Абдурахман: видийодики хитайчә сөзлитиливатқан бала мениң өз оғлум

Мухбиримиз гүлчеһрә
2019-02-04
Елхәт
Пикир
Share
Принт
Түркийәдә яшаватқан абдурахман вә у хитайдин тарқитилған син көрүнүшидин тонувалған оғли абдуләзиз.
Түркийәдә яшаватқан абдурахман вә у хитайдин тарқитилған син көрүнүшидин тонувалған оғли абдуләзиз.
Social Media

Фәйсбокта уйғурлар тарқатқан учурларға қариғанда түркийәдә йәнә бир ата, хитайдин тарқитилған бир видийодин өз оғлини тонувалған. Хитайчә давю детали арқилиқ тарқалған бу видийода 4 яшлиқ бир уйғур бала хитайчә сөзлитилгән болуп, у исмини абдуләзиз дәп ениқ ейтқан. Из қоғлаш арқилиқ өз оғлини тонувалған абдурахманни истанбулдин тепип зиярәт қилдуқ. У тәминлигән испатлар видийодики балиниң абдурахманниң истанбулда-2014-йили 12-айниң 21-күни туғулған вә икки йил аввал аписи билән юрти ақсуға қайтқанчә хәвири болмай келиватқан оғли абдулазиз икәнликини көрситип турмақта икән. Мухбиримиз гүлчеһрә бу һәқтә тәпсилий мәлумат бериду.

15 Секунтлуқ бу видийода «сениң исмиң немә?қанчә яшқа кирдиң? вәтиниңниң нами немә? вәтәнниң байриқиң қандақ? дәп хитайчә соралған соалларға хитайчә чаққанлиқ билән инкас қайтуруватқан қой көзлүк, бодруққинә абдуәзизниң бир хитай оқутқучи яки йетәкчигә җаваб бериватқини чиқип туратти, бу қисқиғинә видийониң ахири тамақни нәдин йәйсән? дегән соалға балиниң йөтилип туруп «әхләт сандуқидин» дәп бәргән җаваби билән ахирлишиду.

Хитайлаштуруш тәрбийәсидә меңә ююшқа учраватқанлиқи ениқ ипадиләнгән бу нарәсидиниң дәл өзиниң икки йилдин буян из-дерикини қилалмай келиватқан йүрәк париси, әтиварлиқ оғли икәнликини тонуп қелиш абдурахман үчүн тәсвирлигүсиз бир хорлуқ, аччиқ азабларни һес қилдурмақта икән.

«Әң әндишә қиливатқиним бу баламни хитайлаштуруп бир күнлири өзүмгә дүшмән қиливетәрму, әмди уни йәнә көрәләрмәнму дәп әнсирәймән» дәп үнсиз яш төккән бу яш ата оғлиниң туғулған, өзи көтүрүп баққан чағлирини әслиди.

Абдурахманниң тәминлигән учур вә испатлириға қариғанда, абдуләзиз 2014-йили 12-айниң 21-күни истанбулда туғулған. Абдурахман вә униң аяли түркийәдә иш-оқәтниң тайини йоқ, балиларни түркийә нопусиға өткүзүш қийин болуштәк түрлүк қийинчилиқларда қалған әһвалда ахири униң аяли балиларни елип юрти ақсуға туғқан йоқлашқа кәткән. Әнә шундин буян улардин хәвәр алалмай кәлгән абдурахман, оғлиниң видийосини 10 күнләр аввал туюқсиз хитайниң давю дегән учур алақә деталидин көрүп қалған. У, видийо тарқатқучи билән алақилишишкә тиришқан болсиму үнүми болмиған, абдурахман бу қисқа видийо арқилиқ гәрчә оғлиниң һаят икәнликини билгән болсиму, әмма униң нәдә, қандақ һаләттә туруватқанлиқи вә башқа қериндашлири һәққидә һечқандақ учур алалмиған.

Абдурахманниң аяли пәридә ясин, абдуләзиз 2 яш чеғида униңдин чоң қизи вә бовақ кәнҗи қизи болуп 3 балисиға хитай консулидин хитай паспорти ишлитип, 2016-йили 8-айда уларни юртқа елип маңған икән. Әпсус уларниң юртқа қайтқан пәйти дәл хитай һөкүмитиниң түркийә қатарлиқ җайлардин қайтип кәлгән кишиләрни қаттиқ тәқибгә еливатқан пәйткә тоғра кәлгән. Пәридә ясин 10 йиллиқ кесилгән вә шундин етибарән балиларниңму из-дерики болмиған.

Буниң алдида, йәни өткән айда истанбулда қәлбинур турсун исимлик бир уйғур аялму шуниңға охшаш хотәндики мәлум параванлиқ орнидики балиларниң видийоси ичидин өзиниң 6 яшлиқ ғайиб қизи айшәни тонувалғанлиқини хәвәр қилған идуқ. Бу хилдики һекайиләр көпийип бармақта, бу кишиләрниң реал паҗиәлири хитай һөкүмитиниң уйғурларға йүргүзүватқан бастуруш сиясәтлири, болупму лагерларни қуруп уйғур вә башқа милләтләрни кәң даиридә қамишиниң сәлбий тәсирлириниң һәр тәрәплимә болуватқанлиқи, болупму буниң балиларға елип келиватқан паҗиәлириниң чоңқур болуватқанлиқини испатлап бәрмәктә.

Юрти ақсу шәһәр бәштүгмән йезиси йеңи өстәң кәнтидин болған абдурахман тохтиниң ечинишлиқ һекайиси бала биләнла түгимәйду, униң ата-аниси, аяли, қериндашлири лагерларда, түрмиләрдә турмақта, уларниң қаранчуқсиз қалған әвладлири болса из-дерәксиз болмақта. Абдурахман тохтиниң бешиға кәлгән паҗиәләрниң давамини келәркин қетимлиқ программида аңлиғайсиләр.

Пикирләр (0)
Share
Толуқ бәт