Istanbulda ötküzülgen pa'aliyette Uyghur tiligha ehmiyet bérish tekitlendi

Ixtiyariy muxbirimiz arslan
2018-03-28
Élxet
Pikir
Share
Print
25-Mart istanbulda ötküzülgen Uyghur ana tili we noruz pa'aliyitidin bir körünüsh. 2018-Yili 25-mart. Istanbul, türkiye.
25-Mart istanbulda ötküzülgen Uyghur ana tili we noruz pa'aliyitidin bir körünüsh. 2018-Yili 25-mart. Istanbul, türkiye.
RFA/Arslan

25-Mart küni istanbuldiki Uyghur akadémiyisining uyushturushi bilen "Uyghurlarda ana til söygüsi" we "Noruz tentenisi" dégen témida pa'aliyet ötküzüldi.

Pa'aliyette Uyghur tiligha ehmiyet bérish we Uyghur a'ililerning perzentlirige Uyghur tili ögitish kérekliki tekitlendi. 

Pa'aliyette aldi bilen Uyghur akadémiyisining re'isi abdulhemit qaraxan échilish nutqi sözlep, Uyghurlarning noruz bayrimini tebriklidi we bu pa'aliyetni orunlashturushtiki asasiy meqsiti toghrisida toxtaldi. 

Abdulhemit qaraxan ependi sözide, Uyghur tilining xitay da'iriliri teripidin cheklimige uchrap Uyghur ma'aripidin siqip chiqirilghanliqi, Uyghur tilining yoqilish xewpige duch kéliwatqanliqi, shuning üchün weten ichi we sirtidiki barliq Uyghurlarning perzentlirining öz tilini yoqitip qoymasliqi üchün Uyghur tilgha ehmiyet bérishi kéreklikini tekitlidi. 

Kéyin Uyghur sen'etchilerdin muxter abdukérim janbaz "Uyghur tili jan tilim" dégen témida dutar bilen naxsha orunlidi.

Istanbuldiki beykent uniwérsitéti oqutquchisi doktor meghpiret kamal xanim, "Ana til we Uyghurlarning mewjudiyiti" dégen témida söz qilip, Uyghur tilining ehmiyiti toghrisida toxtaldi we Uyghur tilini milliy bayliq xezine dep körsetti. 

Pa'aliyette yene Uyghur ösmürliri milliy kiyimler bilen sehnige chiqip, Uyghur tili öginish kérekliki toghrisida her xil shé'ir we nesir oqudi, itot orundap yighin ehlining qizghin alqishigha érishti. 

Ösmürler itot orundash arqiliq, Uyghurche bilmeydighan Uyghur balilar we Uyghurche bilen türkchini arilashturup sözleydighan balilarni tenqid qildi we Uyghur a'ililerning perzentlirige Uyghur tili ögitish kéreklikini tekitlidi. 

Pa'aliyette yene Uyghur we türk sen'etchiler her xil nomur körsetti. Türk sen'etchi bunyamin aqsun'gür ependi, "Uchrashqanda", "Gül achil" dégen Uyghurche naxshilarni dutar bilen orundap pa'aliyetchilerning qizghin alqishigha érishti. 

Uyghur doktor perhat tengritaghli qatarliq sen'etchiler sehnige chiqip her xil Uyghur xelq naxshiliri orunlidi. 

Yighinda yene arel uniwérsitéti oqutquchi doktor shewket nasir ependi, noruz bayrimi we Uyghur medeniyiti dégen témida söz qildi. 

3 Sa'et dawam qilghan pa'aliyet axirida pa'aliyette söz qilghuchilar we nomur körsetken sen'etchilerge teqdirname teqdim qilindi. Pa'aliyetken qatnashqan 100 ge yéqin Uyghur ösmürge, qochaq, shahmat dégendek her xil oyunchuqlar mukapat süpitide bérildi.

Toluq bet