Londonda ötküzülüwatqan "Ayal we urush" féstiwalida Uyghur ayal qehrimanlar tonushturuldi

Ixtiyariy muxbirimiz erkin tarim
2016-07-26
Share
ayal-we-urush-festiwal.jpg 2016-Yili 7-ayning 4-künidin 31-künigiche en'gliyening paytexti londonda ötküzülgen "Ayal we urush" namliq féstiwalning uqturushi.
RFA/Erkin Tarim

7-Ayning 4-künidin 31-künigiche en'gliyening paytexti londonda ötküzülgen "Ayal we urush" namliq féstiwalda tarixta ötken ayal qehrimanlarning ish izliri anglitilidiken. Féstiwalning kün tertipige bina'en 7-ayning 24-küni chüshtin kéyin londonning merkizige jaylashqan bankilar kochisi kulubida Uyghur pa'aliyetchi rehime mexmut xanim Uyghur ayalliri we ularning ish izliri toghrisida melumat berdi. Biz bu féstiwal heqqide téximu tepsiliy melumat igilesh üchün bu féstiwalgha qatnashqan rehime mexmut we ayshe xanim bilen téléfon söhbiti élip barduq.

Rehime mexmut xanim londonda ötküzülüwatqan "Ayal we urush" mawzuluq tunji qétimliq féstiwalning tiyatir, drama, hékaye sözlesh we naxsha arqiliq urushning ayallargha bolghan tesiri, ayallarning urushta körsetken töhpiliri we yoqitishliri qatarliq mezmunlarni öz ichige alghan bir pa'aliyet ikenlikini bayan qildi.

Rehime mexmut xanim 24-chésla aqshamqi pa'aliyette mexsus Uyghurlargha orun bérilgenlikini, bu pa'aliyette Uyghur ayallirining tarixta qoshqan töhpilirini, naxsha éytish, shé'ir oqush, bezi hékaye kitablarni, meshhur Uyghur ayallirini tonutush arqiliq bu pa'aliyette iparxan, nuzugum, herembagh urushida ötken rizwan'gül, "Köz yéshida nemlen'gen zémin" namliq eserning aptori süyün'gül janishif xanimni, rabiye qadir xanimni we patigül ghulam xanimni tonutqanliqini ilgiri sürdi.

Rehime mexmut xanim doklati axirlashqandin kéyin köp sanda kishining xitayning hazir Uyghurlargha élip bériwatqan bésim siyasiti we Uyghurlarning hazirqi ehwali toghrisida so'allar sorighanliqini, féstiwalda en'gliye, amérika, qazaqistan, qirghizistan qatarliq döletlerdin bashqa, urush boluwatqan döletlerdiki ayallarning ehwali toghrisida kitab yazghan kishilerning sözlewatqanliqini bayan qildi.

Londonda turuwatqan Uyghur ziyaliysi ayshe xanim rehime mexmut xanim kespiy sen'etchi bolmisimu, her pursettin paydilinip Uyghur dewasini anglitiwatqanliqini, uning dewagha qoshqan töhpisining zor ikenlikini tekitlidi.

Bezi mutexessisler, Uyghur xanim-qizlirining dunya medeniyitige qoshqan töhpisini we bügünki échinishliq weziyitini dunya jama'etchilikige anglitishning Uyghur dewasi üchün paydiliq bolidighanliqini bayan qilishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet