“Xelq'ara Uyghur tetqiqati zhurnili” ning 9-sani oqurmenliri bilen yüz körüshti

Türkiyede tunji mexsus Uyghur tetqiqati heqqidiki alte ayda bir türk tilida neshr qilinidighan ilmiy zhurnalning 9-sani oqurmenliri bilen yüz körüshti.

Izmirdiki ege uniwérsitéti türk dunyasi tetqiqatliri instituti oqutquchisi proféssor doktor alimjan inayet ependining sahibxaniliqida 2013-yilidin béri chiqiriliwatqan tor zhurnilining 9-sanida Uyghur tili, edebiyati, folklori, tarixi we medeniyiti toghrisida yézilghan 14 parche ilmiy maqale we 3 parche kitab tonutush maqalisige orun bérilgen. Zhurnalning igisi we bash tehriri ege uniwérsitéti türk dunyasi tetqiqat merkizining oqutquchisi proféssor doktor alimjan inayet ependi zhurnalning 9-sanini chiqirishqa emgek singdürgenlerge rehmet éytqandin kéyin, bu sanda orun bérilgen maqaliler toghrisida melumat berdi.

Bu sanda türkiyening newshéhir haji bektash weli uniwérsitétida xelq éghiz edebiyati kespide doktorluqta oquwatqan abdulwahit hesenjan ependining “Hazirqi zaman Uyghur sha'iri exmetjan osmanning shé'irliri we u bashlatqan gungga shé'ir herikiti”, abdushükür memet'imin ependining “Nege barisen qagha dégen naxshining tarixi yiltizi” mawzuluq maqalisining türkche terjimisige, Uyghur ziyaliysi abduweli ayup ependining “Uyghur sha'iri abduxaliq Uyghur heqqide élip bérilghan tetqiqatlar we saqliniwatqan mesililer” mawzuluq maqalisige, proféssor doktor alimjan inayetning “1980-Yillarning axiridin bügün'giche türkiyede sherqiy türkistan we Uyghurlar toghrisida élip bérilghan tetqiqatlar”, qazaqistan abay uniwérsitéti oqutquchisi proféssor doktor ruslan arziyéf ependining “Dangliq sha'ir abdurehim ötkürning shé'irliride ‛bahar‚ sözining ishlitilishi”, newshéhir haji bektash weli uniwérsitéti oqutquchisi doktor adem öger ependi bilen zulhayat ötkür xanim yazghan “Ottura asiya chégralirigha Uyghurlarning köchüshi” qatarliq 14 parche maqalige orun bérilgen.

Zhurnalning igisi, proféssor doktor alimjan inayet ependi mezkur zhurnalning 2013-yilidin tartip izchil halda neshr qiliniwatqanliqini, künsayin süpiti ösüp xelq'ara sewiyege yetkenlikini, sherqiy türkistan we Uyghur tetqiqati bilen shughullan'ghuchilar üchün qimmetlik menbe ikenlikini bayan qildi.

Türkiyede doktorluq oquwatqan Uyghur ziyaliysi abduwahit hesenjan ependi “Xelq'ara Uyghur tetqiqati ilmiy zhurnili”da 3 parche maqale élan qilghan bolup, bularning hemmisi Uyghur edebiyati toghrisida yézilghan maqalilerdur.
U, türkiyede Uyghur tili we tarixi toghrisida köp tetqiqatning mewjutluqini, emma Uyghur edebiyati toghrisidiki tetqiqatlarning kemchil ikenlikini, shunga köprek Uyghur edebiyati toghrisida maqale yéziwatqanliqini bayan qildi.

Abduwahit hesenjan ependi “Xelq'ara Uyghur tetqiqati ilmiy zhurnili” ning 9-sanidiki maqaliside hazirqi zaman Uyghur edebiyatidiki gungga shé'ir éqimining qurghuchiliridin exmetjan osman we uning shé'irlirini türk oqurmenlerge tonushturghanliqini bayan qildi.

Proféssor doktor alimjan inayet ependi zhurnalning 4 yildin béri izchil halda torda chiqiwatqanliqini, weten ichi we sirtidin köp kishining torni ziyaret qiliwatqanliqini, yaxshi inkaslarning kéliwatqanliqini, Uyghur ziyaliylirining bu zhurnalgha ige chiqishi kéreklikini bayan qildi.

Sherqiy türkistan wexpining sabiq re'isi, Uyghur xewer we tetqiqat merkizining mes'uli xemit göktürk ependi “Xelq'ara Uyghur tetqiqati zhurnili” ning hazir türkiyede chiqiwatqan birdin-bir ilmiy zhurnal ikenlikini, 25 yilgha yéqin “Sherqiy türkistan awazi” namida ilmiy zhurnal chiqirilghan bolup, zhurnalda ilmiy qimmiti yuqiri bolghan köp sanda maqalining neshr qilin'ghanliqini, alimjan inayet chiqiriwatqan bu zhurnalning bu sahediki boshluqni tolduruwatqanliqini bayan qildi.

Burun türkiyede “Sherqiy türkistan awazi” namida türk tilida ilmiy zhurnal neshr qilin'ghan bolup, Uyghurlarning tarixi, tili, edebiyati, ijtima'iy ehwali we siyasiy weziyitini özige singdürgen maqaliler zhurnalning bir pütün gewdisini teshkil qilghan iken.