Yaponiye bext partiyisining yighilishida Uyghur mesilisi anglitildi

2-Ayning 16-küni yaponiyining köchi ölkisidiki yaponiye bext partiyisining yighilishida Uyghur mesilisi anglitilghan. Yaponiye bext partiyisi köchi ölkisidiki shöbisining alahide teklipi bilen dunya Uyghur qurultiyining mu'awin re'isi ilham mexmut Uyghur mesilisi toghrisida mexsus doklat bergen.

Yaponiye bext partiyisi yaponiyidiki budda dini eqidisi, wetenperwerliki bir qeder küchlük bolghan siyasiy diniy teshkilat. Bu teshkilat uzundin béri yaponiyide élip bériliwatqan Uyghur kishilik hoquq pa'aliyitige yéqindin köngül bölüp kéliwatqan teshkilat. Bu qétimqi köchi ölkisidiki bext partiyisining yighilishigha köchi ölkisining her qaysi wilayet, nahiyiliridiki ezaliridin köpligen kishiler qatnashqan.

Bu pa'aliyette yéqindin buyanqi yaponiye, xitay arisidiki munasiwetler üstide mulahiziler yürgüzülüsh bilen birge, xitay hökümitining üzlüksiz élip bériwatqan yaponiye arallirigha bolghan tajawuzchiliq herikiti tenqid qilin'ghan.

Bu yighilishta dunya Uyghur qurultiyining mu'awin re'isi ilham mexmut Uyghurlarning xitay ishghaliyitige qandaq uchrighanliqini tarixiy pakitlar arqiliq körsitish bilen birge, yaponiye hökümiti, xelqi xitayning mustemlikisi bolghan Uyghur, tibet, mongghullarning musteqilliq heriketlirige küchlük yardem bergendila, xitayning herbiy küchi ajizliship, öz etrapidiki yaponiyige oxshash döletlerge bolghan tajawuzchiliq herikitining aldini alghili bolidighanliqini, eksiche bolghanda yaponiyiningmu oxshashla Uyghur, tibet, mongghullardek xitayning mustemlikisige aylinip qilish éhtimalliqining yuqiriliqini eskertip ötken.

Biz mezkur yighilish heqqide toluq melumat élish üchün dunya Uyghur qurultiyining mu'awin re'isi ilham mexmut bilen téléfon söhbiti élip barduq.

Tepsilatini awaz ulinishidin anglighaysiler.