Ataqliq ressam sabitjan babajanof: “Öz xelqim we wetinimni eserlirimde janlandurdum”

Qirghizistan jumhuriyitining Uyghur ressami sabitjan babajanof özining resim körgezmiside qirghiz yazghuchi chinggiz aytmatofning oghli bilen. 2018-Yili may.

20-Esirning 60-yilliri Uyghur diyaridin ayrilghan minglighan Uyghurlar qirghizistan'gha kélip orunliship, bu döletning sadiq puqraliridin bolup qaldi, ular arisidiki yüzligen Uyghurlar aliy derijidiki unwanlargha ériship, hökümet teqdirnamiliri bilen mukapatlandi. Ularning biri sabitjan babajanofdur. U qirghizistan jumhuriyitining emgek singdürgen ressami bolup, yéqinda u öz körgezmisini achti.

Mezkur körgezme ataqliq qirghiz yazghuchi chinggiz aytmatofning 90 yilliqigha béghishlinip 7-maydin 31-mayghiche dawam qilidu. Körgezmide 95 parchidin artuq resim tamashibinlarning huzurigha sunuldi. Ressamning eserliride wetenperwerlik rohi pelsepiwi menilerdin körsitilgen.

Sabitjan babajanofning déyishiche, u yazghuchining wetenperwerlikidin ilham élip öz eserliride ana-weten'ge bolghan söygülirini, hesrette ötken hés-tuyghulirini ipadiligen.

Sabitjan babajanof her yili öz körgezmilirini uyushturup, yash-ösmürlerni edep-exlaqqa chaqiridu, chünki uning her bir resimi-chongqur menige ige. Mezkur körgezme chininggiz aytmatofning ijadiyitige béghishlan'ghan bolsimu, emma Uyghur ösmürlerni wetenperwerlik rohida terbiyelesh, Uyghur milli-kimlikini saqlap qélishida muhim rol oynaydu. Bu heqte nowopokrowka mektipining mudiri peride nizamidinowa öz pikirlirini izhar qildi.
Qirghiz xelqining dunya boyiche meshhur yazghuchisi chinggiz aytmatofning eserlini tesewwur qilish hökümet tereptin Uyghur ressamgha tapshurulghanliqi sabitjan babajanofning mahirliqi, méhnetkesh we bilimlikini körsitidu. Chinggiz aytmatof tughulghan shéker yézisidiki muzéygha sabitjan babajanof rehberlik qilidiken.

Néwrologiye ilmining proféssori numuhemmet babajanof Uyghurlarning meniwi bayliqi heqqide toxtilip, yash-ösmürlerni ilimperwerlikke chaqirdi.

Qirghizistan-xitay munasiwetliri axirqi yilliri téximu küchiyip barmaqta. Bu weziyette Uyghurlarning bezi bir pa'aliyetliri cheklinishlerge uchrimaqta. Bundaq shara'itta sabitjan babajanofning körgezmisi qirghizistan Uyghurlirining sadiq wetendashlar ikenlikini, qirghizistanni öz wetinidek söyidighanliqini, shundaqla qirghizistanning rawajlinishi üchün tirishiwatqanliqini körsetti.

Qirghizistan ressamlar uyushmisining mudiri talaybék usubaliyéf öz nutqida sabitjan babajanofnin ijadiyitini yuqiri bahalap, uninggha “Qirghizistan xelq ressami ” unwanini bérishni ressamlar uyushmisi tewsiye qilidighanliqini izhar qildi.

Körgezmini ziyaret qilghan sen'et söyerler sabitjan babajanofning ijadiyitige yuqiri bahalarni bérip, bu körgezmining xelq'ara derijide uyushturulghanliqini bildürüshti.

Mezkur körgezmide uning “Meshhurlarning séymasi” dep atalghan resimlik kitabchisi tamashibinlargha sunuldi. Bu kitabta Uyghur meshhurlirining resimliri alahide salmaqni igileydu.Ularning ichidiki yüsüp xas hajip, mexmut qeshqiri, elishir nawayi, lutpulla mutellip, exmetjan qasimi, sadir palwan qatarliqlarning süretliri körürmenlerni jelp qilidu.

Körgezmini yene qazaqistan, rusiye, iran we bashqa döletlerdin kelgen sen'et söyerler ziyaret qilishti.

Sabitjan kamal oghli babajanof 2016-yili moskwa shehiride ötküzülgen xelq'araliq körgezmige qatnashqan we rus xelqige Uyghur dewasini medeniyet arqiliq tonushturghan idi.

Sabitjan ependi qirghizistan Uyghurlirining sen'et wekili bolup, u, Uyghur xelqining medeniyet bayliqi we edep-exlaq en'enisini ilgiri sürüshke qoshqan töhpiliri üchün qirghizistan Uyghurliri “Ittipaq” jem'iyiti teripidin “Éhsan” médali we bir nechche teqdirnamiliri bilen mukapatlan'ghan idi.