Almatada Uyghur pa'aliyetchi abdulbari muxlisof alemdin ötti

Ixtiyariy muxbirimiz oyghan
2015-11-25
Share

-Noyabir küni almataning dostluq mehelliside ottura asiyadiki Uyghur milliy herikitining aktip ishtirakchiliridin biri bolghan, ataqliq doxtur, yurt mötiwer abdulbari muxlisof 81 yéshida alemdin ötti.

Abdulbari asipqan oghli muxlisof 1934-yili Uyghur élining chöchek wilayitige qarashliq dörbiljin nahiyiside dunyagha kelgen bolup, bashlan'ghuch mektepni, andin chöchektiki ottura mektepni tamamlaydu. U kichikidinla tébabetchilikke qiziqqanliqtin 1950-yili ghuljidiki tébbiy mektepte bilim alidu we bir yildin kéyin béyjing tébbiy uniwérsitétining dawalash fakultétida bilim tehsil qilidu. Sekkiz yil mabeynide u bu kesipni toluq igilep chiqidu. A. Muxlisof 1962-yili qazaqistan'gha köchüp chiqip, ayagöz nahiyilik merkiziy shipaxanida ishleydu, 1969-yili almata shehirige köchüp kélip, sheherlik paxta, qeghez kombinatida, andin almata sheherlik 3-doxturxanida ishleydu. Kéyinki yillarda u yingne bilen dawalash saheside ünümlük emgek qilidu. A. Muxlisof 1991-yili, yeni qazaqistan musteqilliq alghandin kéyin, öz aldigha yingne bilen dawalash shipaxanisi échip, hayatining axirqi künlirigiche shuningda ishleydu.

Radi'omiz ziyaritini qobul qilghan qazaqistandiki péshqedem sha'irlarning biri abdughopur qutluqof a. Muxlisofni eslep, mundaq dédi: “ 23-Noyabir küni druzhbidiki Uyghurlar üchünla emes, pütkül dunyadiki musulman, musapir Uyghurlar üchün chong yoqitish boldi. Meshhur siyasiy pa'aliyetchi yüsüpbek muxlisofning inisi abdulbari muxlisof wapat boldi. Bu yoqitish öz musteqilliqi yolida kürishiwatqan Uyghur xelqi üchün eng chong yoqitish bolup hésablinidu. Buningdin xitay mustemlikichiliri xush bolghan bolushi mumkin, chünki ular közge qadalghan bir mixtin xalas boldi. A. Muxlisof “ Sherqiy türkistan inqilabiy birliki teshkilati” ning bash idé'ologi süpitide akisi yüsüpbek muxlisofqa egiship, Uyghuristan dawasini kötürgen idi. Ular ay-yultuzluq kök bayraq bilen moskwagha xitay elchixanisining aldigha bérip, lopnur poligonini ( yadro bomba sina bazisi) yépish toghriliq namayish ötküzgen idi. U yerdin qaytip kélip, chégra boyigha, yeni qorghasqa bérip, u yerdimu ay-yultuzluq kök bayraqni kötürüp, xitayning Uyghuristanni atom sinaq meydanigha aylandurghinigha qarshi özining naraziliqini bildürdi. Xitaygha qarshi chet'elde méngiwatqan dewa-desturliri abdulbari muxlisof sepning aldida yürgen idi. Biz ene shundaq iradilik, bilimlik, wetenperwer bir buradirimizdin ayrilip qalghinimiz üchün xuddi qanitimiz qayrilip qalghandek chong musibet ichide yashawatimiz.”

A. Muxlisof kéyinki yillarda bolupmu akisi, körneklik tarixchi we yazghuchi yüsüpbek muxlisofning ismini ebediyleshtürüsh yolida tinmay emgek qilip, uning eserlirini qayta neshr qilish ishlirini aktip élip barghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet