Түрк дуняси яш язғучи-шаирлар йиғиниға уйғур шаирму қатнашти

Ихтиярий мухбиримиз арслан
2017.08.22
turk-dunyasi-yash-yazghuchi.jpg Түрк дуняси яш язғучи-шаирлар йиғиниға қатнашқан бир қисим яш язғучи вә шаирлар хатирә сүрәттә. 2017-Йили 18-авғуст, истанбул.
RFA/Arslan

Явроасия язғучилар бирликиниң уюштуруши вә түркийә җумһурийити күлтүр вә саяһәт министирлиқиниң қоллиши билән тунҗи нөвәтлик түрк дуняси яш язғучилар вә шаирлар учришиши йиғини истанбулда өткүзүлди.

Бу йиғин 8-айниң 14-күнидин 18-күнигичә 5 күн давам қилған болуп, йиғинға қазақистан, қирғизистан, өзбекистан, түркмәнистан, шималий қибрис түрк җумһурийити, түркийә қатарлиқ дөләтләрдин вә 22 аптоном райондики түрк хәлқлиридин бирәр вәкил қатнашти. Бу йиғинға уйғурларға вакалитән қазақистанлиқ уйғур яш шаир абдулҗан азнабақийиф әпәнди алаһидә тәклип билән қатнашти вә уйғур әдәбияти тоғрисида мәлумат бәрди.

Бу йиғин 8-айниң 15-күни башланған болуп ечилиш мурасимида, түркийә күлтүр вә саяһәт министирлиқиниң сабиқ министири профессор наби авҗи, явроасия язғучилар бирликиниң муавин рәиси доктор яқуп өмәроғлу сөз қилди. Кейин һәр қайси дөләт вә районлардин кәлгән вәкилләр сәһнигә чиқип өзлирини вә вәкил болуп кәлгән хәлқлирини қисқичә тонуштуруп өтти.

Йиғинниң биринчи күнидики йиғин, түрк дуняси әдәбиятиниң ортақ дәврлири дегән темида өткүзүлгән болуп, бу йиғинда профессор рамизан қорқмаз әпәнди, әнәниви әдәбияттин пайдилиниш усуллири тоғрисида тохталди вә түрк хәлқлириниң келип чиқиш мәнбәлириниң ортақлиқи тоғрисида йеңи бир келәчәкни инша қилишниң йоллири тоғрисида яш язғучи вә шаирлар билән музакирә елип берилди.

Бу йиғинда йәнә, өзлири яшаватқан дөләт вә районларда китаблири нәшр қилинған вә яки мәшһур гезит-журналларда мақалилири елан қилинған яш язғучи вә шаирлар түрк дуняси әдәбиятлиридики йеқинқи заман йеңилиқлири вә тил-әдәбиятқа мунасивәтлик һәр хил темиларда пикир алмаштурди вә музакирә елип барди.

Уйғур шаир абдулҗан бу йиғинда, уйғур хәлқим, әссалам истанбул дегән темидики шеирлирини оқуш билән биргә, уйғур әдәбияти тоғрисида йиғин иштиракчилириға мәлумат бәргән вә өзи йезип нәшр қилдурған бир қанчә парчә китаблирини вә журналларда елан қилинған мақалилирини тонуштуруп өткән.

Қазақистанлиқ уйғур шаир абдулҗан узун вақиттин бири шеирий иҗадийәт билән шуғуллиниватқан болуп, язған әсәрлири уйғур хәлқлири ичидә сөйүп оқулуватқан шаирлардин бири икән. Қазақистанниң челәк наһийисидә оқутқучи болуп ишләватқан шаир, уйғур тили вә әдәбиятини раваҗландуруш үчүн иштин сиртқи вақитларда издинип кәлмәктә икән. У йәнә қошумчә бир қанчә журналларда тәһрирлик қилидикән. Қазақистандики варис әдәбий иҗадийәт бирләшмисиниң әзаси болған абдулҗан, бу қетимқи йиғинға қатнишиш арқилиқ, уйғур авазини түрк дәрясиға аңлатқан болди.

Бу йиғин ахирида йиғинниң хуласә доклати елан қилинди. явроасия язғучилар бирликиниң рәсмий тор бетидә елан қилинған бу хуласә доклатта мундақ дейилгән: йиғинда елип берилған музакирә нәтиҗисидә, түрк дунясиниң ортақ бир алақә тилиниң түркийә түркчиси болуш. Түрк дуняси яш язғучилар үчүн ортақ бир мукапат тәсис қилиш. Түрк дуняси яш язғучилар учришишини һәр йили өткүзүш. Һәр қетимқи паалийәтләрни түрк дунясидики бир шаир вә язғучи намида уюштуруш. Түрк дуняси язғучилириниң өз-ара мунасивәтләрни күчләндүрүш. Йиғинға қатнашқан язғучи-шаирларниң китаблири вә елан қилинған мақалилирини башқа тилларға тәрҗимә қилип нәшр қилиш. Бу паалийәткә дәстәк бәргән түркийә күлтүр вә саяһәт министирлиқиға түрк дуняси яш язғучи-шаирлар намида тәшәккүр ейтиш қатарлиқ қарарлар елинған.

Биз бу йиғин тоғрисида техиму көп мәлуматқа игә болуш үчүн, уйғур шаир абдулҗан азнабавийиф билән сөһбәт елип бардуқ.

Түркийәдә яшаватқан уйғур шаирәси сейтниса лоқман вәтинидики уйғур язғучи, шаирларниң һазирқи иҗадийәт әһвали һәмдә уйғур әдәбиятиниң түрк дуняси әдәбиятидики роли һәққидә өзиниң һес қилғанлирини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.