“Sherqiy türkistan musulmanliri” dégen namda zhurnal neshr qilindi

Ixtiyariy muxbirimiz arslan
2016.06.23
Share on WhatsApp
Share on WhatsApp
sherqiy-turkistan-musulmanliri-kitab.jpg “Sherqiy türkistan musulmanliri” namdiki zhurnalning muqawisi.
RFA/Arslan

“Sherqiy türkistan musulmanliri” dégen namdiki yérim yilliq ilmiy, siyasiy, tarixiy, edebiy zhanirdiki uniwérsal zhurnalning tunji sani 2016-yili 6-ayda istanbulda neshr qilindi.

“Sherqiy türkistan musulmanliri” namidiki zhurnalning kirish sözide mundaq déyilgen: “‛sherqiy türkistan musulmanliri‚ zhurnili muhajirettiki Uyghur qérindashlargha qizghin salam yollaydu. Zhurnilimizning sehipisi nahayiti keng bolup, zhurnilimizda sherqiy türkistan we Uyghurlargha biwasite munasiwetlik tarixiy, ilmiy, siyasiy, edebiy eserler neshr qilin'ghanning sirtida, sherqiy türkistan we Uyghurlargha biwasite munasiwetlik bolmisimu, biz bilishke we xewerdar bolushqa tégishlik dep qaralghan ilmiy we edebiy eserler shuningdek muhajirette ötken péshqedemlirimizning yézip qaldurghan tarixiy eslimiliri, edebiy eserliri neshr qilinidu. Zhurnilimiz muhajirettiki Uyghur qérindashlirimiz we yash ewladlirimizgha sherqiy türkistan we Uyghurlar heqqide hemde Uyghur tarixiy, Uyghur edebiyati, islam edebiyati heqqide azraq uchur we chüshenche bérelise, bizning asasiy meqsitimiz ishqa ashqan bolidu.”

160 Betlik bu zhurnalni teklimakan Uyghur neshriyatining mudiri abdujélil neshrge teyyarlidi. Biz bu zhurnal toghrisida toluq melumatqa ige bolush üchün bu zhurnalning bash muherriri we neshrge teyyarlighuchi abdujélil turan ependi bilen söhbet élip barduq.

“Sherqiy türkistan musulmanliri” namidiki zhurnalning tunji sani kirish sözdin bashqa ramizan éyi tebriknamisi, mirkamil qeshqerining “Ellame muhemmed iqbalning sherqiy türkistan'gha bolghan qarishi we pakistan siyasetchilirining xiyaniti”, dégen témidiki maqalisi, munewwer öz Uyghur xanim neshrge teyyarlighan, “Iman we muhebbetke tolghan bir hékaye”, dégen romanning ariye terjimisi, proféssor doktor bedri genjerning “Insanning jennettin ikkinchi qétim chüshishi” dégen maqalisi, kommunar talipning “Muhemmet'imin bughraning hayati we pa'aliyiti” dégen maqalisi, sewdayining “Qan ichidiki bowaq” témidiki powésti. Méxa'il drompning “Türkler teripidin teyinlen'gen junggo xaqanliri” dégen maqalisi, hesen hüseyin adali'oghlining “Siyasetname kitabi-qutadghu bilik” dégen témidiki maqalisini öz ichige alidu.

Biz yene bu zhurnal toghrisida pikir-qarashlirini élish üchün zhurnalni oqup chiqqan Uyghur ziyaliy memettursun Uyghur ependi bilen söhbet élip barduq.

Memettursun Uyghur ependi “Sherqiy türkistan musulmanliri” dégen zhurnalning neshr qilinishi Uyghurlar üchün siyasiy, ilmiy, tarixiy we edebiy jehetlerde qimmetlik ehmiyetke ige ikenlikini ipadilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.