Түркийәдики NTV телевизийәсидә уйғур тамақлири тонутулди

Ихтиярий мухбиримиз әркин тарим
2016.04.07
uyghur-taamliri-turkiye-tv.jpg Түркийәдики NTV телевизийәсидә уйғур тамақлири тонутулди. 2016-Йили 3-апрел.
RFA/Erkin Tarim

Түркийәниң әң чоң телевизийә қаналлиридин бири болған NTV телевизийәсидә һәр йәкшәнбә күни тарқитилидиған “тади димағимда” йәни “тәми ағзимда” намлиқ программида уйғур тамақлири тонутулди. TV Программичиси вәдат милор әпәнди бу программисида түркийәниң һәрқайси җайлиридики даңлиқ ашханиларни тонутуватқан болуп, 3-апрел күнидики программисида истанбулниң фатиһ районидики хақанийә уйғур ресторанида уйғур тамақлирини тонутти.

Истанбулниң фатиһ районидики йүсүп паша мәһәллисигә ечилған хақанийә уйғур рестораниниң пүтүн тамақлирини тонутқан NTV телевизийәси программа риясәтчиси вәдат мүлләр әпәнди уйғур тамақлириға баһа берип мундақ деди: “оттура асия тамақлири билән йирақ шәрқ тамақлири наһайити ләзиз. Бизниң тамақ тәмлиримизгә йеқин, бизниң 30-40-50 йил бурунқи тамақ қилиш усулимизға охшайду. Мәсилән, түрк ашханилирида көпрәк завутта ишләпчиқарған шорпини ишлитиду. Әмма уйғур ашханилирида болса сөңәкни қайнитип чиқарған шорпилар билән тамақ қилидикән. Шуңа бәкла ләззәтлик икән. Мән уйғур тамақлири билән дуня банкисида ишләйдиған вақтимда оттура асияда тонушқан идим. Һәқиқәтән ләзиз тамақлири бар икән. Түрк херидарларниң ата юрти шәрқий түркистанниң тамақлирини йейишини тәвсийә қилимән.”

Биз хақанийә уйғур рестораниниң хоҗайини абдуллаһ әпәнди биләнму телефон зиярити елип бардуқ. У, херидарлириниң көпрәк өзбек, әрәб, түрк, қирғиз вә иранлиқлар икәнликини, н т в телевизийәсидә тонутулғандин кейин херидарларниң көпәйгәнликини баян қилди.

Абдуллаһ әпәнди уйғур тамақлириниң херидарлар тәрипидин наһайити яхши көрүп йейиливатқанлиқини баян қилди.

Шәрқий түркистан вәхпиниң сабиқ башлиқи һамут гөктүрк әпәнди дуняға уйғурларни тонутушта түркийәдә ечилған уйғур ашханилириниң ролиниң зор икәнликини баян қилди.

Қиммәтлик радио аңлиғучилар, түркийәгә көпләп уйғурларниң келишигә әгишип, түркийәниң чоң шәһәрлиридә ечилған уйғур ашханилириниң саниму күнсайин көпәймәктә. Биз игилигән мәлуматларға асасланғанда, һазир түркийәниң пайтәхти әнқәрәдә 2, түркийәниң хәлқара санаәт, тиҗарәт, мәдәнийәт вә саяһәт шәһири истанбулда 20, түркийәниң җәнубиға җайлашқан саяһәт шәһири анталияда 2, қәйсәри шәһиридә 2 болуп түркийәдә җәмий 26 әтрапида уйғур ашханиси ечилған болуп, бу ашханиларниң тамақлири херидарларни өзигә җәлп қилмақта. Түрк ахбарат васитилиридә вә иҗтимаий таратқуларда бу тамақлар тонутулмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.