Qazaqistanliq Uyghurlar öz xelqige hörlük tilidi

Ixtiyariy muxbirimiz oyghan
2018-08-21
Élxet
Pikir
Share
Print
Almuta shehirining dostluq mehelliside otken qurban héyt bayrimidin körünüsh. 2018-Yil 21-awghust, qazaqistan.
Almuta shehirining dostluq mehelliside otken qurban héyt bayrimidin körünüsh. 2018-Yil 21-awghust, qazaqistan.
RFA/Oyghan

21-Awghust küni qazaqistanliq Uyghurlar memlikette yashawatqan bashqa musulman xelqler bilen birlikte qurban héytni kütüwaldi. Bu küni seherliki sa'et 7 de Uyghurlar köp olturaqlashqan almuta shehirining gorniy gigant, sultanqorghan, zarya wostoka, dostluq mehelliliridiki meschitlerge jem bolghan minglighan Uyghurlar qurban héyt namizi oqudi hem naghra sadasigha egiship, bir-birini tebrikleshti.

Dostluq meschitining ustazi bexitjan radi'omiz ziyaritini qobul qilip, pütkül musulman xelqini, shu jümlidin Uyghurlarni chin qelbidin qurban bayrimi bilen tebriklep, mundaq dédi: "Qurban héyti hemmimizning yüreklirini yéqinlashturup, bir ümmet, bir millet bolup, tileklirimizning, közligen meqsetlirimizning orunlishini tileymen."

Igilishimizche, qazaqistan prézidénti bügün qazaqistanning barliq musulmanlirini qurban héyt bayrimi bilen resmiy tebriklidi. U mundaq dédi: "Her xil dinlar we milletler wekilliri yashawatqan qazaqistanda ularning diniy we milliy kélip chiqishidin qet'iy nezer qurban héyti bizning meniwi birlikimizning mustehkemlinishige, ademlerning uyushchanliqigha hem öz ara hörmet qilishigha chong töhpe qoshuwatmaqta. Bu xushalliq bayram künliride her bir qazaqistanliq a'ilige bext, tinchliq we xatirjemlik tileymen."

Diniy zat sedirdin hajimning éytishiche, qazaqistan musteqilliq alghandin buyan diniy étiqadlargha keng yol échilip, xelqler özlirining milliy we diniy en'enilirini saqlap kelmektiken. U, qazaqistan musulmanliri hoquqlirining qanun teripidin qoghdilidighanliqini tekitlidi.

Sedirdin hajim bügün qazaqistandiki diniy pursetlerning dunyaning bashqa memliketliride yoq ikenlikini, shuning ichide Uyghur élidiki milyonlighan Uyghur musulmanliriningmu buningdin azab chékiwatqanliqini bildürüp, yene mundaq dédi: "Ularda 50-60 yil ilgiri mundaq purset bolghan bolsimu, hazir yoq. Ular qurbanliq qilish üchün, hej qilish üchün shunchilik bedellerni tölewatidu. Hetta islamning 'essalamu'eleykum' dégen salimini bérip, aylap, yillap türmige, lagérlargha chüshken qérindashlirimiz bar. Ular bügünki künde éghir ehwallarni béshidin kechürüwatidu. Bügün pütün musulmanlar héyt munasiwiti bilen yayrap yürgen waqitta allata'ala shu xelqimizni azadliqqa élip chiqqay."

Almuta shehirining zarya wostoka mehelliside yashawatqan diniy zat tursun hajim arziyéfning éytishiche, qazaqistan musteqilliqqa érishkendin kéyin Uyghurlar özliri olturaqlashqan rayonlarda meschitlerni sélip, her xil diniy pa'aliyetlerni yürgüzüsh mumkinchilikige ige bolghan. U, roza héyt we qurban héyt bayramlirida Uyghurlarning her xil xeyrxahliq pa'aliyetlirini élip barghanliqini éytip, mundaq dédi: "Bizmu kéyinki waqitlarda, bolupmu, mesilen, gollandiye Uyghur teshkilati türk birleshmisining iqtisadigha bu yili üchinchi yil boldi, qurbanliqni mohtaj ademlerge tarqitiwatimiz. Bügün, yeni qurban héytining birinchi küni almuta we almutaning etrapigha 60 tin artuq qoy soyup, tarqattuq. Buni teshkilligen bizning yigit bashlirimiz we yashlar."

Tursun hajim arziyéfning éytishiche, mundaq xeyrxahliq ishliri ayrim saxawetlik shexsler teripidinmu turaqliq yürgüzülüp turuwatmaqtiken. Mundaq yardemler peqet Uyghurlar arisidila emes, belki hal-oqiti nachar bashqa millet wekillirigimu yetküzülmekte.

Toluq bet