“Uyghur-hon dostluq jem'iyiti” budapéshtta “Uyghur medeniyet heptiliki” ötküzüshni qarar qildi

Wén'giriye paytexti budapéshtta 1-öktebir küni échilghan “Uyghur-hon dostluq jem'iyiti” ning yighinidin körünüsh.

“Uyghur-hon dostluq jem'iyiti” kéler yili budapéshtta “Uyghur medeniyet heptiliki” ötküzüshni qarar qildi.

2017-Yili öktebirning 1-küni qurulghan “Uyghur-hon dostluq jem'iyiti” ning bash katipi ümid agahi, mezkur jem'iyetning 15-öktebirdiki tunji qétimliq ijra'iye komitét yighinidin yuqiriqi xushxewerni yetküzdi.

“Uyghur-hon dostluq jem'iyiti” ning töt sa'etlik jiddiy yighinida Uyghurlarning bügünki paji'elik halitini wén'giriye xelqige chüshendürüsh, jama'et pikrining bésimi arqiliq hökümetke we yawropa ittipaqigha tesir körsitish, Uyghur medeniyitini wén'giriye xelqige tonushturush, wén'gir-Uyghur dostluqini kücheytish dégendek zörür témilarda muzakire bolghan.

Ümid agahi ependi mezkur jem'iyetning kéler yilliq pilanliri heqqide toxtilip ötti.

“Hon-Uyghur dostluq jem'iyiti” ijra'iye komitéti 11 kishidin teshkil tapqan bolup, Uyghurlardin ümid agahi, perhat yurungqash we qurban weli ependi, wén'girlardin yanush horkowich, wukis ferens ependi we annamariye xanim qatarliqlardin ibaret iken.

Jem'iyetning qurulushigha türtke bolghuchilarning biri, yeni mezkur jem'iyetning re'isi, Uyghurlarning qedinas dosti yanush horkowich ependi ziyaritimizni qobul qilip, aldi bilen pütün dunyadiki Uyghurlargha salam yollidi. Andin bundaq bir teshkilat arqiliq ikki milletning medeniyet almashturushining küchiyidighanliqini, Uyghurlarning wén'giriyede öz medeniyitini qoghdash hoquqigha érisheleydighanliqini, buning éziliwatqan Uyghurlargha bir ümid béridighanliqini tekitlidi.

“Uyghur-hon dostluq jem'iyiti” ning katipi doktor annamariye xanim mezkur jem'iyetning türtkiside Uyghur we hon yashlirining chüshinishi emelge éship, tarixi qérindashliqning tirilishige bolghan ümidlirini otturigha qoydi. Uningche bügünki Uyghurlarning yawropadiki qérindishini tépiwélishi emeliy ehmiyetke ige iken. U öz tarixini ruslarning burmilishi bilen yétishken wén'girlar we tarixini xitay özgertiwetken Uyghur yashlirining mezkur teshkilatning pa'aliyetliri arqiliq eslini tépiwélishidin ümidwar iken.

“Uyghur-hon dostluq jem'iyiti” ge asas salghuchilardin biri bolghan perhat yurungqash ependi jem'iyetning arqa körünüshi heqqide chüshenche berdi. U wén'giriyede gerche Uyghurlar medeniyet jehette özini namayan qilish pursitige hemmidin köp érishiwatqan bolsimu, birer teshkilat bolmighanliqi seweblik nurghun qolaysizliqlargha duch kelgenlikini, barghanche éghirlishiwatqan Uyghur weziyitining teqezzasi seweblik wén'girlarning yardimide bu jem'iyetning qurulghanliqini bayan qildi.

Perhat yurungqash ependining qarishiche Uyghur dawasi türkiye we wén'giriyede ammiwi asasqa ige iken, Uyghurlarni öz bilidighan mundaq eller Uyghur medeniyitining tonulushigha her zaman imkaniyetlik iken. Wén'giriye yawropa ittipaqidiki orni seweblikmu Uyghur dawasi üchün muhim ehmiyetke ige iken. Honlar wén'giriyedin bashqa yene yawropadiki ruminiye, silowakiyede bir qeder köp bolghachqa Uyghur-hon dostluqining küchiyishi Uyghur medeniyitining yawropada teshwiq qilinishi üchün paydiliq iken.

Igilishimizche, Uyghur pa'aliyetchiler 2005-yildin bashlap wén'giriyede Uyghurlarni tonushturushqa we Uyghur medeniyitini körek qilishqa meshghul iken. “Dunya honlar qurultiyi” mu Uyghurlargha da'im orun bérip kelmektiken. Hon tetqiqatchilar we Uyghursöyer honlarning yutyub qanallirida tarqitiwatqan Uyghurlargha a'it in'glizche melumatlar dunya jama'itining Uyghurlarni chüshinishide muhim rol oynawatqanliqi melum. Bu qétim Uyghur-hon dostluq jem'iyitining qurulushi bundaq pa'aliyetlerning téximu sistémiliq, pilanliq we ünümlük bolushigha kapaletlik qilidiken.