Gherb dunyasida Uyghur rézhissorluq qilghan tunji kino yaxshi inkas yaratti

Muxbirimiz gülchéhre
2017-03-27
Share
abduraxman-ozturk-rezhissor.jpg Yash Uyghur rézhissor abduraxman Uyghur öztürk.
Social Media

Türkiye kino obzorchiliqi torida mezkur kino heqqide yézilghan obzorda, körürmenlerning köz yashlirini sürtüshke choqum yénida yaghliq éliwélishni untumasliqini tewsiye qilishidin, gherb dunyasida tunji qétim bir Uyghur teripidin chet'elde ishlen'gen mezkur kinoning, muweppeqiyet qazan'ghanliqini jezmlesh tes emes, qéni undaqta "Aq kit" ni körgen tamashibinlar bu kinogha qandaq bahalar béridu, mezkur kinoni ishlep tarqitishqa 3 yildin artuq ejir qilghan, rézhissor abduraxman Uyghur öztürk, kinoning resmiy qoyulushqa bashlishi bilen kütken meqsetlirige yettimu?

Türkiyede, türk xelqining hayati heqqide, türk tilida, emma bir Uyghur rézhissor teripidin ishlen'gen kino "Aq kit", 24-mart axiri kinoxanilargha kirdi, mezkur kino téxi qoyulmay turupla, türkiye shundaqla chet'ellerdiki Uyghurlar arisida qiziqish qozghighan idi we filimni uni körüshke teqezza idi. Türk metbu'atliri we ijtima'iy taratqularda mezkur kino tamashibinlar bilen yüz körüshkendin kéyin, belgilik yaxshi tesir peyda qilghanliqi melum. "Beyaz balina"‏ - "Aq kit" mobi dikning jelp qilarliq hékayisige mehliya bolghan 2 ösmürning, bolupmu her ikkisi bashqa-bashqa dunya hésablinidighan, biraq shundaqtimu ikkisini bir-birige baghlighan katta bir dostluqning hékayisini janlandurup béridu.

Bu kino nöwette türkiyediki chong ‏-kichik 35 sheher kinoxanisida qoyuluwatqan bolup, yene 2, 3 hepte qoyulidiken. Aldi bilen bu kino abduraxman Uyghur öztürktek bir yash Uyghur rézhissor teripidin ishlen'gen kino bolghini üchön, türkiyede yashawatqan we oquwatqan Uyghurlar qizghinliq bilen körgen. Istanbulda bu kinoni ikki nöwet tamasha qilghan bir Uyghur oqughuchi qiz, kinoning sénariyisi, weqeliki, süretke élinish, kirishtürüsh we muzikiliriningmu intayin yuqiri sewiyide ikenlikini, éstétik we meniwi zoq alghanliqini, muhimi bir Uyghur rézhissor teripidin ishlen'gen kino bolghini üchün özining bu filimni iptixarliq ichide tamasha qilghanliqini hayajan ichide bayan qildi.

Türkiyening döletlik uchur wasitisi bolghan türkiye awazi radiyosi Uyghur yash rézhissor abduraxman Uyghur öztürk teripidin türkiyede ishlen'gen "Beyaz balina"‏ - "Aq kit" namliq filim bügün 24-marttin étibaren türkiyening her qaysi sheherliridiki kinoxanilarda qoyulushqa bashlighanliqini xewer qilghan bolup, xewerni teyyarlighuchi mezkur radiyoning Uyghur bölüm muxbiri mirkamil ependini ziyaret qilghinimizda, u "Aq kit" namliq filim bir Uyghur rézhissor teripidin gherbte shundaqla türkiyede ishlen'gen Uyghur tarixidiki tunji filim dep baha berdi we bu filimning türkiye kinochiliq sahesidimu étirap qilishqa érishkenlikini tilgha élip, türkiyening ataqliq kino obzorchiliq tor biti "www.beyazperde.com" bu filimgha baha bérip: "Sherqiy türkistanliq abduraxman Uyghur öztürk teripidin türkiyede ishlen'gen tunji kino ikenlikinimu alahide közde tutushimiz lazim. Tamashibinlarning, filimning axirigha yéqin, uchraydighan tolimu tesirlik, paji'elik weqeni körüsh üchün köz yashlirini sürtüshke choqum yénida yaghliq éliwélishni untumasliqini tewsiye qilimiz" dégenlirini misalgha aldi.

Ilgiri radiyomiz anglitishlirida Uyghur yash rézhissor abduraxman Uyghur öztürk ependini "Beyaz balina" ‏- "Aq kit" namliq filimni süretke éliwatqan peytide hemde filim pütken basquchlardimu ziyaret qilip xewer bergen iduq, bügün filimning muweppeqiyetlik halda kinoxanilargha kirgenliki munasiwiti bilen qayta ziyaritimizni qobul qilghan abduraxman ependi, kinoning deslepki qoyulghandila tamashibinlar we kino sahesidikiler arisida yaxshi tesir peyda qiliwatqanliqidin, özining kinochiliq sahesige qedem basqandin kéyinki tunji muweppeqiyetlirini körüwatqandek héssiyatta ikenlikini, hazirghiche metbu'atlargha chiqqan we aghzaki biwasite alghan bahalardin filim ishleshke qatnashqan barliq hemkarlashquchilarning harduqi chiqqandek hés qiliwatqanliqini bildürdi.

Abduraxman ependi sözide yene, kéyinki pilanliri heqqide toxtilip, "Aq kit" ning nöwette chet'ellerde tarqitilishqimu yol échiliwatqanliqini, nöwette yaponiyede qoyulush resmiyetlirining pütkenlikidek xush xewerni berdi.

Bu yash rézhissor yene, özining tunji kinosining yoruqluq körgenlikidin xushalliq tuyuwatqan mushu peytlerde, bashqilarningmu armanlirini ishqa ashurushqa bir aktip küch, bir ilham bolsiken dégen ümidlerde ikenlikini bildürüp: "Bir chaghlarda, menmu kinochiliqqa ottek ishtiyaqi bar, emma bu jehette terbiyilinishke imkani yoq, ürümchidiki adettiki bir "Deychilik" qilip tirikchilik qilidighan heweskar idim. Bu yolda 10 yildin artuq tirishtim, shu tap tunji filimi yoruq körgen rézhissor ataldim, elwette bu bir bashlan'ghuch men üchün, emma könglimizge pükken ikenmiz, tirishchanliq körsetsek, haman emelge ashuralaymiz, hemme adem qilalaydu, jümlidin kino sahesige qiziqqan yashlirimiz bilen tejribe almashturush we hemkarlishishqa teyyarmen" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet