Gollandiyede rabiye qadir xanim muhajirettiki on yilliqini xatirilesh yighinida mukapatlandi

Ixtiyariy muxbirimiz pida'iy
2015-12-14
Share
rabiye-muhajiret-10-yil-mukapat-1.jpg Amstérdamda ötküzülgen, rabiye qadir xanimning muhajirettiki on yilliqini tebriklesh pa'aliyitide rabiye qadir xanim söz qilmaqta. 2015-Yili 12-dékabir, gollandiye.
RFA/Pida’iy

12-Dékabir gollandiyening amstérdamgha qarashliq slotérdeyk shehiride, rabiye qadir xanimning muhajirettiki on yilliqini tebriklesh pa'aliyiti ötküzüldi.

Pa'aliyetni “Gollandiye Uyghur birliki”, “Türk öyi” we “Yawro-asiya ammiwi teshkilat munbiri” qatarliq teshkilat we jem'iyetler birlikte teshkillidi.

Pa'aliyet shu yer waqti kech sa'et 6 de bashlandi. Pa'aliyetke gollandiyede yashawatqan Uyghurlar, noghaylar, ezerbeyjanliqlar, qirim, éraq we türkiye türklirining teshkilat wekilliri we aktip qollighuchiliridin bashqa, gérmaniye we bélgiyelerdinmu teshkilat wekilliri we siyasiy aktiplar kélip qatnashti.

Pa'aliyette rabiye qadir xanimning bi'ografiyisi teswirlen'gen filimdin kéyin, “Türk öyi” we “Yawro-asiya ammiwi teshkilat munbiri” ning mes'ulliridin weyis gün'gür ependi rabiye qadir xanimning muhajirettiki on yilining sunmas irade bilen ghelibilik ötkenlikini tebriklidi we rabiye qadir xanimgha pütün türk sistémisidiki teshkilatlar namidin “Mehmud qeshqeriy kümüsh médali” teqdim qildi.

Gollandiye Uyghur birliki teshkilatining mes'ulliridin sadiqjan seley ependi mezkur teshkilat we Uyghurlar namidin bir dane altun médal teqdim qildi.

Rabiye qadir xanim ötken on yilliq musapiside her jehettin yardemde bolghan türk qérindashlirigha chungqur rehmet éytidighanliqini bildürüp ötkendin kéyin, muhajirettiki gollandiyede tunji qétim qarshi élin'ghan chaghlirini bir qatar eslep ötti we shundin béri izchil dawam qilip kelgen dostane munasiwetlirining tarixiy qimmitige ijabiy baha berdi. Muhajirettiki on yildin biri dawam qilip kelgen, dunya Uyghur qurultiyining bügünki tesiri küchi we bashqa mesililer heqqide keng da'iride toxtaldi.

Ziyaritimizni qobul qilghan weyis gün'gür ependi: “Bir sherqiy türkistan mujadilisige xuddi burundin tartip dawamliq diqqet qilip turimiz. Bügün biz bu yerde sherqiy türkistanliqlarning sürgündiki lédiri rabiye qadir xanimning türmidin chiqqanliqi we milliy mujadilige rehberlik qilip kéliwatqanliqining on yilliqini xatirilesh arqiliq, bir mujadilirining on yilliqini pütün dunyagha xatiriletmek üchün pa'aliyet uyushturduq” dédi.

U, “Sizche, Uyghurlarning dewasi qandaqraq kétiwatidu?” dep sorighan so'alimizgha jawaben mundaq dédi: “Uyghurlar bu on yil ichide hemmidin awwal pütün türk dunyasining kündilik xatirisige kirdi. On yil ilgiri sherqiy türkistanning qeyerde ikenliki we Uyghur qirindashlirining qaysi halda ikenlikidin xewersiz türk xelqi bügün xitay ishghaliyitide milyonlarche qirindashlirining barliqini,roza tutmaq, namaz qilmaq, hejge barmaq mesililiride cheklimige uchrawatqanliqini bilip yetti. Buninggha qarap sherqiy türkistan mesilisining dunya küntertipige kélishide rabiye qadir xanimning ejri köp dep oylaymen.”

Türkiyedin alahide qedem teshrip qilghan dunya Uyghur qurultiyining mu'awin re'isi séyit tumtürk ependi bu heqte toxtilip, rabiye qadir xanimning muhajirettiki on yilining netijilik ötkenlikini tekitlep, bu pa'aliyetke qatnashqan türkiy sistémisidiki barliq teshkilatlarning ishtirak qilishi bilen teqdim qilin'ghan bu mukapatning qimmitini yuqiri dep chüshinidighanliqini bildürdi we rabiye qadir xanim bashchiliqidiki milliy dewaning istiqbaligha ümid bilen qaraydighanliqini, uning bilen adaqqa qeder birge mangidighanliqini tekitlidi.

Gérmaniyedin kelgen dunya Uyghur qurultiyining diniy ishlar mes'uli turghunjan alawun hajim, “Bu dewa yalghuz rabiye qadir xanimningla emes, belki barliq sherqiy türkistanliqlarning dewasi bolghanliqi üchün, Uyghurlarning istiqbaligha munasiwetlik herqandaq pa'aliyetke aktip qatnishish hemmeylenning mes'uliyitidur” dédi we jaz‏a we mukapat tüzümining roli hem ehmiyitining yuqiriliqini ilgiri sürdi.

Dunya Uyghur qurultiyining re'isi rabiye qadir xanim ziyaritimizni qobul qilip, ötken on yilliq musapiside xitay hökümitining assimilyatsiyelirining barghanséri kéngiyip, barghanséri tézleshkenlikini shikayet qildi we dunya Uyghur qurultiyi bashchiliqidiki milliy herikitining qaysi basquchlarni bésip ötkenliki heqqide toxtaldi.

Yawropa sherqiy türkistan ma'arip jem'iyitining mes'ulliridin isa qarajimmu pikir bayan qildi. Pa'aliyetke ishtirak qilghanlardin abdusalam ependimu rabiye qadir xanim “Heqliq dewani misli körülmigen sewiyige yetküzdi” dep qaraydighanliqini bildürdi.

Pa'aliyet teshkilligüchilerdin “Gollandiye Uyghur birliki” teshkilatining mes'uli sadiqjan seley ependi bu pa'aliyet arqiliq, dewa yollirida ter töküwatqanlargha medet bérish we bu arqiliq dewaning tereqqiyatigha türtke bolushni meqset qilghanliqini bildürdi.

Pa'aliyet ehli pa'aliyet axirida öz-ara hal-mung bolushti we xatire resimge chüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet