Tel'et mirrehimuf: chéqiwétilgen qedimiy qeshqerni süretlirimde saqlap qaldim

Ixtiyariy muxbirimiz azad
2016-01-29
Share
telet-mirrehimov-moskiva-resim-korgezme-2015-oktebir-ongdin-beshinchi.jpg Tel'et mirrehimuw ependi(ongdin beshinchi kishi) moskiwadiki Uyghurlar bilen resim körgezmiside. 2015-Yil öktebir.
RFA/Azad

Qirghizistanda xizmet körsetken sen'et erbabi, péshqedem Uyghur ressami tel'et mirrehimuf 2015 - yilning axirida rusiye paytexti moskwada özining resim körgezmisini ötküzgen we türkiyede qisqa mezgillik ijadi seperde bolup kelgendin kéyin, yéqinda radi'omiz ziyaritini qobul qilip, özining ötken bir yilda qolgha keltürgen netijiliri hemde 2016 - yilda aldigha qoyghan pilanliri heqqide toxtaldi.

Tel'et ependi özining rusiye paytexti moskwada resim körgezmisi uyushturush jeryanidiki tesiratliri hemde türkiye sepiri heqqide toxtalghanda munularni bildürdi: "Méning uzundin buyan moskwada özümning resim körgezmisini uyushturush arzuyum bar idi. Chünki moskwa sabiq sowét ittipaqida yashighan ressamlarning neziride güzel sen'et sahesining merkizi dep qarilidu. Men bu qétim körgezme uyushturush jeryanida moskwadiki Uyghur jama'iti we güzel sen'et sahesidiki dostlarning qollishigha érishtim. Moskwada resim körgezmisi uyushturup bolupla, teklipke bina'en türkiyege bérishqa toghra keldi. Türkiyedimu nahayiti qizghin kütüwélishqa muyesser boldum, qaytip kelgendin kéyin birge barghan ressamlar bilen birlikte bishkekte körgezme uyushturduq."

Ressam tel'et ependining may boyaq süretliride weten témisi alahide orunda turidu. U özining qoyuq milliy alahidilikke ige Uyghur ilining jenubidiki menziriler teswirlen'gen süretliri heqqidiki oy - pikirliri hemde Uyghur yashlirining bilim élishqa ehmiyet bérishi lazimliqi heqqidiki köz qarashlirini ipadilep mundaq dédi: "Men weten'ge barghan chaghlirimda jenubiy wilayetlerdiki xelqimizning turmushi teswirlen'gen süretlerni köprek sizdim. Bügünki künde qeshqerdiki qedimiy imaretler xitaylar teripidin chéqiwétilgen bolsimu, shu qedimi qeshqer méning süretlirimde saqlinip qaldi. Bu kéyinki ewladlar üchün zor ehmiyetke ige. Nöwette yashlirimiz bilim élishqa sel qarimasliqi lazim, chünki bizning ishlirimiz bilimsiz netijige érishelmeydu, bolupmu Uyghurlar üchün téximu shundaq."

Péshqedem ressam söhbitimizning axirida özining 2016 - yilliq pilanliri heqqide toxtilip mundaq dédi: "Men bu yil qazaqistanning almata shehiride chong tiptiki resim körgezmisi uyushturush heqqide oyliniwatimen. Méningche, moskwadiki körgezme muweppeqiyetlik bolghandin kéyin, almatadimu yaxshi ötse kérek dep oylawatimen. Hemmimizge melum bolghinidek, ijadiyet yéngiliqni telep qilidu. Shu sewebtin menmu öz ijadiyetlirimde yéngiliq yaritish yolida izdiniwatimen."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.