Qirghizistan Uyghurliri xetme-quran oqup, saxawetchilerge teshekkürnamiler teqdim qildi

Ixtiyariy muxbirimiz firuze
2017-09-12
Share
ehsan-medali-rejep-atesh Gérmaniyediki "Sherqiy türkistan uchur merkizi" ning re'isi abdujélil qaraqashqa bérilgen "Éhsan" médalini 3 yildin buyan qirghizistan'gha kélip saxawetlik ishlarni élip barghan rejep atesh ependi(solda) wakaliten tapshurup aldi. 2017-Yili séntebir, bishkek.
RFA/Firuze

Zulhejje éyining aldida qirghizistandiki Uyghur jama'iti "Ittipaq" jem'iyiti ulugh qurban héyt bayrimigha atap bir qatar saxawetlik ishlarni pilanlighan idi.

Qirghizistan boyiche chu wilayiti we jenubiy wilayetlerdiki osh, jalal'abad, özgen sheherliride, qeshqer-qishlaq yézisi we issiq köl wilayitining qara-köl shehiridiki jem'iy üch ming Uyghur a'ilisige qurbanliq tarqitildi.

"Ittipaq" jem'iyitidiki milletperwer er-ayallar öz mehelliliridiki mohtaj a'ililerge qurbanliqlarni yetküzüp berdi.

Bu munasiwet bilen 7-séntebir küni bishkek shehiridiki "Awat" kaféxanisida gérmaniyediki "Sherqiy türkistan uchur merkizi" ning xadimi rejep ateshning teshebbuskarliqida xetme-quran oquldi. Rejep ependining bildürüshiche, bügünki oquluwatqan xetme-quranning sewebi - gérmaniyediki Uyghur pa'aliyetchilerdin abdujélil qaraqash ependi bashchiliqidiki türk jama'etning qirghizistandiki yétim-miskin a'ililerge qurbanliqlarni ewetip bergenlikige shundaqla "Ittipaq" jem'iyitige xizmet körsetken er-ayallargha teshekkür éytish üchün iken.

Bügünki yighilishta 3 yildin buyan qirghizistan'gha kélip saxawetlik ishlarni élip barghan rejep atesh, erjüment elchi we murat adem ependilerge qirghizistandiki Uyghur jama'iti namidin teshekkürnamiler bérildi.

Gérmaniyediki "Sherqiy türkistan uchur merkizi" ning re'isi abdujélil qaraqashqa "Éhsan" médali teqdim qilinip, uning qirghizistandiki Uyghur jama'itige qiliwatqan yardemlirige teshekkür éytildi.

"Éhsan" médali qirghizistandiki "Ittipaq" jem'iyiti teripidin 2015-yili tesis qilin'ghan médal bolup, uni Uyghur xelqining tili, edebiyat-sen'iti we medeniyitining rawajlinishi üchün zor töhpilerni qoshqan shexslerge teqdim qilip kelgen idi. Aldinqi yillarda "Éhsan" médali rabiye qadir xanim, merhum akadémik ezis narinbayéf, pelsepe penlerning namzati ekberjan bawudunof we bashqa ataqliq shexslerge bérilgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet