9 Yashliq Uyghur perzenti “Eng yaxshi shé'ir déklamatsiye qilish médali”gha érishti

Ixtiyariy muxbirimiz erkin tarim
2016-07-25
Share
mirkamil-mujahit-qosh-mukapat-1.jpg Mirkamil qeshqerli ependining oghli kichik mujahit qeshqerli mukapat qobul qilmaqta. 2016-Yili 23-iyul, enqere.
RFA/Erkin Tarim

Enqere sen'et munbiri türkiyede shé'ir déklamatsiye qilip tonulghan mujahit qeshqerlige “Eng yaxshi shé'ir déklamatsiye qilish médali>>, dadisi bilen anisigha “Eng yaxshi ewlad yétishtürgen a'ile médali” berdi.

7-Ayning 23-küni enqerediki paytext oqutquchilar méhmanxanisida ötküzülgen médal tarqitish murasimigha enqere sen'et munbiri re'isi sultan öz'atesh xanim, türkiye ma'arip ministirliqining rehberliri, türkiyening herqaysi jayliridin kelgen sen'etchiler we ezerbeyjandin kelgen sha'irlardin bolup köp sanda kishi ishtirak qildi. Murasimda türk dunyasida edebiyatqa töhpe qoshqan kishilerdin jem'iy 450 kishige médal tarqitildi.

Türkiye we ezerbeyjanning dölet marshi bilen bashlan'ghan mukapat tarqitish murasimining échilish nutqini enqere sen'et munbirining re'isi resim oqutquchisi sultan özatésh xanim qildi. U mundaq dédi: “Yaxshimusiler sen'etkarlar, hemminglar xush kélipsiler. Hörmetlik rehberler, ezerbeyjandin kelgen méhmanlar. Hörmetlik shemsettin küzechi, enqerening mu'awin sheher bashliqi, ammiwi teshkilatlarning mes'ulliri, sha'ir we yazghuchilar, ma'arip ministirliqidin kelgen mudirlirim, mekteplerning rehberliri, kesipdashlirimiz, türk qol hünerwenliri hemminglargha qaytidin xush kélipsiler déyish bilen birlikte, hemminglargha rehmet éytimen. 2001-Yilidin tartip enqere sen'et munbiri bolush süpitimiz bilen xizmet qiliwatimiz. Kéyinki üch yildin béri sen'etke töhpe qoshqan kishilerge médal tarqitiwatimiz. Bügün 3-qétimliqini ötküzüp olturuptimiz. Bügün biz médal béridighan kishiler arisida, ezerbeyjanda tonulghan sha'ir qalibe jeferowa xanim, türkmen yazghuchi shemsettin kuzechi we qabiyetlik Uyghur perzenti kichik mujahit qeshqerlimu bar. Hemminglargha bundin kéyin téximu köp muweppeqiyet tileymen.”

Médal tarqitish murasimi axirlashqandin kéyin mikrofonimizni enqere sen'et munbiri re'isi sultan özatesh xanim bilen müjahit qeshqerlining dadisi mirkamil qeshqerli ependige uzattuq.

Sultan özatesh xanim médal tarqitish murasimi toghrisida toxtilip mundaq dédi: “Türk dunyasida edebiyatqa töhpe qoshqan kishilerge mukapat berduq. Jem'iy 450 kishige médal berduq. Müjahit qeshqerli edebiyat dunyasida yaxshi shé'ir déklamatsiye qilip, sherqiy türkistanning awazi bolghanliqi üchün biz uni bu yilning shé'ir déklamatsiye qilish chémpiyoni dep talliduq.”

U, enqere sen'et munbiri bolush süpiti bilen türkiye bilen ezerbeyjandin 400 sha'irning shé'irigha orun bérilgen bir kitab teyyarlighanliqini, kéyinche Uyghur shé'irliri toghrisidimu kitab neshr qilduridighanliqini bayan qilip mundaq dédi: “Biz qatari boyiche shé'ir kitabi chiqiriwatimiz. Ezerbeyjan-türkiye sha'irliri kitabimiz chiqti. Türkiye-kerkük shé'ir kitabini hazirlawatimiz, 200-betke kelduq. Kéyin sherqiy türkistan we türkiye shé'ir kitabini chiqirimiz. Türk dunyasi jem'iy 5 shé'ir kitabi chiqarmaqchimiz.”

Mirkamil qeshqerli ependi oghli bilen a'ilisige enqere sen'et munbirining türk dunyasigha qoshqan töhpisi üchün médal bergenliki, oghli müjahit qeshqerlining 6 yildin béri köp sanda médal alghanliqini, köp qétim shé'ir oqup Uyghurlarni tonutiwatqanliqini bayan qildi. We 9 yashliq mujahitning chong hejimlik 15 shé'irni yadqa bilidighanliqini tekitlidi.

Mirkamil qeshqerli ependining 6 perzenti bar bolup, 5-balisi müjahit türkiyening istanbul shehiride tughulghan. U, 2010-yili 9-ayda enqerening etimesghut rayonida ötküzülgen türk dunyasi sen'et bayrimida shé'ir déklamatsiye qilip, kishilerning diqqitini jelp qilghan idi. 6 Yildin béri köp qétim yighinlarda, féstiwallarda we téléwiziyide shé'ir déklamatsiye qilip tonuldi.

Istanbuldiki “Sherqiy türkistan wexpi”ning sabiq re'isi hamutxan kökturk muhajit qeshqerlining netijilirige yuqiri baha berdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet