Уйғур сәнәткарлири мюнхен сәһнисидә алқишқа еришти

Ихтиярий мухбиримиз әкрәм
2013.07.22
myunxen-uyghur-senetka-1.JPG Уйғур сәнәткарлири мюнхен сәһнисидә алқишқа еришти. 2013-Йили 20-июл, германийә.
RFA/Ekrem

20-Июл күни германийәниң мюнхен шәһиридики уйғур яш-өсмүр сәнәткарлири шәһәрниң әң ават саяһәт һәм сода мәркизидә оюн көрситип, һәр саһә хәлқниң қизғин алқишиға еришти вә уйғур усули, уйғур сәнәт кийимлириниң гүзәллики билән кишиләрни зоқландурди.

20-Июл күни мюнхен шәһәр мәркизидики бүви мәрйәм мәйданиға миңлиған кишиләр йиғилған иди. Мюнхен шәһәрлик “өзини қоғдаш мәркизи” тәрипидин бу кәңри сәйнаға бу күни нурғунлиған тәшвиқат понкитлири қурулған болуп, һәр бир понкит инсанларниң рак кесәлликлири, әйдиз кесәлликлири, йүрәк кесәлликлири қатарлиқ түрлүк хәтәрлик кесәлликләрдин өзлирини мудапиә қилиш үчүн керәклик болған теббий саватлардин дәрс беришни мәқсәт қилишқан иди. Сәйнаниң бир тәрипигә чоң сәһнә орунлаштурулған болуп, сәһнидә германлар оюн көрситивататти. Бир кәмдә сәһнидә, уйғурчә кийингән бир ханим пәйда болди-дә, өзлириниң уйғур миллитидин икәнликини, уйғурларниң кимлики, мәдәнийити, сәнитиниң қандақлиқи тоғрисида қисқичә учур берип сәһнини уйғур яш-өсмүрлиригә бошатти. Сәһнидә он нәччә яшлиқ уйғур қизлири пәйда болди. Үналғудин яңриған гүзәл уйғурчә нахшилар, чирайлиқ уйғурчә усуллар вә нәпис миллийчә кийимлири бирдинла кишиләрниң көзлирини чақнитивәтти.

Әтрапқа йиғилған миңлиған тамашибинлар сәһнә әтрапиға топлишип, уйғурчә номурларни зор қизиқиш билән тамаша қилди. Һәрбир номур ахирлашқанда, гүлдүрас алқиш садалири яңриди. Шәһәр мәркизидики шунчә көп кишиләр алдида сәһниниң кәспий сәнәткарлардин кейинла, уйғурларға берилиши вә йеши 16 дин төвән болған уйғур өсмүрлириниң башқа милләтләрниңкигә һеч охшимайдиған гүзәл усули уйғурларни билмигән кишиләрни һәйран қалдурған иди. Кишиләр номур орунлаватқан бу өсмүрләрниң уйғур миллитидин болғанлиқини билгәндин кейин, бу қетимқи сәнәт паалийитигә йетәкчилик қилғучилардин нурниса ханим вә сәнәт устази халисә ханимлардин уйғурларниң нөвәттики вәзийити тоғрисида мәлуматлар сориди.

Уйғур өсмүрлири арқа-арқидин ялғуз кишилик нахша, үч кишилик усул вә көп кишилик усулларни орунлап, тамашибинларниң көзлиридин от чиқиривәтти. Нурғунлиған кәспий мухбирлардин сирт, бүви мәрйәм мәйданини зиярәт қилғили кәлгән нурғунлиған чәтәлликләрму сәһнидә оюн көрситиватқан әтләс көңләк, чимән доппилиқ уйғур қизлирини вә әтрапта топлишип турған сап миллийчә кийимдики уйғур өсмүрлирини бәс-бәстә сүрәтләргә тартивелишти. Әтраптики тамашибинлар уйғур өсмүрлири усул ойнаватқанда уйғурчә нахша-музикиға маслаштуруп чаваклар челип, мәрйәм мәйданида толиму җушқун бир кәйпият яратти.

Мюнхендики уйғурларниң сәнәт устази халисә ханим зияритимизни қобул қилғанда, йеқинқи йиллардин бери уйғур сәнәткарлириниң германийәниң һәрқайси җайлирида орунлаштурулған германлар вә түрк тәшкилатлириниң түрлүк мәдәний, иҗтимаий паалийәтлиригә тәклип билән қатнишиватқанлиқини, мюнхен шәһиридә өзлүкидин тәшкилләнгән бу сәнәт гурупписиниң барғансери йәрлик хәлқниң көзигә челиқиватқанлиқи вә қизиқишини қозғаватқанлиқини тилға алди. Германийәдә йиллардин бери һәрхил мәдәний, әдәбий вә сәнәт номурлирини тәшкилләп, орунлап келиватқан нурниса ханим болса, уйғурларниң иҗтимаий, мәдәний паалийәтлириниң германларниң қизғин алқишиға еришиватқанлиқини, илгирики йиллардикигә охшаш, алдимиздики айлар, йиллардиму, йәнә сәһниләрдә нурғун оюнларни орунлашқа тәклип қилинғанлиқини тәкитлиди. У сөзидә, уйғур сәнитиниң уйғур миллитини тонутушта әң яхши васитиләрдин бири болуп келиватқанлиқини әскәртти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.