Amérikidiki uyghur jama'iti yéngi yilni birge kütüwaldi

Muxbirimiz eziz
2017-01-02
Élxet
Pikir
Hembehr
Print
  • Print
  • Hembehr
  • Pikir
  • Élxet
Amérika uyghur birleshmisining re'isi élshat hesen ependi yéngi yilliq tebrik sözi qilmaqta. 2016-Yili 31-dékabir, washin'gton.
Amérika uyghur birleshmisining re'isi élshat hesen ependi yéngi yilliq tebrik sözi qilmaqta. 2016-Yili 31-dékabir, washin'gton.
Photo: RFA

31-Dékabir küni amérikining paytexti washin'gton shehiri we yéqin etraptiki shtatlardin kelgen uyghurlar bir yerge toplinip kéliwatqan yéngi yilni birlikte kütüwaldi. Shuning bilen birge, özlirining yéngi yilliq tilekliridin hembehirlendi.

Dunya uyghur qurultiyining re'isi rabiye qadir xanim we amérika uyghur birleshmisining re'isi élshat hesen ayrim-ayrim söz qilip, dunyaning herqaysi jayliridiki uyghurlargha salam yollidi.

Uyghurlarning chet'ellerge köchmen bolup chiqishidiki aldinqi tallash nuqtilirining biri bolghan amérika qoshma shtatliri muhajirettiki uyghur jama'iti birqeder merkezlik toplashqan memliketlerning biri. Amérikida yashawatqan uyghurlarning sanining téz sür'ette éship bérishi bolsa muhajirettiki uyghur topluqini memnun qiliwatqan ehwallarning biridur. Emma türlük seweblerdin amérikining herqaysi shtatlirida tarqaq yashawatqan uyghur a'ililiri üchün bir yerge jem bolup, uyghurluq tuyghusidin birlikte behrimen bolush bekmu köp nésip bolup ketmeydu. Ene shu ehwalni közde tutup, amérika uyghur birleshmisi ötüp kétiwatqan bir yilni uzitish we yéngi yilni kütüwélish meqsitide yéngi yilliq tebrik soruni hazirlap, uyghur jama'itige yene bir qétim öz-ara didarlishish we jem bolush pursiti yaritip berdi.

Yekshenbe küni kechqurun washin'gton shehirige anche yiraq bolmighan jaydiki bést wéstérn méhmanxanisining pa'aliyet zali washin'gton shehiri, shundaqla wirjiniye, mariyland, nyuyork qatarliq shtatlardin kelgen birnechche yüz uyghur bilen tolimu awatliship ketkenidi. Uzundin buyan didarliship bolalmighan chonglar öz-ara qizghin salamlar bilen mungdashsa, balilar bir-biri bilen qoghliship oynighach sorunning uyghurluq keypiyatini téximu ewjige chiqarmaqta idi. Ayighi üzülmey kéliwatqan méhmanlar birdemdila zal ichige liq tolup, musulmanche tamaqlar bolsa sorunning keypiyatigha téximu özgichilik ata qilghan idi.

Méhmanlar birer qur ghizaliniwalghandin kéyin pa'aliyet riyasetchiliridin amérika uyghur birleshmisining re'isi élshat hesen söz qilip, ötken bir yilda bolup ötken ehwallarni omumiy jehettin yekünlidi. Shundaqla bügünki yéngi yilliq tebrik sorunigha qedem teshrip qilghan rabiye qadir xanimni sözge teklip qildi.

Dunya uyghur qurultiyining re'isi rabiye xanim söz qilip, amérika uyghur birleshmisining kichikliktin zoriyish, shundaqla uyghurlarning amérikidiki on nechche a'ilidin bügünkidek nechche ming a'ilige köpiyish tarixini eslep ötti. Shundaqla köpchilikning yéngi yilini chin dilidin tebrikleydighanliqini bildürdi.

Uyghurlarning hayatni söyüsh, xushalliqtin teng behrilinish arzuliri héchqachan naxsha -ussulsiz ötken emes. Bu yilqi yéngi yilliq tebrik soruni bu nuqtini téximu roshen namayan qildi. Pa'aliyetning béshidila orunlinishqa bashlighan naxsha, muzikilar köpchilikning ussulgha chüshüshi bilen téximu ewjige chiqip, sorun keypiyatini biraqla janlanduruwetti.

Muhajirettiki uyghurlar üchün chet'ellerde tughulghan we ösüwatqan perzentlerning milliy kimliki we ana til bohrani herqachan bir chong téma bolup kelgen idi. Emma bügünki yéngi yilliq pa'aliyet sorunigha qatnashqan bir qisim ösmürlerning özliri teyyarlap kelgen bir qisim nomurlar qatarida uyghurche naxsha, ussullarni shunche qamlashturup orunlishi, shundaqla uyghur tilidiki shé'irlarni janliq déklamatsiye qilishi bu jehette tirishchanliq körsetken ata-anilarning ejrining bikargha ketmigenlikini namayan qildi.

Ösmürlerning alaqidar nomurliri körsitilip bolghandin kéyin, amérika uyghur birleshmisining re'isi élshat hesen söz qilip, ata-anilarning bu jehette körsetken tirishchanliqini maxtashqa erziydighanliqini, shuning bilen birge, amérika uyghur birleshmisi teshkillep kéliwatqan uyghur ana til sinipining alaqidar chiqimliri üchün amérikidiki uyghur ata-anilarning munasiwetlik yardemde bolushini ümid qilidighanliqini bildürdi.

Pa'aliyetning axirida amérika uyghur birleshmisining re'isi élshat hesen ziyaritimizni qobul qilip, yéngi yilning uyghurlar üchün yéngi ümid élip kéliwatqanliqini, chet'ellerdiki uyghurlarning bu yéngi yilda téximu zich uyushup yéngi netijilerni qolgha keltürüshige tilekdashliq bildüridighanliqini bildürdi.

Pa'aliyet köpchilikning qizghin ishtirak qilishi, bolupmu yashlarning qizghinliqi seweblik kéche sa'et birdin ashqanda axirlashti. Köpchilik bir-birige yéngi yilliq tebrik we salamlirini éytqach xushalliq ichide tarqaldi.

Toluq bet