Qirghizistanda péshqedem ressam sabitjan babajanofning resim körgezmisi échildi

2017-Yilning 2-mart küni qirghizistan payitexti bishkekte xelq'ara ayallar bayrimigha béghishlan'ghan, sabitjan babajanofning “Akwarél ” dep atalghan shexsiy körgezmisi échildi. Körgezme olga manu'ilowa namidiki muzéyda uyushturulghan.

Ressam sabitjan : “May boyaqlar bilen yézilghan resimler matada tartilidu, akwarél bolsa su boyaq bilen qeghezge tartilghan resimler, akwarél téxnikisi nahayiti qiyin, shuning üchün resimler bek nazuk bolidu” dep chüshenche berdi.

Mezkur körgezmige 30 din oshuq süretler qoyulghan bolup, ularning ichide “Dilbar zubarsha'éwa”, “Uruq-tughqanlar”, “Xiwe kochisi” we bashqa resimler muzéy duwarlirini zinnetlep turidu. Mahirning ijadiyitide tebi'et we weten témiliri muhim rol oynaydu.

Ijadiyet pa'aliyitige qirghizistan Uyghurliri “Ittipaq” jem'iyitining re'isi artiq haji'éf, qirghizistan süretchiler ittipaqining re'isi usubali'éw ta'alaybék, qirghizistan muzéy tarmaqlirining re'isi momoxanowa arman we jem'iyet ezaliri qatnashti. Süretchiler ittipaqining re'isi sabitjan babajanofning ijadiyiti toghdisida toxtilip mundaq dédi: “Sabitjan aka qirghiz réspublikisining eng méhnetkech talantliq süretchisi. Her yili ressam özining shexsiy körgezmiliri bilen bizni we jama'et ehlini süyündürüp turidu. Bolupmu “Akwarél” téxnikisida tartilghan süretler nahayiti nazuk, lékin su boyaq nahayiti qiyin bolidu. Mundaq resimlerni janküyer, méhnetkech, mahir süretchiler tartidu” dédi.

Nazük süretlerdin ibaret körgezmide mahirning “Akwarél” resim kitabchisimu alahide közge chiliqidu., bu kitabni sabitjan aka özining ghulja shehiridiki tunji mu'ellimi zeynidin yüsüpofqa béghishlidi.

Sabitjan babajanof 1941-yili ghulja shehiride tughulghan. Bowisi salijanbay babajanof milliy inqlabqa aktip qatniship, yer,su idarisining bashchisi süpitide xizmet körsetken. Tilekke qarshi, maw zédung dewride sowét ittipaqigha köchüp chiqishtin bashqa yol yoq bolup, u, 1955-yili ata-bowiliri bilen qirghizistan talas oblastigha chiqip kirow rayonigha orunlashqan.

Sabitjan kamal oghli babajanof qirghiz réspublikisining medeniyitige zor hesse qoshqan shexs, 1993-yili qirghiz réspublikisida “Emgek singirgen ressam” dep teqdirlen'gen. U hazir qirghizistan süretchiler ittipaqining eng hörmetlik ressamlirining biri, shundaqla “Ittipaq” jem'iyitining aktip ezasi.

Qirghizistan Uyghurliri “Ittipaq” jem'iyitining re'isi artiq hajiyif öz sözide mundaq dédi: “Bügün biz üchün chong bayram, bizning ataqliq ressamimizning chong körgezmisi échildi. Sabitjan babajanofning resimliri peqet qirghizistandila emes, yawropa, amérikilarda tonulghan. Biz qirghizistan Uyghurliri sabitjan akimiz bilen pexirlinimiz.”

Körgezme 2-aprél künigiche échilidighan bolup, ziyaretchiler, sen'etsüyerler bir ay ichide kélip körüp we süretlerni sétiwalsimu bolidu. Ressamning deslepki süretliri albom kitabchiliride neshr qilin'ghan. “Akwarél” albomida bolsa, mezkur körgezmisidiki resimler, chin'giz aytmatofning ijadiyiti heqqidiki süretler we “Ötmüsh bilen kélechek otturisidiki yette köwrük”, Uyghur xelqining ataqliq shexsliri, ularning ichide e.Qasimi, l. Mutellip, m.Qeshqeri we bashqilarning resimliri we weten tebi'et menziriliri yer alghan.