики публисистлар арисида мусабиқә қилғили болиду. Журналистлар арисида тудахун нәзәроф, қасим мәхсүтоф намидики мукапатлар өткән йили тәстиқланди. Уларниң вәдиси орнида болса, бу йили давам қилиду.”

Йиғин қатнашқучилири өз сөзлиридә аләмдин өткән язғучиларни хатириләшниң муһимлиқини, болупму һазир исмини әбәдийләштүрүш мәқситидә әсәрлирини қайта нәшр қилиш, тәвәллутлирини өткүзүш охшаш һәр қандақ паалийәтләрни елип бериватқан т. Тохтәмофниң аилисидәк аилиләрниң интайин аз икәнликини алаһидә тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.