Қирғизистанда пешқәдәм рәссам сабитҗан бабаҗанофниң рәсим көргәзмиси ечилди

2017-Йилниң 2-март күни қирғизистан пайитәхти бишкәктә хәлқара аяллар байримиға беғишланған, сабитҗан бабаҗанофниң “акварел ” дәп аталған шәхсий көргәзмиси ечилди. Көргәзмә олга мануилова намидики музейда уюштурулған.

Рәссам сабитҗан : “май бояқлар билән йезилған рәсимләр матада тартилиду, акварел болса су бояқ билән қәғәзгә тартилған рәсимләр, акварел техникиси наһайити қийин, шуниң үчүн рәсимләр бәк назук болиду” дәп чүшәнчә бәрди.

Мәзкур көргәзмигә 30 дин ошуқ сүрәтләр қоюлған болуп, уларниң ичидә “дилбар зубаршаева”, “уруқ-туғқанлар”, “хивә кочиси” вә башқа рәсимләр музей дуварлирини зиннәтләп туриду. Маһирниң иҗадийитидә тәбиәт вә вәтән темилири муһим рол ойнайду.

Иҗадийәт паалийитигә қирғизистан уйғурлири “иттипақ” җәмийитиниң рәиси артиқ һаҗиеф, қирғизистан сүрәтчиләр иттипақиниң рәиси усубалиев таалайбек, қирғизистан музей тармақлириниң рәиси момоханова арман вә җәмийәт әзалири қатнашти. Сүрәтчиләр иттипақиниң рәиси сабитҗан бабаҗанофниң иҗадийити тоғдисида тохтилип мундақ деди: “сабитҗан ака қирғиз республикисиниң әң меһнәткәч талантлиқ сүрәтчиси. Һәр йили рәссам өзиниң шәхсий көргәзмилири билән бизни вә җамаәт әһлини сүйүндүрүп туриду. Болупму “акварел” техникисида тартилған сүрәтләр наһайити назук, лекин су бояқ наһайити қийин болиду. Мундақ рәсимләрни җанкүйәр, меһнәткәч, маһир сүрәтчиләр тартиду” деди.

Назүк сүрәтләрдин ибарәт көргәзмидә маһирниң “акварел” рәсим китабчисиму алаһидә көзгә чилиқиду., бу китабни сабитҗан ака өзиниң ғулҗа шәһиридики тунҗи муәллими зәйнидин йүсүпофқа беғишлиди.

Сабитҗан бабаҗаноф 1941-йили ғулҗа шәһиридә туғулған. Бовиси салиҗанбай бабаҗаноф миллий инқлабқа актип қатнишип, йәр,су идарисиниң башчиси сүпитидә хизмәт көрсәткән. Тиләккә қарши, мав зедуң дәвридә совет иттипақиға көчүп чиқиштин башқа йол йоқ болуп, у, 1955-йили ата-бовилири билән қирғизистан талас областиға чиқип киров райониға орунлашқан.

Сабитҗан камал оғли бабаҗаноф қирғиз республикисиниң мәдәнийитигә зор һәссә қошқан шәхс, 1993-йили қирғиз республикисида “әмгәк сиңиргән рәссам” дәп тәқдирләнгән. У һазир қирғизистан сүрәтчиләр иттипақиниң әң һөрмәтлик рәссамлириниң бири, шундақла “иттипақ” җәмийитиниң актип әзаси.

Қирғизистан уйғурлири “иттипақ” җәмийитиниң рәиси артиқ һаҗийиф өз сөзидә мундақ деди: “бүгүн биз үчүн чоң байрам, бизниң атақлиқ рәссамимизниң чоң көргәзмиси ечилди. Сабитҗан бабаҗанофниң рәсимлири пәқәт қирғизистандила әмәс, явропа, америкиларда тонулған. Биз қирғизистан уйғурлири сабитҗан акимиз билән пәхирлинимиз.”

Көргәзмә 2-апрел күнигичә ечилидиған болуп, зиярәтчиләр, сәнәтсүйәрләр бир ай ичидә келип көрүп вә сүрәтләрни сетивалсиму болиду. Рәссамниң дәсләпки сүрәтлири албом китабчилиридә нәшр қилинған. “акварел” албомида болса, мәзкур көргәзмисидики рәсимләр, чингиз айтматофниң иҗадийити һәққидики сүрәтләр вә “өтмүш билән келәчәк оттурисидики йәттә көврүк”, уйғур хәлқиниң атақлиқ шәхслири, уларниң ичидә ә.Қасими, л. Мутәллип, м.Қәшқәри вә башқиларниң рәсимлири вә вәтән тәбиәт мәнзирилири йәр алған.