تۈرك دۇنياسىنىڭ كۈلتۈر پايتەختى ئېلان قىلىنغان تۈركىيىنىڭ ئەسكىشەھەر شەھىرىدە رامزان ئېيى باشلانغاندىن بۇيان ئۇيغۇرلار تونۇتۇلماقتا.
9-ئىيۇل كۈنى باشلانغان بۇ پائالىيەتكە ئالاھىدە تەكلىپ بويىچە شائىرە نۈرئەلا گۆكتۈرك خانىم بىلەن شەرقىي تۈركىستان ۋەقپىنىڭ سابىق رەئىسى خەمىت گۆكتۈرك ئەپەندى قاتناشماقتا. بۇ 30 كۈن جەريانىدا ھەر كۈن بىر تۈركىي مىللەت تونۇتۇلىدىغان بولۇپ، ھازىرغىچە قايسى تۈركىي مىللەتلەر تونۇتۇلدى؟ بۇ ھەقتە تەپسىلىي مەلۇمات ئېلىش ئۈچۈن بۇ پائالىيەتكە قاتنىشىۋاتقان خەمىت گۆكتۈرك ئەپەندى بىلەن سۆھبەت ئېلىپ باردۇق. خەمىت گۆكتۈرك ئەپەندى بۇ رامزان پائالىيىتىنى ئەسكىشەھەر ۋالىلىقى بىلەن تۈرك دۇنياسى كۈلتۈر تەشكىلاتىنىڭ ئۇيۇشتۇرغانلىقىنى، ھەر كۈنى دېگۈدەك ئۇيغۇر مەسىلىسىدىن سۆز ئېچىلىۋاتقانلىقىنى ئېيتتى.
2012-يىلى قازاقىستاننىڭ پايتەختى ئاستانە شەھىرى تۈرك دۇنياسىنىڭ كۈلتۈر پايتەختى ئېلان قىلىنغان بولۇپ، 2013-يىلى بولسا تۈركىيىنىڭ ئوتتۇرا رايونىغا جايلاشقان ئەسكىشەھەر تۈرك دۈنياسىنىڭ كۈلتۈر پايتەختى ئېلان قىلىنغان.