Рәссам мәрвайит һапиз: “талантлиқлар бағчиси” намлиқ курс чәтәлдики бошлуқни толдурди

Ихтиярий мухбиримиз әркин тарим
2021.08.30
Share on WhatsApp
Share on WhatsApp
Рәссам мәрвайит һапиз: “талантлиқлар бағчиси” намлиқ курс чәтәлдики бошлуқни толдурди Һапиз ханим ачқан, муһаҗирәттики уйғурларниң зор алқишиға еришкән “талантлиқлар бағчиси” намлиқ рәсим курсиниң тордики дәрслики. 2021-Йили авғуст.
RFA/Erkin Tarim

Хитай һөкүмити уйғур диярида җаза лагерлирини ечип, ана тилидики маарипни әмәлдин қалдуруп, уйғур миллий кимликигә зиян бериватқан бир пәйттә тонулған уйғур рәссам мәрвайит һапиз ханим ачқан “талантлиқлар бағчиси” намлиқ рәсим курси чәтәлләрдики уйғурларниң зор алқишиға еришкән. 2-Айда ечилған рәсим сизиш курсиниң иккинчи мәвсумлуқ оқушиму башланған. Биз мәзкур курс һәққидә мәлумат игиләш үчүн тор курсиниң саһиби мәрвайит һапиз ханим вә курсантлар билән сөһбәт елип бардуқ. Һәммә бирдәк мәзкур тор арқилиқ рәсим сизиш өгитиливатқан курсниң чәтәлдики уйғурлар арисидики зор бошлуқни толдурғанлиқини тәкитләшти.

Мәрвайит һапиз ханим алди билән мәзкур курсни ечиштики мәқсити һәққидә тохтилип мундақ деди:

“биз уйғурлар вәтән сиртида қайси кәсиптә қайси саһәдә нәтиҗә қазинайли яки бир иш қилайли, өзимизниң иқтидариға лайиқ қандақ бир иш қилайли, һазирқи уйғурларниң мәвҗудийити вә келәчики үчүн наһайити зор пайдиси болиду. Буниң әһмийити наһайити зор дәп чүшинимән. Әмди өзүмниңму узундин тартип вәтән ичи яки сиртида болсун охшимиған тилдики милләтләргә нурғун оқуғучиларға кәспий дәрсләрни бәрдим. Бир бошлуқ бар иди, мушу билимимни уйғур балиларға бәрсәм өзүмни немә дегән бәхтлик һес қилаттим дәйдиған бир ой-пикрим бар иди. Бир яман ишниңму яхши тәрипи болиду дәп, корона вабаси тарқалғанда бәзи достлирим ‛тор арқилиқ уйғурларға рәсим сизиш дәрси бәрсиңиз яхши болатти‚ дегән тәләп-пикирлирини оттуриға қойди. Мән буни яхши ойлишип 2-айниң оттурилирида бу курсни ачқан идим”.

Мәрвайит һапиз ханим бу курсқа қисқиғинә вақит ичидә көп санда уйғурниң тизимлатқанлиқини баян қилип мундақ деди: “мән буниң еланини тарқатқандин кейин ойлимиған йәрдин тезла вақит ичидә 50 әтрапида оқуғучи тизимлатти. Бу оқуғучилар дуняниң һәммә йеридин бар, американиң бостон, вашингтон, санфирансизко, булардин сирт явропаниң әнглийә, финландийә, голландийә вә түркийә қатарлиқ җайлиридин 48 уйғур оқуғучи мәндин рәсим сизиш дәрси алди. Буларға қарап мән техиму көп хурсән болдум”.

Мәзкур оқуғучиларға-2020 йили2-айдин 7-айғичә дәрс өтүлгәндин кейин-7айда тәтилгә қоюветилгән. Мәрвайит һапиз ханим тәтил җәрянида қайта-қайта ойлиниш нәтиҗисидә “талантлиқлар бағчиси” намида курс ечип техиму күчәйтишни қарар қилғанлиқини баян қилип мундақ деди: “оқуғучилар 5 ай дәрс алғандин кейин, тәтилгә қоюп бәрдуқ, андин кейин бу һәқтә мәндә күчлүк бир арзу пәйда болди. Бу курсни күчлүк кәспйлики болған бир һаләттә давамлаштурсақ болидикән дегән ой билән тәтил җәрянида мәзкур курсниң намини ‛талантлиқлар бағчиси‚ дәп бекиттим. Мәндин рәсим сизиш курси еливатқан оқуғучиларниң нә қадарталантлиқ икәнлики, тиришчанлиқи, тапшуруқларни вақтида ишлиши, ата-анилириниң пәрзәнтлирини қоллиши вә балилардики тезла илгириләш қатарлиқ бу әмили әһвални нәзәрдә тутуп туруп, тор курсиға ‛талантлиқлар бағчиси‚ дегән исимни бәрдим. Мәнму бу курсқа наһайити әтраплиқ қаридим, оқуғучиларни ата-анилириму қоллиди. Шуниң билән чәтәл тилида ана-тилда билим алидиған бир курс болуп қалди. Бу җәһәттин елип ейтқандиму курсимиз наһайити муһим дәп ойлаймән”.

Мәрвайит һапиз ханим 21-чесла һәр бир оқуғучи сизған 10дин рәсимни таллап, “талантлиқлар бағчиси” намлиқ курсниң ечилиш мурасимини өткүзгәнликини, ата-аниларниң зор қоллишиға еришкәнликини баян қилип мундақ деди: “чүнки бу учришишта оқуғучилар өзара рәсимлирини көрситиш, һәтта ана-аниларму тонушуш пурситигә еришти. Шуниң билән уйғурлуқ туйғулиримизниму күчәйткән болдуқ”.

Тонулған рәссам мәрвайит һапиз ханимниң билдүрүшичә мәзкур курсқа қатнашқан уйғур оқуғучиларға һәптидә 9 саәт рәсим сизиш дәрси бериливатқан болуп, бу дәрс уйғур тилида өтүлидикән. Мәрвайит һапиз ханим уйғур оқуғучиларға 5 ай дәрс өтүш җәрянида, буниң әһмийитини техиму яхши чүшинип йәткәнликини, оқуғучиларниң сани 100гә йәтсиму йетәкләп кетәләйдиғанлиқини тәкитлиди.

Мәрвайит һапиз ханим 7 яштин юқири, рәсим сизишқа қизиқидиған һәр қандақ уйғурниң бу курсқа тизимлатса болидиғанлиқини илгири сүрди.

Рәсим сизиш курси ечилған күндин тартип курсқа қатнишиватқан америкиниң санфирансиско шәһиридә туруватқан 8 яшлиқ сәбинә, мәрвайит ханимниң дәрсини наһайити яхши көридиғанлиқини, дәрсләрниң бәкла көңүллүк өтүватқанлиқини тәкитлиди.

Сәбинәниң дадиси турсунҗан әпәнди бу курсниң чәтәлдә әвладлирини тәрбийәләватқан уйғурларниң бир бошлуқини толдурғанлиқини оттуриға қойди.

Американиң бостон шәһиридә туруватқан 12 яшлиқ уйғар абликим мәрвайит һапиз ханимниң дәрсидә рәсим сизишнила өгинип қалмастин уйғур мәдәнийитиниму өгиниватқанлиқини билдүрди.

Уйғарниң аниси гүлнар ханим оғлиниң уйғур тилида бу дәрсни еливатқанлиқидин уйғур мәдәнийитини, уйғур кимликини күчәйтиш үчүн бу курсниң зор пайдилиқ болуватқанлиқини тәкитлиди.

Мәрвайит һапиз ханим шинҗаң педагогика университети гүзәл сәнәт иниститутида 1983-йилидин, 1996-йилғичә оқутқучи болуп ишлигән. Бу җәрянда у көплигән рәсимләрни сизған һәм нурғунлиған мәмликәт дәриҗилик көргәзмиләргә талланған.

У 1996-йили германийәгә кәлгәндин буянму тохтимай иҗадийәт билән шуғуллинип, асасән уйғурлар һаятини мәзмун қилған әсәрләрни яритип, германийәниң көплигән шәһәрлиридә көплигән шәхси көргәзмиләрни ачқан. Униң әсәрлири мюнхен шәһиридики чоң көргәзмиләргә таллинип, сәнәт музейлирида көргәзмигә қоюлған вә көп қетимлап мәтбуатлардиму тонуштурулған.

У 2010-вә 2013-йиллири түркийә мәдәнийәт министирлиқиниң тәклипи билән түркийәниң истанбул қатарлиқ шәһәрләрдики дөләт дәриҗилик сәнәт сарайлирида әсәрлирини көргәзмигә қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.