"Sherqiy türkistan wexpi" de échilish murasimi ötküzüldi

Ixtiyariy muxbirimiz arslan
2016-05-30
Élxet
Pikir
Share
Print
Merkizi istanbulgha jaylashqan "Sherqiy türkistan wexpi" ning merkizi yéngidin yasash we rémont ishliri tamamlinish munasiwiti bilen ötküzülgen tebriklesh murasimida xatire süret. 2016-Yili 29-may, istanbul.
Merkizi istanbulgha jaylashqan "Sherqiy türkistan wexpi" ning merkizi yéngidin yasash we rémont ishliri tamamlinish munasiwiti bilen ötküzülgen tebriklesh murasimida xatire süret. 2016-Yili 29-may, istanbul.
RFA/Arslan

Merkizi istanbulgha jaylashqan "Sherqiy türkistan wexpi" ning merkizi yéngidin yasash we rémont ishliri tamamlinish munasiwiti bilen échilish murasimi ötküzüldi.

Istanbul fatih rayonigha jaylashqan damat ibrahim pasha jamesi dégen namdiki tarixi orun türkiye jumhuriyiti teripidin "Sherqiy türkistan wexpi"üchün tesis qilin'ghan bolup, bu tarixi orunning alte yildin buyan rémont qilish we yéngidin yasash ishliri dawam qilghan bolup, yéqinda rémont ishliri eslige kélip pütüp chiqqandin kéyin wexpining merkizide échilish murasimi ötküzüldi.

29-May ötküzülgen échilish murasimigha, sherqiy türkistan wexpining idare hey'iti we ezaliri qatnashti. Murasimgha yene, proféssor doktor newzat yalchintash, t r t istanbul mudiri doktor abdulhemit awshar, istanbul uniwérsitéti proféssori mu'ella yüjelxanim, "Sherqiy türkistan ma'arip we hemkarliq jem'iyiti"ning bash naziri abdulhekimxan mexsum hajim qatarliq sherqiy türkistan dewasi üchün xizmet qiliwatqan bir qisim muhim kishiler we ammiwi teshkilatlarning wekilliri teklip bilen qatnashti.

Échilish murasimida, sherqiy türkistan wexpining re'isi eser türkistanli saka, bash katipi doktor ömer qul we dunya Uyghur qurultiyining sabiq re'isi erkin aliptékin qatarliqlar söz qildi.

Yighinda, söz qilghuchilar sherqiy türkistan wexpi merkizining yéngilinishi we yéngidin xizmetke kirishishining Uyghurlar üchün paydiliq ishlargha wesile bolushigha tilekdashliq bildürdi.

Yighinda erkin aliptékin ependi sherqiy türkistan wexpi toghrisida toxtilip mundaq dédi: "Dadam eysa yüsüp aliptékin we büyüklirimizning sherqiy türkistan wexpini qurushining sewebi peqet wetendin kelgenler üchünla emes, belki türkiyediki we pütün chet'ellerdiki sherqiy türksitanliqlar üchün idi. Shuning üchün men silerdin shuni iltimas qilimenki, bu wexipke ige chiqayli, nurghun pidakarliqlar bilen qurulghan bu wexpini dawam qildurush üchün hemmimiz birlikte xizmet ishleyli, buningdin kéyin pütün pa'aliyetlirimizni mushu yerde ötküzeyli, hemminglargha salametlik tileymen."

Yighinda söz qilghan wexpining bash katipi doktor ömer qul, sherqiy türkistan wexpining xizmet pa'aliyetliri toghrisida qisqiche doklat berdi we buningdin kéyin élip barmaqchi bolghan her türlük pa'aliyetlerni wexipning merkizide ötküzidighanliqini bildürdi.

Doktor ömer qul yene, aldimizdiki ramizan éyida her küni kechte wexpning merkizide 30 kün boyiche iptar programmisi ötküzidighanliqini élan qildi.

Axirida türkistan polusi bilen ziyapet bérildi we du'a qilish bilen murasim axirlashti.

Biz bu heqte pikir qarashlirini élish üchün "Sherqiy türkistan wexpi"ning re'isi eser xanim bilen söhbet élip barduq.

Eser xanim sherqiy türkistan wexpining yasilish jeryani toghrisida melumat bérip mundaq dédi: "Hemmimizge melum bolghinidek, sherqiy türkistan wexpining yéngidin yasilish ishliri 2010-yili yawropa ittipaqi komitétining istanbulni medeniyet paytexti dep élan qilishi munasiwiti bilen bizning wexpinimu yéngidin yasash qarar élin'ghan idi. Emma epsuslinarliqi, bir qisim sewebler tüpeyli yasilish jeryani uzap ketti. Shundaq qilip 6 yildin buyan wexpimiz taqilip qalghan idi. Bügün biz nahayiti xushal bolduq, chünki 6 yil jeryanida sirtlarda bir türküm pa'aliyetler qilghan bolsaqmu xizmet ornimiz bolmighanliqi üchün wetendashlirimiz bilen bir yerge jem bolup yighin murasim uyushturush imkani yoq déyerlik idi. Toy-tökün, nezir chiragh, xushalliq we qayghuluq künlerde bir yerge jem bolalmay kelduq, bu bir biz üchün kemchillik idi. Shuning üchün bügün bek xushal bolduq. Xudayim buyrusa buningdin kéyin bashqa sherqiy türksitan teshkilatlar bilen birlikte hemmimiz her türlük pa'aliyetlerni élip bérish üchün qolimizdin kélishiche tirishimiz, ishkimiz hemme kishige ochuq, ziyaretchilerni qarshi alimiz. Bashta dégen'ge oxshash yighin-murasim, toy-tokün, ölüm-yétim, nezir-chiraq, hetta balilar pa'aliyetlirige oxshash her türlük yighinlarni mushu yerde uyushturimiz.

Biz yene échlish murasimigha qatnashqan dunya Uyghur qurultéyining sabiq re'isi erkin aliptékin bilen söhbet élip barduq.

Erkin aliptékin ependi Uyghurlarni, sherqiy türksitan wexpini xizmet-pa'aliyetlerde yéqindin qollap quwwetleshke chaqiriq qildi.

Toluq bet