Әнқәрәдә түрколог мирсултан османоф вә мәшһур әдип абдуреһим өткүр тәтқиқат йиғини ечилди

Мухбиримиз әркин тарим
2015-12-18
Share
turkiye-enqere-abdurehim-otkur.jpg Әнқәрәдики түрколог мирсултан османоф вә мәшһур әдип абдуреһим өткүр тәтқиқат йиғинидин бир көрүнүш
RFA/Erkin Tarim


18 - Декабир күни түркийәниң пайтәхти әнқәрәдики ғази үниверситетида тонулған түрколог мирсултан османоф туғулғанлиқиниң 85 - йиллиқи, мәшһур шаир абдуреһим өткүрниң вапат болғанлиқиниң 20 - йиллиқи мунасивити билән хәлқара уйғур тәтқиқати илмий муһакимә йиғини өткүзүлди. 18 - Декабир күни әтигән саәт тоққуз йеримда башланған илмий муһакимә йиғиниға түркийә баш министирлиқ тармиқидики түркий милләтләр һәмкарлиқ вә тәтқиқат идарисиниң муавин башлиқи, ғази үниверситети мудири бәрбәроғлу, даңлиқ түрколог профессор доктор әһмәт биҗан әрҗиласун әпәнди, тонулған түрколог осман фикри сәртқая әпәнди, алаһидә тәклип бойичә йиғинға иштирак қилған тонулған түрколог мирсултан османоф әпәнди, профессор абдуррауф полат әпәнди вә түркийәдики уйғур илим адәмлиридин профессор алимҗан инайәт әпәнди, дотсент доктор әркин әкрәм әпәнди, германийә гөтүңгән үниверситети оқутқучиси доктор абләт сәмәт вә доктор гүлзадә тәңритағли ханим қатарлиқ 20 әтрапида илим адәми иштирак қилди вә илмий доклатлирини оқуп өтти.

Ечилиш мурасимида мәзкур йиғинни оюштурған ғази үниверситети түркологийә тәтқиқат мәркизи мудири прфессор доктор һүля қасапоғлу сөз қилип, уйғур әдәбиятидики муһим шәхисләрдин бири болған абдуреһим өткүрниң вапатиниң 20 - йиллиқи, түркологийә тәтқиқатиға зор төһпә қошқан тонулған түрколог мирсултан османоф туғулғанлиқиниң 85 - йиллиқи мунасивити билән әнқәрәдә уйғур тәтқиқати йиғини оюштурғанлиқини, йиғинда илим адәмлириниң абдуреһим өткүрниң һаяти вә әсәрлири, мирсултан османофниң әсәрлири тоғрисида тәйярлиған илмий доклатлирини берип өтидиғанлиқини ейтти.

Арқидин профессор осман фикри сәртқая "қутатқубилик" темисида, профессор доктор әһмәт биҗан әрҗиласун болса "диванү луғатит түрк вә мирсултан османоф" темисида, профессор абдуррауф полат әпәнди "уйғур тили тәтқиқати вә мирсултан османоф" темисида, дотсент доктор әркин әкрәм болса "абдуреһим өткүрниң әдәбий кишиликигә тарихий җәһәттин нәзәр" темисидд илмий доклати оқуп өтти. Булардин сирт түркийәниң һәрқайси үниверситетлиридин кәлгән уйғуршунаслар абдуреһим өткүр вә мирсултан османоф вә уларниң әсәрлири тоғрисида язған илмий доклатлирини берип өтти.

Ечилиш мурасимида мирсултан осман әпәнди билән зулһаят өткүр ханимниң өз һссятини ипадиләш үчүн қилған нутқи йиғин әһлини қаттиқ тәсирләндүрди.

Бу йиғин ахирида бу паалийәткә алаһидә тәклип бойичә кәлгән нахшичи абдуреһим һейт консерт бәрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт