Язғучи зордун сабирниң германийәдики уйғурлар билән биллә өткүзгән бир һәптилик хатириси

Мухбиримиз қутлан
2016.06.22
Zordun-Sabir-Germaniye-Uyghurshunas-Annemariye-fon-Gabain.jpg Мәрһум язғучи зордун сабир 1987-1988-йилидики германийә зиярити мәзгилидә мәшһур герман түркологи аннемарийә фон габаин ханим билән биллә.
Social Media

Мәрһум язғучи зордун сабирниң аләмдин өткинигә бу йил 18 йил болған болсиму, лекин униң уйғур хәлқигә қалдуруп кәткән мол мәзмунлуқ әдәбий әсәрлири һелиһәм оқурмәнләрниң қәлб төридин орун елип кәлмәктә.

Язғучи зордун сабирниң 1988-йилидики германийә сәпири униң һаят мусаписи билән иҗадийәт дунясидики унтулмас бир вәқә болди. У вәтәнгә қайтқандин кейин “явропаға сәпәр” намлиқ чоң һәҗимлик әдәбий хатириси билән “сизиқ адәмләргила” намлиқ һекайисини елан қилди.

Һалбуки, өткүр қәләмлик бу язғучи әйни чағдики чәклимә түпәйли явропада көргәнлири вә һес қилғанлириниң һәммисини толуқи билән йезишқа мувәппәқ болалмиди. Болупму германийәниң мюнхен шәһиридики уйғур муһаҗир җамаити билән биллә өткүзгән бир һәптилик унтулмас һаяти оқурмәнләргә сир һалитидә қалған иди.

Язғучи зордун сабир аләмдин өтүп 18 йил өткәндә мюнхендики һаят шаһитлар 1988-йили мәрһум язғучиниң германийәдики уйғур җамаити билән биллә өткүзгән қиммәтлик бир һәптиси һәққидә әслимә тәқдим қилди.

Әркин алиптекин буниңдин 28 йил бурунқи һаят хатирисини варақлап, язғучи зордун сабирниң мюнхенда болған күнлиридики унтулмас вәқәләрни әслимә қилиду. У язғучи зордун сабирниң мюнхенда өзи билән өткүзгән шәхсий сөһбәтлиридә уйғур деһқанлири вә улар дуч келиватқан еғир мәсилиләр һәққидә интайин тәпсилий мәлумат бәргәнликини тилға алиду.

Әйни чағда язғучи зордун сабирни өз өйидә турғузған әнивәрҗан әпәндиму бу һәқтә әслимә тәқдим қилип, зордун сабирниң бир даңлиқ язғучи болушиға қаримай, турмушта интайин аддий-садда вә һаятни сөйидиған киши икәнликини илгири сүриду.

Әсқәрҗан әпәндиму язғучи зордун сабирниң бир сәнәткарға хас қизиқиш вә сәмимийәт билән әйни чағда мюнхендики уйғур аилилириниң күндилик һаяти, аилә тарихи, мәдәнийәт қурулмиси вә һәтта исим-фамилиригичә диққәт қилғанлиқини тилға алиду.

Әсқәрҗанниң илгири сүрүшичә, франкфурттики түркологийә институти әйни чағда язғучи зордун сабирниң өз авазини лентиға елип, уни хатирә үчүн мәзкур институтниң архипида сақлап қойған икән.

Әнивәрҗан әпәнди язғучи зордун сабирниң мюнхендики мәзгилидә һәтта “азадлиқ радийоси” ниң өзбекчә бөлүми уюштурған сөһбәтни қобул қилғанлиқини алаһидә тилға алиду. У йәнә язғучи зордун сабирниң мюнхендики уйғурларни көрүп интайин хош болғанлиқини шундақла әйни чағда мюнхендики санақлиқ уйғурларниңму зордун сабир билән аҗайип көңүллүк бир һәптини өткүзгәнликини әслимә қилиду.

Ахирида әркин алиптекин язғучи зордун сабирниң әйни вақиттики германийә зиярити мәзгилидә хитай даирилиридин келидиған сиясий бесимға қаримай мюнхенға келиши вә бу йәрдики уйғур җамаити билән бир һәптә биллә болушини “аҗайип зор җасарәт” дәп тәкитләйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.