"шәрқий түркистан командиси" голландийәдики путбол һәвәскарлириниң йиллиқ мусабиқисигә қатнашти

Ихтиярий мухбиримиз пидаий
2016-05-26
Share
 Sherqiy-Turkistan-Putbul-komandisi-ezaliridin-bir-qismi-xatire-surette.jpg "шәрқий түркистан путбол командиси" әзалиридин бир қисми хатирә сүрәттә. 2016-Йили май.
RFA/Pidaiy

2016‏-Йили 22‏-май голландийәниң әйндһофин шәһиридики бир тәнтәрбийә кулубида өткүзүлгән путбол һәвәскарлириниң йиллиқ мусабиқисигә уйғурларму қатнашти.

Бу паалийәтни миллий гөрүш тәшкилати тәрипидин қурулған һилал спорт кулуби орунлаштурған болуп, мәзкур паалийәткә голландийәдики мусулман яшларниң командилири қатарида уйғурларму қатнашти.

Миллий гөрүш тәшкилати тәрипидин түрк яшлириниң путбол саһәсини қериндашлиқ билән бирләштүргән һилал спорт кулубиниң идарә ишлири мәсули әрдан уйғун әпәнди мундақ деди: "исмим әрдан уйғун. Һилал спорт кулубиниң башлиқимән. Һилал спорт 1986‏-йили қурулған. 29 Йилдин бери мусабиқә уюштуруп келиватимиз. 3 Йилдин бири түркистанлиқ қериндашлиримиз билән йеқиндин арилишиватимиз. Билишимчә, улар интайин яхши қериндашлиримиздур. Җәсур инсанлардур. Әң яқтуридиған гуруппилиримиздиндур. Бу йил мусабиқимизгә икки гуруппа болуп қетилди. Шәрқий түркистанлиқ қериндашлиримизни һәр вақит қарши алимиз. Бу йәрдики имканлардин бәһримән болмақни халиса, ишикимиз даим очуқ."

Бу паалийәткә қатнашқан уйғурлар "шәрқий түркистан путбол командиси1" вә "шәрқий түркистан путбол командиси2" дегән намда икки гуруппа болуп қетилған болуп, бу командини голландийә вә белгийәдики уйғурлар бирлишип қуруп чиққан.

Голландийә вә белгийәдики путбол һәвәскарлириниң достлуқ мусабиқилири бир қанчә йиллардин ғәлибилик давам қилип, өз-ара мусабиқә паалийәтлири уюштуруп кәлгән иди. Бу қетим "шәрқий түркистан путбол командиси" ниң қурулуши, илгирики районни тәмсил қилип өз-ара риқабәтлишиштин, дөләтни тәмсил қилип, қериндаш милләтләр билән риқабәтлишиштәк йүксилишни ипадилимәктә.

"шәрқий түркистан путбол командиси" ниң актип әзаси, путболчи абләтҗан әпәнди йүрәк сөзлирини баян қилди. Униң ейтишичә: бу командидики путбол сөйәр қериндашлар арисида, йеқин кәлгүсидә явропадики вәтәндашлар арисида бир мусабиқә паалийити тәшкилләш тоғрилиқ пиланлар болмақта.

Белгийә уйғур бирлики тәшкилатиниң сабиқ рәиси, икки дөләттә яшаватқан уйғурларниң иттипақлиқи үчүн бәлгилик рол ойнаватқан актип паалийәтчи абдулмутәллип әпәнди, "шәрқий түркистан путбол командиси" ниң йәнә бир яш әзаси. Голландийәдики мәсулийәтчан яшларниң үлгиси, актип паалийәтчи, путбол сөйәр илшат ислам әпәнди, белгийәдин кәлгән путболчи яшларниң вәкили, тамашибинларға вакалитән зияритимизни қобул қилған садиқҗан сәләй әпәнди қатарлиқларму өз һес-туйғулирини радио аңлиғучилиримиз билән ортақлашти.

Иштиракчиларниң нәзиридә, гәрчә уйғурларниң бу икки командиси командилар ара нәтиҗигә еришәлмигән болсиму, уларниң путбол саһәсидә шәрқий түркистан путбол командиси нами билән орун елиши кичик нәтиҗә әмәскән. Йәнә бири белгийә вә голландийәдики уйғурларниң илгирики өз-ара мусабиқилишиштин, һәмкарлишип бир сәп болушиму алаһидә бир нәтиҗә икән.

Қериндаш милләтләрдин уйғурлар билән риқабәтләшкән қарши командидики бир түрк яш зияритимизни қобул қилип: "мениң исим йүсүп өз түрк. Белгийәдин кәлдим. Алди билән шәрқий түркистанға салам йоллаймән. Аллаһ яр вә ярдәмчи болсун! валлаһий туйғумиз гүзәл. Уларни бу йәрдә көрмәк бизләрни техиму бәхткә чөмдүрди. Аллаһ халиса, у йәрдики инсанларму һөрлүккә еришкүси. Асан әмәс, әмма әң қисқа бир заманда у зулум йоқалғуси" деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт