Әхмәтҗан һашири түрк дуняси драма йезиш мусабиқисидә биринчиликкә еришти

Ихтиярий мухбиримиз әркин тарим
2017.12.19
exmetjan-ashiri-nebi-awji.jpg

Түркийә парламент әзаси сабиқ саяһәт вә мәдәнийәт министири нәби авҗи әпәнди түрк дуняси драма йезиш мусабиқисидә биринчиликкә еришкән әхмәтҗан һашири әпәндигә мукапат бериватқан көрүнүш. 2017-Йили 19-ноябир, түркийә. RFA/Erkin Tarim

turk-dunyasi-drama-yezish-musabiqisi-1.jpg

Түрк дуняси драма йезиш мусабиқисидин көрүнүш. 2017-Йили 19-ноябир, түркийә. RFA/Erkin Tarim

turk-dunyasi-drama-yezish-musabiqisi-2.jpg

Түрк дуняси драма йезиш мусабиқисидин көрүнүш. 2017-Йили 19-ноябир, түркийә. RFA/Erkin Tarim

turk-dunyasi-drama-yezish-musabiqisi-3.jpg

Түрк дуняси драма йезиш мусабиқисидә мукапатқа еришкәнләр. 2017-Йили 19-ноябир, түркийә. RFA/Erkin Tarim

turk-dunyasi-drama-yezish-musabiqisi-4.jpg

Түрк дуняси драма йезиш мусабиқисидин көрүнүш. 2017-Йили 19-ноябир, түркийә. RFA/Erkin Tarim

Түркийә җумһурийити кейинки 25 йилдин бери оттура асия түркий җумһурийәтлири вә түркий милләтлири билән болған мунасивитини күчәйтиш үчүн һәр хил әдәбий паалийәтләр уюштурмақта.

Бүгүн түркийә мәдәнийәт вә саяһәт министирликиниң қоллиши билән явро-асия язғучилар бирлики өткүзгән, 2-нөвәтлик хәлқаралиқ “қорқут ата драма йезиш мусабиқиси” да нәтиҗә қазанғанларға мукапат тарқитиш мусабиқиси өткүзүлди. Әзәрбәйҗан, русийә федератсийәси, молдова, қазақистан, иран, ирақ вә түркмәнистан қатарлиқ дөләт һәм районлардин 48 язғучи қатнашқан мусабиқидә уйғур язғучи әхмәтҗан һашириниң “чарбағ” намлиқ драма әсири биринчиликкә еришкән.

Түркийәлик язғучи лүтфи шахсувароғлуниң драма әсири иккинчиликкә, әзәрбәйҗандин пәрвин нуралийева ханимниң драма әсири үчинчиликкә еришкән. 19-Декабир әнқәрәдә өткүзүлгән мукапат тарқитиш мурасимида әхмәтҗан һашириниң медалини парламент әзаси, сабиқ мәдәнийәт вә саяһәт министири нәби авҗи бәрди. Мурасимға түркийә мәдәнийәт вә саяһәт министириниң муавини гүләр яйман, явро-асия язғучилар бирлики рәиси яқуп өмәроғлу қатарлиқлар қатнашти вә сөз қилди.

Парламент әзаси, сабиқ мәдәнийәт вә саяһәт министири нәби авҗи әпәнди “қорқут ата драма йезиш мусабиқиси”ға әсәр әвәткән кишиләргә рәһмәт ейтқандин кейин мукапатқа еришкәнләрни тәбрикләп мундақ деди: “алим вә пәзиләтлик кишиликкә игә болған қорқут атани рәһмәт вә миннәтдарлиқ билән әсләймән. Шундақла 2-нөвәтлик хәлқаралиқ драма йезиш мусабиқисигә қатнашқан әсәр баһалаш комитетиға вә әсәр әвәткән һәм драма әсәрлири мукапатқа еришкән язғучиларни тәбрикләймән.”

Бу қетимқи драма йезиш мусабиқисигә 48 киши әсәр әвәткән болуп, буларниң ичидин уйғур язғучи әхмәтҗан һашири язған “чарбағ” намлиқ әсәр биринчи болуп баһаланған. Йиғин риясәтчиси әхмәтҗан һашириниң медалини парламент әзаси нәби авҗиниң беридиғанлиқини елан қилғанда залда гүлдүрас алқиш садаси яңриди.

Арқидин қазақистан язғучилар җәмийитиниң әзаси, тонулған язғучи әхмәтҗан һашири әпәнди сөз қилип, шәрқий түркистан вә қазақистанда яшаватқан 20 милйон уйғур хәлқигә түркийә җумһурийитиниң һәр заман мәдәт берип келиватқанлиқини тәкитлиди.

Әхмәтҗан һашири мурасимда қилған нутқида уйғурларниң тарихта бүйүк мирасларни яратқан бүйүк хәлқ икәнликини, өзигә “қорқут ата драма мукапати” ни бәргән явро-асия язғучилар җәмийитигә пүтүн уйғур хәлқи намидин рәһмәт ейтидиғанлиқини баян қилди.

Тонулған язғучи әхмәтҗан һашири әпәнди өзиниң бу мукапатқа еришкәнлики тоғрисидики хәвәр тарқалғандин кейин қазақистандики уйғур вә қазақ зиялийлириниң интайин хурсән болғанлиқини баян қилди.

19-Декабир күни түркийәниң пайтәхти әнқәрәдики хәлқара түркий милләтләр мәдәнийәт -сәнәт тәшкилатиниң залида өткүзүлгән мурасимға “қорқут ата драма йезиш мусабиқиси” да дәриҗигә еришкән язғучилардин сирт түркийәниң һәрқайси җайлиридин кәлгән зиялийларму иштирак қилди. Истанбулдики билгә университети оқутқучиси доктор мурат орхун әпәнди әхмәтҗан һашири әпәндиниң бу мукапатқа еришкәнликидин қаттиқ пәхирләнгәнликини баян қилди.

Қазақистанниң алмута шәһиридә турушлуқ тонулған язғучи әхмәтҗан һашири язған “чарбағ” намлиқ драма әсиридә 1941-1945-йиллиридики совет-герман уруши мәзгилидә совет һөкүмитиниң зиянкәшликигә учрап, сибирйәгә сүргүн қилинған, алмута шәһири йениға җайлашқан “чарбағ” йезисидики бир уйғур момайниң һаяти баян қилинған. Бу драма йеқинда қазақистан уйғур тиятири тәрипидин сәһнигә қоюлидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.