Рәссам мәрвайит һапизниң иниси вә келининиң тутқунда икәнлики айдиңлашти

Германийәдә яшаватқан рәссам мәрвайит һапиз ханимниң бүгүн радийомизға ашкарилишичә, униң қумулда оқутқучилиқ қиливатқан иниси батур һапиз билән, униң аяли гүлсимай батур, 2018-йилиниң ахири тутқун қилинған. Мухбиримизниң бу һәқтә елип барған ениқлашлири давамида қумулдики алақидар хадимлар, мәрвайитниң иниси вә униң аялиниң әһвали һәққидә тәпсилий мәлумат бәрмигән болсиму, уларниң тутқунда икәнликини инкар қилмиди.

Германийәдә яшаватқан рәссам мәрвайит һапизниңму 2017-йилдин башлап қумулдики уруқ-туғқанлири билән алақиси пүтүнләй үзүлгән. У 2018-йилиниң ахириға кәлгәндә, иниси батур һапиз билән униң аяли гүлсимай батурниң тутқунда икәнлики һәққидә ишарәтлик бир учур алған. Әмма юрттики уруқ-туғқан вә тонуш-билишлириниң бихәтәрликини ойлшип, бу һәқтә илгириләп әһвал сүрүштә қилалмиған вә учурниң тоғрилиқини айдиңлаштуралмиған. У пәқәт йеқинда қумулни зиярәт қилған бир тонуши арқилиқ инисиниң 15 йиллиқ, униң аялиниң болса 7 йиллиқ кесилип кәткәнликидин ениқ һалда учур алған.

Биз бу учурниң тоғрилиқини дәлилләш үчүн қумулдики һәрқайси идарә-органларға телефон қилдуқ.

Тонуштурулушичә, батур һапиз 1973-йили, гүлсимай 1975-йили туғулған. Улар яшлири 50 кә йеқинлашқан вә икки пәрзәнтини алий мәктәпкә йолға салидиған мәзгилидә, бу қисмәткә дуч кәлгән.

Мәрвайитниң баян қилишичә, иниси батур һапиз вә аяли гулсимай батур қумул астанә оттура мәктипиниң оқутқучиси болуп, улар миллий өрп-адәтләргә садиқ һалда яшап кәлгән, иман-етиқадлиқ кишиләр болғанлиқи үчүнла, хитайниң нәзиридә хәтәрлик кишиләр болуп көрүлгән.

Телефонимизни қобул қилған, қумулдики бир оттура мәктәп хадими, батур һапиз билән гүлсимай батурниң қумул шәһәрлик 3-оттура мәктәпниң оқутқучилири икәнликини тилға алди. Әмма уларниң нөвәттики әһвали һәққидә мәлумат берәлмиди.

Инисиниң пәрзәнтлирини яхши тәрбийәләшкә өзини атиған мәсулийәтчан бир дада икәнликини икәнликини тилға алған мәрвайит ханим, инисидин бәкрәк, келининиң һәр җәһәттики бихәтәрликидин қаттиқ әндишә қиливатқанлиқини баян қилди.

Телефонимизни қобул қилған қумул шәһәрлик 3-оттура мәктәп йәни астанә оттура мәктипиниң хадими, батур һапизинң хизмәт орнида бар яки йоқ икәнлики һәққидики соалимизға җавабән "йоқ" дәп җаваб бәрди. Өзиниң мәктәп оқутуш бөлүминиң хадими икәнликини ашкарилиған бу хадим, қолидики оқутқучилар тизимликидә гүлсимай батур исимлик бир оқутқучиниңму йоқ икәнликини баян қилди. Биз униңдин "бурун болғанму?" дәп сориғинимизда "болған "дәп җаваб бәрди. Биз бу хадимдин батур һапиз билән гүлсимай батурниң қанчә йиллиқтин кесилгәнликини сориғинимизда, телефонни мәзкур ишханидики йәнә бир хадим қолиға алди вә бу телефонниң өзлиригә хата урулғанлиқини баян қилиш арқилиқ, ениқлаватқан ишимизниң дөләт мәхпийәтликигә ятидиғанлиқини ишарәтлиди.

Бүгүнгә қәдәр германийәдики уйғур паалийәтлиригә, өз кәспий саһәси бойичә һәссә қетип келиватқан рәссам мәрвайит һапиз ханим, иниси вә келининиң бу тәқдирдин ениқ хәвәр тапқандин кейин, сиясий паалийәтләрдә техиму актип рол елиш зөрүрийитини һес қиливатқанлиқини баян қилди.

Юқирида, рәссам мәрвайит һапизниң иниси батур һапиз билән униң аяли гүлсимай батурниң тутқунда икәнлики һәққидә мәлумат бәрдуқ.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар