Zeytinburnuda sherqiy türksitan kéchiliki pa'aliyiti ötküzüldi

2013 _ Yili 25 - sintebir charshenbe küni istanbuldiki sherqiy türkistan köchmenler jem'iyitining uyushturushi bilen zeytinburnu medeniyet - sen'et zalida, sherqiy türkistan kéchiliki pa'aliyiti ötküzüldi.

Bu pa'aliyette qazaq türklirining türkiyige qachan we qandaq köchüp kelgenliki, köchmenlerning yol we tagh - dawanlarni éshish jeryanida tartqan japa - musheqqetliri anglitildi we qazaqlarning örp - adet, medeniyetliri we naxsha - usul sen'etliri namayen qilindi.

Istanbulning zeytinburnu nahiyilik hökümetning uyushturushi bilen her yili bir qétim ötküzülüp kéliwatqan medeniyet tonushturush künliri namliq pa'aliyetning 10 - qétimliqi bu yil 16 - sintebir bashlan'ghan bolup her küni bir teshkilat özliri yashawatqan yurt we xelqining örp - adet medeniyetlirini tonushturup pa'aliyet körsitip kelmekte.

Bu munasiwet bilen zeytinburnu medeniyet - sen'et zalida ötküzülgen “Sherqiy türkistan kéchiliki” namliq pa'aliyetke, zeytinburnu sheher bashliqi murad aydin, mu'awin sheher bashliqi ilyas saka, gökxan qasap, zeytinburnu nahiye hakimi ufuq sechilmish, zeytinburnu saqchi bashliqi mehmet yashar, herbiy qisim zeytinburnu shöbe bashliqi géniral éli quli'achiq, adalet we tereqqiyat partiyisi zeytinburnu shöbe bashliqi bahaddtin unwer, jumhuriyet xelq partiyisi zeytinburnu shöbe bashliqi metin doghan, milletchi heriket partiyisi zeytinburnu shöbe bashliqi fethi ehmet alp'arslan, sa'adet partiyisi zeytinburnu shöbe bashliqi kemal xeyirli oghli, zeytinburnudiki sherqiy türkistan ammiwiy teshkilatlarning mes'ulliri we köp sanda qazaq, Uyghur, türkler qatnashti.

Pa'aliyet bashlinishtin ilgiri polu bilen ziyapet bérildi. Pa'aliyette, yawro asiya türk jem'iyetler birleshmisining re'isi isma'il chin'giz, qazaqlarning 1934 - yilidin bashlap Uyghur diyaridin hijret qilip, türkiyige qandaq köchüp kelgenliki, ularning uzun musapiliq yol, igiz - tagh dawanlarni éshish jeryanida uchrighan qiyinchiliq we japa musheqqetliri toghrisida resim silayd körsitish arqiliq chüshendürüp ötti.

Pa'aliyette zeytinburnu sheher bashliqi murad aydin, sherqiy türkistan köchmenler jem'iyitining re'isi yaqupjan, zeytinburnu nahiye hakimi ufuq sechilmish ependilerning échilish nutiqi bilen bashlandi.

Yaqupjan sözide birlik we barawerlik toghrisida toxtaldi we sherqiy türkistan köchmenler jem'iyiti, xitay zulumi astidiki sherqiy türkistanning awazi bolushni dawam qilidighanliqini ipadilidi we hemsheherlirimizni bir yerge jem qilip, bu güzel pa'aliyetni orunlashturushqa shara'it yaritip bergen sheher bashliqi murad aydin'gha teshekkür éytimiz, dédi. Bu yerdiki birlik, sherqiy türkistan, zeytinburnu we istanbuldiki birlikimizni körsitidu. Bir millet choqum medeniyet - örp adetlirini qoghdash bilen mewjutluqini saqlap qalidu, dédi.

Yaqupjan yene mundaq dédi:

- Hemmimizge melum bolghandek medeniyet, bir milletning, bir xelqning bir döletning eng muhim xezinisidur. Bir milletning mewjutluqini saqlap qalghan, uning tarixi, medeniyiti we qimmetlik qarashliridur. Tarixi, medeniyiti we milliy qimmetlirige ige chiqmighan bir millet yoq bolushqa mehkümdur. Eger bir millet medeniyitini güllendürgen bolsa, u millet mewjutluqini dawam qilidu, dégenliktur. Medeniyetler otturisidiki dostluq, medeniyetler otturisidiki hemkarliq, u xelqlerning islahati we tereqqiyatigha türtke bolidu, muhim bolghini, birlik we barawerlik ichide medeniyet bilen yashash we medeniyetni güllendürüshtur we kelgüsi ewladlargha özleshturmektur. Men bu kichilik pa'aliyetning, millitimizge, türkiyige, türk islam dunyasigha xususen xitay ishghal astida yashawatqan sherqiy türkistanliq qérindashlirim üchün xeyirlik we paydiliq bolushigha wasite bolushni arzu qilimen. Hemminglargha rehmet éytimen.

Pa'aliyette söz qilghan zeytinburnu sheher bashliqi murad aydin, zeytinburnuda balqanlardin ottura asiyaghiche keng bir jughrapiyidin kélip toplashqan insanlarning mewjut ikenlikini bildürdi we türk dunyasining oxshimighan jughrapiyiliridin kelgen insanlar yashawatqanliqini, bu zeytinburnuning bashqa sheherlerge oxshimaydighan perqliq alahidlikiliridin biri ikenlikini, bu alahidlik bilen zeytinburnu, hem türkiye hem türk dunyasi üchün kichik bir ülge ikenlikini bildürdi we buning eng yaxshi örniki bu kéchidiki “Sherqiy türkistan kéchiliki” pa'aliyiti ikenlikini bildürdi.

Murad aydin sözide yene, zeytinburnu shehirining, bir qanche qétim xelq'araliq sherqiy türkistan yighinlirigha sahibxanliq qilghanliqini, sherqiy türkistandin türkiyige köchüsh jeryani toghrisida mexsus 6 qsimliq “Sürgün we ölüm” namliq höjjetlik filim ishlep chiqqanliqini, sherqiy türkistan dawasini qollap quwwetlep kéliwatqanliqini, xizmet - pa'aliyetlerde sherqiy türkistan jem'iyetliri bilen yéqindin hemkarliship kéliwatqanliqini ipadilidi.

3 Sa'et dawam qilghan bu pa'aliyette qazaqche, Uyghurche, türkche naxshilar oquldi. Türk dunyasi sen'etchisi bunyamin aqsün'gür we türk awazi sen'et ümikining orunlishida Uyghurche, qazaqche, qirghizche we türkche naxsha - muzikilar teqdim qilindi.

Türk sen'etchi bunyamin aqsün'gür we uning gurupisi sehnide Uyghurche kiyim keygen bolup, güzel türkistan qatarliq bir qanche parche Uyghurche naxsha - muzika teqdim qildi.

Bu pa'aliyet 16 _ sintebir bashlan'ghan bolup 4 - öktebirgiche 20 kün dawam qilidiken.