Қазақистан уйғурлириниң җумһурийәтлик мәдәнийәт мәркизи йиллиқ һесабат бәрди

Ихтиярий мухбиримиз ойған
2015-12-25
Share
hesawat-yighini-almata.JPG Җумһурийәтлик уйғур мәдәнийәт мәркизиниң һесабат йиғинидин көрүнүш. 2015-Йили 24-декабир, алмата.
RFA/Oyghan

24-Декабирда қазақистан уйғурлири җумһурийәтлик етно-мәдәнийәт мәркизиниң кеңәйтилгән йиллиқ һесабат йиғини ечилди. Йиғинда җумһурийәтлик мәдәнийәт мәркизиниң йиллиқ һесабати көздин кәчүрүлди. Йиғинға қатнашқан уйғурлар мәдәнийәт мәркизиниң хизмәтлирини бундин кейин техиму күчәйтип елип маңидиғанлиқини вә қазақистанниң тәрәққияти үчүн уйғурларниңму ортақ күч чиқиридиғанлиқини билдүрди.

Йиғин алматадики абдулла розибақийеф намидики 153-мәктәп-гимназийәниң мәҗлис залида өткүзүлди. Униңға шәһәр вә наһийилик мәдәнийәт мәркәзлири вәкиллири, йигит башлири һәм юрт актиплири, зиялийлар һәм яшлар қатнашти.

Йиғинниң биринчи қисмида униң қатнашқучилири дөләт рәһбири нурсултан назарбайефниң қазақистан хәлқигә йоллиған "қазақистан йеңи аләмшумул әмәлий шараитта: өсүш, ислаһатлар, тәрәққият" намлиқ мәктупини муһакимә қилди. Җумһурийәтлик мәдәнийәт мәркизиниң рәиси, қазақистан хәлқи ассамблейиси сиясий кеңишиниң әзаси шаһимәрдан нурумоф мәктупниң асасий йөнилишлирини чүшәндүрди. Сөзгә чиққан талғир наһийиси туздибастав йезисидин пешқәдәм устаз абдрим муһәммәтоф, әмгәкчиқазақ наһийиси ават йезисиниң турғуни музәппәр мутәллипоф, талғир наһийилик мәдәнийәт мәркизиниң рәиси иминҗан тохтахуноф, алмата шәһири "султанқорған" җәмийәтлик бирләшмисиниң рәиси низамдун гарайефлар қазақистан президентиниң мәмликәтни йәниму раваҗландуруш, милләтләр ара достлуқни мустәһкәмләш, хәлқ турмушини яхшилаш вә башқиму йөнилишләрдики тәклиплирини қоллайдиғанлиқини билдүрди.

Радиомиз зияритини қобул қилған пешқәдәм устаз абдрим мутәллипоф мундақ деди: "бүгүнки баш қошуштики асасий мәқсәт һәққидә әтраплиқ, қизиқ, пакитлар бизни хушал қилди. Дөлитимиз рәһбириниң йеқинда йоллиған мәктупиниң мәзмуни вә униң мәқсәтлирини, қилиниватқан әмәлий ишлирини, шуниңдәк нурумоф өзиниң бу ишлардики уйғурларға мунасивәтлик паалийәтлирини қизғинлиқ билән сөзләп бәрди. Әмди өз нөвитидә мән талғир наһийисиниң туздибастав мәһәллисидә мушу сәнәләргә мунасивәтлик мәктәп коллектипи билән, юрт-җамаәтчилик актиплири билән, йезилиқ һаким башчилиқ бәзибир йиғинларда қазақистан дөлитиниң йеңи заманиви пән-техникилиқ программисини, йеза-қишлақ, шәһәр тәрәққиятиниң күндин-күнгә өсүп өрләватқанлиқини тәрғиб қилдуқ. Шуниңдәк йезимизда бәзи нәзир-чирағ, той-төкүн, яшлиримиз билән баш қошидиған әһваллар болиду. Шу йәрләрдиму дөлитимизниң елип меңиватқан ишлири вә уларниң тәрәққияти, дуняви өсүшләр вә униң абруйи һәққидә даим сөзләп келиватимиз. Әлвәттә, биз дөлитимизниң тәрәққиятини һәр тәрәплимә қоллап-қуввәтләймиз. Бизму чамимиз кәлгүчә чоң-кичик һәммимиз дөлитимизниң программисини, мәқситини әмәлгә ашурушни һәр даим қоллап-қуввәтләп, болупму дөлитимиз ичидики инақлиқ, милләтләр ара иттипақлиққа күч қошимиз дегән үмидләр бар."

Йиғинниң иккинчи қисмида җумһурийәтлик мәдәнийәт мәркизиниң рәиси шаһимәрдан нурумоф йиллиқ һесабат бәрди. У өз доклатида мәркәз иш-паалийитиниң асасий җәһәттин қазақистан президенти нурсултан назарбайеф мәктуплирида көрситилгән мәмликәтлик иҗтимаий, иқтисадий программилардин, шундақла қазақистанда яшаватқан хәлқләр арисидики достлуқни мустәһкәмләш, җумһурийәттики уйғур аһалисиниң билим вә мәдәнийәт дәриҗисини сапалиқ көтүрүш, яшларни вәтәнпәрвәрлик, мәнивийлик вә әхлақ җәһәттин тәрбийиләш, дөләт тилиниң әмәлий пайдилиниш даирисини кеңәйтиш, уйғур җәмийәтлик тәшкилатлирини бирләштүрүш охшаш принсиплардин түзүлгәнликини тәкитлиди. Бу мәсилә бойичә алмата шәһәрлик кеңәшниң әзаси әхмәтҗан шәрдинофниң ярдәмчиси, мәркәз башқармисиниң әзаси османҗан обулоф, мәркәз йенидики уйғур мәктәплири бирләшмисиниң рәиси шавкәт өмәроф, пешқәдәм зиялийлар баһарәм рәхмитуллайева вә зерип молотофлар, уйғур наһийилик баш йигит бешиниң орунбасари абдукерим сәйдуллайеф өз пикир-тәклиплирини оттуриға қойди.

Зияритимизни қобул қилған алмата вилайити уйғур наһийилик баш йигит бешиниң орунбасари абдукерим сәйдуллайеф мундақ деди: "җумһурийәтлик мәдәнийәт мәркизи вә наһийилик мәдәнийәт мәркәзлириниң иши ениқланди. Шуни һөкүмәт баһалап, назарбайеф тәрипидин бизниң мәдәнийәт мәркизиниң рәиси шаһимәрданға ‹һөрмәт ордени' берилди. Биз буниңдин наһайити пәхирлинимиз. Пүтүн уйғур мәдәнийәт мәркизиниң ишини яхши баһалиғанлиқтин биз буниңға наһайити хушал. Шуниң үчүн биз бирлишип, һәмкарлишип, техиму яхши ишләшкә тиришишимиз керәк. Биз, уйғурларғиму оқушқа, ишләшкә һәммә шараит бар. Шуниң үчүн қазақистанда яшаватқинимизға хушал."

Йиғинниң үчинчи қисмида ш. Нурумоф қазақистанда меһир-шәпқәтни, инсанпәрвәрлик вә җәмийәтлик һәмкарлиқни тәшвиқ қилиштики алаһидә паалийәтлири үчүн қазақистан хәлқи асамблейиси, қазақистан президенти йенидики "җәмийәтлик келишим" җумһурийәтлик мәмликәтлик мәһкимиси, шундақла шәхсән дөләт президенти нурсултан назарбайефниң җумһурийәтлик мәдәнийәт мәркизигә әвәткән ‹тәшәккүрнамиләр' ни оқуп, көпчиликни тәбриклиди. У шундақла қазақистан мустәқиллиқи күни һарписида йәнә, бир топ уйғурларниң мәмликәтниң иҗтимаий, иқтисадий, мәдәний тәрәққиятиға қошқан салмақлиқ төһписи, шундақла хәлқләр достлуқини мустәһкәмләштә, разимәнлик билән турақлиқни сақлашта алаһидә көзгә көрүнгәнлики үчүн дөләт мукапатлириға еришкәнликини хәвәр қилди. Уларниң ичидә "парасәт ордени" билән тәқдирләнгән жүргеноф намидики қазақ миллий сәнәт академийисиниң оқутқучиси, профессор раһилә мәшүрова, "һөрмәт орден" лири билән тәқдирләнгән қуддус ғоҗамяроф намидики җумһурийәтлик дөләт уйғур музикилиқ комедийә тиятириниң артиси гүлбаһар әхмәдийева вә җумһурийәтлик мәдәнийәт мәркизи рәисиниң биринчи орунбасари сәдирдин әһәтоф, әмгәктики җасарити үчүн медал билән тәқдирләнгән яркәнт крахмал-ширнә завутиниң мудири вилям халиқоф вә алмата шәһири түрксиб наһийилик өзини өзи башқуруш комитетиниң рәиси османҗан обулоф"шәпқәт медали" билән тәқдирләнгән. "амир хәйрхаһлиқ фонди" ниң рәиси кәнҗә исайеф, "әмгәк сиңдүргән енергийәчи бәлгиси" билән тәқдирләнгән "батис-транзит җәмийити" әмгәк һәм техника бихәтәрлики хизмитиниң башлиқи дилшат имамниязоф медал билән тәқдирләнгән һәрбий бурчини өтәштә қәһриманларчә қаза болған замир адилофлар бар.

Җумһурийәтлик уйғур мәдәнийәт мәркизиниң иҗраийә мудири зуһруллам қурванбақийеф бүгүнки йиғинниң алаһидилики вә мәркәзниң әмәлгә ашурған асасий ишлирини көрситип, мундақ деди: "бу йиғинға қазақистан хәлқи ассамблейиси ‹җәмийәтлик бирлик' башқармиси мудириниң орунбасари мәхпирова раһиләмниң қатнишиши, шундақла алмата областидики барлиқ районлардин вә шәһәр ичидики зиялийлиримизниң қатнишиши наһайити муһим болди. Буниңдин кейинму бизниң мәдәнийәт мәркизимиз қазақистан хәлқи ассамблейиси вә елимиз президенти көрсәтмилири бойичә ишларни давамлаштуриду, дәп ойлаймиз."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт