Истанбулда әйса йүсүп алиптекин вапатиниң 19 - йилллиқи хатириләнди

Ихтиярий мухбиримиз арслан
2014-12-15
Share
eysa-yusuf-efendi-xatirlesh-yighinida-soz-qiliwatqanlar.jpg Әйса йүсүп алиптекин вапатиниң 19 - йилллиқини хатирләш йиғини
RFA/Arslan


2014 - Йили 12 - айниң 13 - күни шәрқий түркистан давасиниң байрақдари мәрһум әйса йүсүп алиптекинниң вапатиниң 19 - йили мунасивити билән мәрһумни хатириләп илмий муһакимә йиғини өткүзүлди.

Йиғин қуран кәрим тилавәт қилиш вә шеһитләрниң роһиға атап дуа қилиш билән башланди. Йиғинда түрк әдәбият вәхпиниң рәиси сәрвәт қапақли сөз қилип, мәрһум әйса йүсүп алиптекинниң һаят вақтида биргә өткән вә биргә паалийәт қилған әслимлирини тилға елип өтти.

Йиғинниң кейинки бөлүмлири илмий муһакимә билән давам қилди. Илмий муһакимә йиғинида истанбул универистетиниң оқутқучси профессур абдулқадир донук әпәнди, егә универистетиниң оқутқучи профессур алимҗан инайәт, мармара универистетиниң оқутқучиси доктор абдулһәмит авшар, язғучи вә сабиқ парламент әзаси профессур нәвзат ялчинташлар әйса йүсүп алиптекин вә шәрқий түркистан мәсилиси тоғрисида сөз қилди.

Истанбул түрк дуняси әдәбият фондиниң йиғин залида ечилған бу мурасим шәрқий түркистан вәхпи тәрипидин уюштурулған болуп, мурасимға мәрһумниң оғли әркин алиптекин, профессур нәвзат ялчинташ, профессур мәһмәт сарай, расим җенис қатарлиқ муһим әрбаблар қатнашти вә мәрһум әйса йүсүп алиптекинни хатириләп муһим сөз қилди.

Доктор абдулһәмит авшар әйса йүсүп алиптекинниң һаяти һәққидә сөзләп өткәндин кейин, униң түркийидики сиясий һаятини икки түргә айрип мундақ деди: "әйса йүсүп алиптекин түркийидә икки саһәдә паалийәт елип барди, буларниң биринчиси, түркийиниң ички сияситигә мунасивәтлик коммунизмға қарши күрәш қилиш йолида тутқан сиясий мәйдани. Иккинчиси болса, шәрқий түркистанни асас қилған һалда ташқи түркләр йәни түркийигә қарита сиртта вә ичидә бир хил қизғинлиқни ойғитишқа охшаш паалийәтләр йәни түркпәрвәрлик мәйдани. Әйса йүсүп алиптекин түркийидә коммунизмға қарши күрәш қилди. Коммунизмниң әпти - бәширини хәлқ аммисиға ечип ташлиди вә коммунизмға қарши еқимлар билән бирликтә һәрикәт қилди. Шуниң үчүн әйса йүсүп алиптекин коммунизмға қарши вә охшаш вақитта хәлқини сөйидиған милләтпәрвәр иди."

Биз мәрһум әйса йүсүп алиптекин тоғрисида пикир қарашлирини елиш үчүн уни йеқиндин тонуйдиған вә мәрһум һаят вақитда биргә өткән явропа шәрқий түркситан бирликиниң рәиси әнивәрҗан әпәнди билән сөһбәт елип бардуқ.

Әнивәрҗан әпәнди әйса йүсүп алиптекинниң өзигә қилған вәсийәтлирини тилға елип мундақ деди: "мән һәр қетим германийидин истанбулға келип мәрһумни зиярәт қилған вақтимда, оғлум немә иш қиливатисиләр, дәйтти вә хитайниң зулумидин, шәрқий түркистан хәлқиниң езиливатқанлиқидин дуняниң хәвири боливатамду? дәп сорайтти. Мән явропада елип бериватқан паалийәтлиримизни аңлитип тураттим. Мәрһум әйса әпәнди қолумни чиң тутуп туруп, һәр заман қилидиған гипи: " силәр яшлар бу даваниң игилири, биз қерип кетиватимиз, байрақни силәргә тапшуруп берип бу дунядин өтүп кетимиз, силәр вәтәнниң мустәқиллиқи үчүн хизмәт қилиңлар, дәйтти."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт