Алматада “уйғур қәләмкәшләр журнили” ниң йеңи санлири йоруқ көрди

Ихтиярий мухбиримиз ойған
2014-10-10
Share
uyghur-qazaqistan-qelemkeshler-1.jpg “уйғур қәләмкәшләр журнили” 2014-йиллиқ 5-сани
RFA/Oyghan


Қазақистандики уйғурларниң миллий мәтбуати бәзи иқтисадий қийинчилиқларға қаримай, өз тәрәққиятини йәниму давам қилип кәлмәктә. Кейинки вақитларда алматада нәшр қилиниватқан гезит вә журналлар қатаридин мунасип орун елип, қисқа вақит ичидә оқурмәнләрниң қизиқип оқушиға еришкән “уйғур қәләмкәшләр журнили” ниң әнә шундақ өз мәблиғи һесабиға чиқиватқанлиқи көпчиликкә яхши мәлум. Йеқинда униң 4 - вә 5 - санлири йоруқ көрди.

Бу санларда уйғур классик әдәбияти вәкиллиридин зәлили вә нөбитиниң шеирий әсәрлири рус тилида берилгән болуп, уларни атақлиқ алим мурат һәмрайеф тәрҗимә қилған. “уйғур қәләмкәшләр журнили” ниң өзигә хас йәнә бир алаһидилики шуниңдики, уйғурларниң тарихий вәтинидә иҗат қилип, хәлқиниң сөйүмлүк пәрзәндлиригә айланған әдипләрниң әсәрлири журналниң һөрмәтлик сәһипилиридин пат - пат орун елип туриду. Бу қетимда мәшһур язғучилар абдуреһим өткүрниң “из” вә зордун сабирниң “ана юрт” романлиридин үзүндиләр, шундақла шаир өмәр муһәммәтиминниң шеирлири берилгән. Журналниң 4 - санида һазир лондонда истиқамәт қиливатқан, хәлқара қәләмкәшләр уйғур мәркизиниң әзаси әзиз әйсаниң “боғулған һеслар”, “бир гүл ечилса”, “сәһәр тиниқлири”, “хәритәмдә сән” қатарлиқ бир түркүм шеирлири елан қилинған.

Әлвәттә, “уйғур қәләмкәшләр журнили”да асасий орун турки җумһурийәтләрдики уйғур язғучилириниң, рәссамлириниң, алимлириниң иҗадийитигә берилгән. Бу санларда аблиз һезим, гүлбәһрәм хошайева, савутҗан мәмәтқулоф, абдухалиқ махмудоф, исрайил ибраһимоф, исмайилҗан иминоф, телман нурахуноф, гүлнарә аутова охшаш тонулған язғучи вә шаирларниң иҗадийити, хәмит һәмрайеф, малик мәһәмдиноф, пәрһат һәмрайеф вә башқиларниң һәр хил мәзмундики мақалилири, күрәш зулпиқароф, абдукерим ийса, руслан йүсүпоф, йүсүпҗан турдийеф қатарлиқ рәссамларниң әсәрлири орун алған.

“уйғур қәләмкәшләр журнили” 2014-йиллиқ 4-сани
“уйғур қәләмкәшләр журнили” 2014-йиллиқ 4-сани

Зияритимизни қобул қилған филологийә пәнлириниң намзати халминәм мәсимова мәзкур журнал һәққидә тохтилип, мундақ деди: “кейинки вақитларда қазақистан уйғур мәтбуатида бир аз илгириләшләрниң йүз бериватқанлиқини байқашқа болиду. У болсиму бизниң ана тилимиздики гезит вә журналларниң көпийиши. Әгәрдә уйғур оқурмәнлири атмиш йилға йеқин вақит мабәйнидә өзиниң үзлүксиз чиқип келиватқан “коммунизм туғи” йәни һазирқи “уйғур авази” гезити арқилиқ хәлқимизниң тарихи, мәдәнийити, әдәбияти вә сәнити, турмуш - тирикчилики вә башқиму саһәлиригә аит қизиқарлиқ мәлуматлар билән тонушуп кәлгән болса, һә, шаир вә язғучилиримиз өз әсәрлирини гезитимиз сәһипилиридә елан қилиш пурситигә егә болуп кәлгән болса, һазир бу мумкинчиликләр йәнә техиму кәңәйди. Биз қизиқип оқуйдиған “асия бүгүн” гезити, “интизар”, “ахбарат”, “ғунчә” қатарлиқ журналлар сепигә мана әнди йәнә бир нәшр “уйғур пән журнили” лиму қошулди. Улар өз хираҗити билән чиқиватқиниға һәм башқиму көплигән қийинчилиқларға қаримай, мәзмуни, сүпити җәһәттин һеч бир гезит - журналдин қелишмайду. Йеқинда “уйғур пән журнили” ниң новәттики төртинчи вә бәшинчи санлири йоруқ көрди. Уларда асасән шаир вә язғучилиримизниң, рәссамлиримизниң әсәрлири, алимлиримизниң әмгәклири, шундақла хәлқимиз еғиз иҗадийитиниң бай нәмунилири пат - патла бесилип туриду. Журналниң умуми сүпитини алаһидә тәкитлигүм келиду. Бу йәрдә шу журнални нәшргә тәйярлаватқан униң баш муһәррири хәмит һәмрайифниң вә шундақла “мир” нәшрият өйи хадимлириниң һармай издинип, көп тиришқанлиқини очуқ көрүшкә болиду. Мән бу журналниң буниңдин кейин техиму мәзмунлуқ болуп, хәлқимиз сөйүп оқуйдиған, униң еһтияҗини қандуралайдиған журнал болушини тиләймән.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт