Уйғур потболчиларниң шан шәрәпкә еришиши тәс, шәрәпни сақлиши техиму тәс

Мухбиримиз гүлчеһрә
2013-08-13
Share
uyghur-putbol-doletlik-musabiqe-305.jpg Үрүмчидики тәнтәрбийә мәркизи путбол мәйданида мусабиқә көрүватқан путбол һәвәскарлири. 2012-Йили 12-май, үрүмчи.
www.tianjinwe.com

Йеқинда үрүмчи шәһәрлик - 5 башланғуч мәктәп путбол командиси хитай мәмликәтлик өсмүрләр путбол мусабиқисиниң чемпийонлуқини қолға кәлтүрүп, арқидинла йәнә дунядики 10 чоң тәсир күчкә игә өсмүрләр путбол мусабиқисиниң бири болған "үмид лоңқиси" өсмүрләр хәлқара путбол мусабиқисиниң - 4 нөвәтлик чемпийонлуқ таҗисини кийди.

Бу кичик әзимәтләрниң қолға кәлтүргән нәтиҗиси уйғур путболчилиқиниң сеһрий күчини дуняға намаян қилип, уйғур елиниң ичи вә сиртидики барлиқ уйғурлар вә путбол һәвәскарлириниң уйғур путболчилиқиға болған үмид учқунини ялқунға айландурмақта, шуниң билән бир вақитта, чәтәлләрдә яшаватқан бәзи путболчилар, путбол һәвәскарлири шан шәрәп арқисиға йошурунған уйғур путболчилиқиниң кәлгүси тәрәққиятиға қара көләңгә ташлап турған кәсиплишиш вә мунтизм иқтисадтин ибарәт рәһимсиз риални мәсилиләр һәққидә мулаһизә йүргүзмәктә, бу һәқтә мухбиримиз гүлчеһрә тәйярлиған мәлумат диққитиңларда болсун.

Һәммиси уйғур өсмүр балилардин тәшкилләнгән үрүмчи шәһәрлик 5 - башланғуч мәктәп командисидики әзимәтләр ярмуһәммәт мәхсут, исһақҗан аблиз, елиҗан ясин қатарлиқ көйүмчан тиренерлириниң йетәкчиликидә - 15 июлдин 18 - июлғичә бейҗиңда өткүзүлгән хитай мәмликәтлик мәктәп путболи чемпийонлуқ лоңқисиниң чемпийонлуқини қолға кәлтүргәндин кейин - 21 - июлдин 25 - июлғичә вейфаңда өткүзүлгән 4 - нөвәтлик "үмид лоңқиси" өсмүрләр хәлқара путбол тәклип мусабиқисидиму чемпйонлуқни қочуп, путболға ашиқ уйғур хәлқини, ата - анилар вә устазларни чәксиз иптихарлиққа чөмдүрди.

Путбол һәвәскарлириниң радиомизға йәткүзгән сүрәтлик учурлиридин мәлум болушичә, путбол умиди болған бу кичик әзимәтләр30 - июл зәпәр қочуп юртиға қайтип кәлгинидә, ана мәктипи үрүмчи шәһәрлик - 5 башланғуч мәктәп алдида уларни қочақ - қучақ гүлләрни, совғатларни көтүргән ата - ана вә путбол һәвәскарлири болуп 100дин артуқ адәм қизғин алқишлар ичидә күтүвалған.

Уйғур путболчилиқиниң сеһри күчини намаян қилған үрүмчи шәһәрлик 5 - башланғуч мәктәп командиси мәмликәтлик мусабиқидә 6 мәйдан мусабиқиниң һәммисидә ғәлибә қилип нурғун рәқип камандиларға он нәччидин топ уруп җәмий 71 топ киргүзгән. Хәлқаралиқ мусабиқә болған үмид лоңқиси өсмүрләр путбол мусабиқиси җәрянида кичик әзимәтләр җәмий йәттә мәйдан мусабиқә ойнап һәмдә һәммә мәйданда утуп, җәмий 43 топ киргүзүп үч топ кәткүзүп, чемпийонлуқ орнини сақлап қалған. Җуңго радио ториниң бу һәқтики хәвиридә "һәммидин бәкрәк кишиниң қайиллиқини қозғиғини шу болдики, үрүмчи шәһәрлик 5 - башланғуч мәктәп командиси нурғун топ мәстанилири әндишә қилған, әмәлий күчи күчлүк дәп қаралған корийәниң икки командисини вә японийәниң бир командисини асанла мәғлуп қилип нурғун кишиләрни һәйран қалдурди. Улар бу икки дөләтниң үч командиси билән болған мусабиқидә җәмий 16 топ киргүзүп, чәт әлликләрниң "җуңго командиси японийә, корейә командилиридин қорқиду" дегән қалпиқини чөривәтти" дәп язған.

Үрүмчи шәһәрлик 5 башланғуч мәктәп командисиниң ғәлибиси һәммини қайил қилған болғачқа, хитайдики "хәлқ" тори, "сина", "соху", "ваң йи" қатарлиқ нопузлуқ тор бекәтлири баш мақалә, хәвәрләр елан қилип "қалтис! шинҗаңдин кәлгән бир башланғуч мәктәп командиси корийә, японийәниң командилириға 16 топ киргүзүп ғәлибә қилди. Мана булар җуңго потболчилиқиниң һәқиқий үмиди!" дәп тәрипләшкән, уларниң ғәлибисигә апирин ейтқан нурғун тордашлар: "шинҗаңлиқ кичик әзимәтләрниң алдида корийә, японийә командилири немити?!" дегән хитаб арқилиқ, шинҗаң путболчилиқидин иптихарлинидиғанлиқини билдүрүшкән.

Үрүмчи шәһәрлик 5 - башланғуч мәктәп командисниң тиренери исһақҗан аблиз башланғуч мәктәп гурупписи бойичә мунәввәр тиренер болуп баһаланди. Бу командидики дилшат камил җәмий 30 топ киргүзүп "алтун кәш" мукапатиға, алимҗан әли 25 топ киргүзүп "күмүш кәш" мукапатиға, қәшқәр шәһәрлик 14 - оттура мәктәп шөбә башланғуч мәктәп командисидики ибраһим қурбан 22 топ киргүзүп "мис кәш" мукапатиға еришти. Әң мунәввәр маһир мукапати һесаблинидиған "алтун топ" мукапатиға ибраһим қурбан, "күмүш топ" мукапатиға алимҗан әли еришти. "алтун пәләй" мукапатиға үрүмчи шәһәрлик 5 - башланғуч мәктәп командисидики субат әли наил болди. Демәк, бу нөвәтлик мусабиқидики асаслиқ мукапатларниң һәммисини уйғур әзимәтләр алди.

Үрүмчи шәһәрлик 5 - башланғуч мәктәп командиси зәпәр қучуп қайтип кәлгәндин кейин, уйғур елидики һәр саһә кишилириниң алқишиға сазавәр болған, үрүмчи шәһәрлик маарип идариси вә тәңритағ районлуқ партком, хәлқ һөкүмити айрим - айрим 150 миң йүәнгә йеқин нәқ пул билән бу командини мукапатлиған.

Гәрчә бу, уйғур путбол тарихидики тунҗи ғәлибә болмисиму, әмма өсмүр камандиларниң яратқан әң шәрәплик ғәлибиси дейишкә болиду, кичик әзимәтләрниң қочқан ғәлибилири чәтәлләрдики уйғур путбол һәвәскарлириниму һаяҗанға салди, голландийидин зияритимизни қобул қилған абдусалам әпәнди, торлардин мәзкур хош хәвәрни аңлап бәкму суюнгәнликини, уйғур потболчилиқиниң нурғун җәбирләрни чәккән болсиму, йәнила қийинчилиқларни йеңип һечқачан йеңилмәй, уйғурларға зор мәдәт елип келиватқанлиқидин пәхрлинидиғанлиқини вә кичик әзимәтләрниң кәлгүсигә умид билән қарайдиғанлиқини билдүрди.

Уйғур путболчилиқ тарихиға нәзәр салсақ, уйғур ели ичидила әмәс, мәмликәтлик мусабиқиләрдиму нурғун қетим шан шәрәп қучқанлиқини көрәләймиз,болупму һәр қайси дәриҗилик мубасиқиләрдики нәтиҗиләрни селиштурғанда өсмүр балиларниң һәр йилдики мәмликәтлик мусабиқиләрдики ипадисиниң алаһидә үстүн болуп келиватқанлиқи мәлум. Әмма, оттура мәктәп вә алий мәктәп вә башқа кәспи камандиларниң нәтиҗилири өсмүрләр мусабиқисидәк көрүнәрлик әмәс. Буниң сәвәблири һәққидә тохталған узун йил уйғур елида командиларда топ тәпкән, нөвәттә голландийидә яшаватқан уйғур топчилардин абләт, илгири мәмликәт вә хәлқара сәһниләрдә чақниған кичик путбол маһирлириниң ана мәктипидин, тонуш командисидин, тонуш тиренеридин айрилғандин кейин, өзи вә башқа нурғун уйғур топчиларға охшаш кәлгүси қараңғулуқ вә теңирқаш илкигә чүшүп қалидиғанлиқи, бу кичик путболчиларниң кәлгүсиниңму охшаш болуп қелишидин әндишә қиливатқанлиқини баян қилди.

Тернерларниң қаришичә, бу өсмүрләрниң ичидин техникиси, бәдән шараити яхшилирини таллап мәмликәт ичи, һәтта чәтәлдики путбол мәктәплиригә, кулублириға йоллап тәрбийәлигәндә, андин уларниң истиқбалиға толуқ капаләтлик қилғили болидикән. Һазир командида тәләпкә тошидиған балидин йәттә - сәккизи бар болуп, шараит, пурсәт яр бәрсә, буларниң кәспий путболчиға айлиниш еһтималлиқиму юқири икән.

Буниңдин пәқәт аммиви асас вә қизиқиш биләнла уйғур путболчилиқини мәмликәт вә дуняға йүзләндүрүшниң толиму мүшкүл икәнликини көрәләймиз. Уйғур путболчилиқи әмәлийәттә иқтисадтинму бәкрәк ерқчилиқ, айримичилиқтин халий, баравәр, адил муамилә, етрап қилиш вә қоллашқа муһтаҗ.

Сахавәтчи путбол ашиқи йүсүп имин һаҗи "путболчилар җәмийити лоңқиси", "төт шәһәр путбол мусабиқиси" дегәндәк мусабиқиларни уюштурғандин сирит йәнә, үрүмчи шәһәрлик 5 - башланғуч мәктәпниң тәнтәрбийә ишлириниму изчил қоллап келиватқан мәрипәтпәрвәрләрдин. Игилишимизчә, у йәнә һөкүмәт давамлиқ қоллап бәрсә, хәлқара өсмүрләр путбол мусабиқисиму өткүзүшкә қурби йетидиғанлиқини ейтқан.

Путбол хумар уйғурлар гәрчә хәлқаралиқ, мәмликәтлик мусабиқиларни мәйдандин көрүш пурситигә еришәлмисиму, юсуп имингә охшаш сахавәтчилири тәрипидин өз диярида мусабиқиларни өткүзүп туриду, йүсүп имин һаҗи "шинҗаң путбол мәстанилири җәмийити" намида өткүзидиған "2013 - йиллиқ шинҗаң путболчилар җәмийити лоңқиси" мусабиқиси бүгүн 8 - айниң13 - күни башланди. Көпчиликниң есидә болуши мумкин: 1998 - йили өткүзүлгән"путболчилар җәмийити лоңқиси" путбол мусабиқисиниму дәл мушу "путбол ашиқи" уюштурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт