Ғәрб дунясида уйғур режиссорлуқ қилған тунҗи кино яхши инкас яратти

Мухбиримиз гүлчеһрә
2017-03-27
Share
abduraxman-ozturk-rezhissor.jpg Яш уйғур режиссор абдурахман уйғур өзтүрк.
Social Media

Түркийә кино обзорчилиқи торида мәзкур кино һәққидә йезилған обзорда, көрүрмәнләрниң көз яшлирини сүртүшкә чоқум йенида яғлиқ еливелишни унтумаслиқини тәвсийә қилишидин, ғәрб дунясида тунҗи қетим бир уйғур тәрипидин чәтәлдә ишләнгән мәзкур кинониң, мувәппәқийәт қазанғанлиқини җәзмләш тәс әмәс, қени ундақта «ақ кит» ни көргән тамашибинлар бу киноға қандақ баһалар бериду, мәзкур кинони ишләп тарқитишқа 3 йилдин артуқ әҗир қилған, режиссор абдурахман уйғур өзтүрк, кинониң рәсмий қоюлушқа башлиши билән күткән мәқсәтлиригә йәттиму?

Түркийәдә, түрк хәлқиниң һаяти һәққидә, түрк тилида, әмма бир уйғур режиссор тәрипидин ишләнгән кино «ақ кит», 24-март ахири киноханиларға кирди, мәзкур кино техи қоюлмай турупла, түркийә шундақла чәтәлләрдики уйғурлар арисида қизиқиш қозғиған иди вә филимни уни көрүшкә тәқәзза иди. Түрк мәтбуатлири вә иҗтимаий таратқуларда мәзкур кино тамашибинлар билән йүз көрүшкәндин кейин, бәлгилик яхши тәсир пәйда қилғанлиқи мәлум. «Бәяз балина»‏ - «ақ кит» моби дикниң җәлп қиларлиқ һекайисигә мәһлия болған 2 өсмүрниң, болупму һәр иккиси башқа-башқа дуня һесаблинидиған, бирақ шундақтиму иккисини бир-биригә бағлиған катта бир достлуқниң һекайисини җанландуруп бериду.

Бу кино нөвәттә түркийәдики чоң ‏-кичик 35 шәһәр киноханисида қоюлуватқан болуп, йәнә 2, 3 һәптә қоюлидикән. Алди билән бу кино абдурахман уйғур өзтүрктәк бир яш уйғур режиссор тәрипидин ишләнгән кино болғини үчөн, түркийәдә яшаватқан вә оқуватқан уйғурлар қизғинлиқ билән көргән. Истанбулда бу кинони икки нөвәт тамаша қилған бир уйғур оқуғучи қиз, кинониң сенарийиси, вәқәлики, сүрәткә елиниш, кириштүрүш вә музикилириниңму интайин юқири сәвийидә икәнликини, естетик вә мәниви зоқ алғанлиқини, муһими бир уйғур режиссор тәрипидин ишләнгән кино болғини үчүн өзиниң бу филимни иптихарлиқ ичидә тамаша қилғанлиқини һаяҗан ичидә баян қилди.

Түркийәниң дөләтлик учур васитиси болған түркийә авази радийоси уйғур яш режиссор абдурахман уйғур өзтүрк тәрипидин түркийәдә ишләнгән «бәяз балина»‏ - «ақ кит» намлиқ филим бүгүн 24-марттин етибарән түркийәниң һәр қайси шәһәрлиридики киноханиларда қоюлушқа башлиғанлиқини хәвәр қилған болуп, хәвәрни тәйярлиғучи мәзкур радийониң уйғур бөлүм мухбири миркамил әпәндини зиярәт қилғинимизда, у «ақ кит» намлиқ филим бир уйғур режиссор тәрипидин ғәрбтә шундақла түркийәдә ишләнгән уйғур тарихидики тунҗи филим дәп баһа бәрди вә бу филимниң түркийә киночилиқ саһәсидиму етирап қилишқа еришкәнликини тилға елип, түркийәниң атақлиқ кино обзорчилиқ тор бити «www.beyazperde.com» Бу филимға баһа берип: «шәрқий түркистанлиқ абдурахман уйғур өзтүрк тәрипидин түркийәдә ишләнгән тунҗи кино икәнликиниму алаһидә көздә тутушимиз лазим. Тамашибинларниң, филимниң ахириға йеқин, учрайдиған толиму тәсирлик, паҗиәлик вәқәни көрүш үчүн көз яшлирини сүртүшкә чоқум йенида яғлиқ еливелишни унтумаслиқини тәвсийә қилимиз» дегәнлирини мисалға алди.

Илгири радийомиз аңлитишлирида уйғур яш режиссор абдурахман уйғур өзтүрк әпәндини «бәяз балина» ‏- «ақ кит» намлиқ филимни сүрәткә еливатқан пәйтидә һәмдә филим пүткән басқучлардиму зиярәт қилип хәвәр бәргән идуқ, бүгүн филимниң мувәппәқийәтлик һалда киноханиларға киргәнлики мунасивити билән қайта зияритимизни қобул қилған абдурахман әпәнди, кинониң дәсләпки қоюлғандила тамашибинлар вә кино саһәсидикиләр арисида яхши тәсир пәйда қиливатқанлиқидин, өзиниң киночилиқ саһәсигә қәдәм басқандин кейинки тунҗи мувәппәқийәтлирини көрүватқандәк һессиятта икәнликини, һазирғичә мәтбуатларға чиққан вә ағзаки биваситә алған баһалардин филим ишләшкә қатнашқан барлиқ һәмкарлашқучиларниң һардуқи чиққандәк һес қиливатқанлиқини билдүрди.

Абдурахман әпәнди сөзидә йәнә, кейинки пиланлири һәққидә тохтилип, «ақ кит» ниң нөвәттә чәтәлләрдә тарқитилишқиму йол ечиливатқанлиқини, нөвәттә японийәдә қоюлуш рәсмийәтлириниң пүткәнликидәк хуш хәвәрни бәрди.

Бу яш режиссор йәнә, өзиниң тунҗи киносиниң йоруқлуқ көргәнликидин хушаллиқ туюватқан мушу пәйтләрдә, башқиларниңму арманлирини ишқа ашурушқа бир актип күч, бир илһам болсикән дегән үмидләрдә икәнликини билдүрүп: «бир чағларда, мәнму киночилиққа оттәк иштияқи бар, әмма бу җәһәттә тәрбийилинишкә имкани йоқ, үрүмчидики адәттики бир «дәйчилик» қилип тирикчилик қилидиған һәвәскар идим. Бу йолда 10 йилдин артуқ тириштим, шу тап тунҗи филими йоруқ көргән режиссор аталдим, әлвәттә бу бир башланғуч мән үчүн, әмма көңлимизгә пүккән икәнмиз, тиришчанлиқ көрсәтсәк, һаман әмәлгә ашуралаймиз, һәммә адәм қилалайду, җүмлидин кино саһәсигә қизиққан яшлиримиз билән тәҗрибә алмаштуруш вә һәмкарлишишқа тәйярмән» деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт