Әнқәрәдә шәрқий түркистан миллий армийәси һәққидә илмий муһакимә йиғини өткүзүлди

Ихтиярий мухбиримиз әркин тарим
2019-04-10
Елхәт
Пикир
Share
Принт
Шәрқий түркистан миллий армийәси қурулғанлиқиниң 74-йиллиқини хатириләш мунасивити билән өткүзүлгән илмий муһакимә йиғинида доктор алимҗан боғда әпәнди сөзлимәктә. 2019-Йили 6-апрел, әнқәрә.
Шәрқий түркистан миллий армийәси қурулғанлиқиниң 74-йиллиқини хатириләш мунасивити билән өткүзүлгән илмий муһакимә йиғинида доктор алимҗан боғда әпәнди сөзлимәктә. 2019-Йили 6-апрел, әнқәрә.
RFA/Erkin Tarim

4-Айниң 6-күни түркийәниң пайтәхти әнқәрәдә шәрқий түркистан миллий армийәси қурулғанлиқиниң 74-йиллиқини хатириләш мунасивити билән мәхсус илмий муһакимә йиғини өткүзүлди. Уйғур тәтқиқат институти тәрипидин уюштурулған йиғинға әнқәрәдики уйғур зиялийлар вә бәзи уйғур оқуғучилар иштирак қилди.

Уйғур институтида өткүзүлгән йиғин, алди билән уйғурларниң әркинлики үчүн шеһит болғанларниң роһиға атап, қуран тилавәт қилиш, арқидин түркийәниң дөләт марши билән шәрқий түркистанниң истиқлал маршини оқуш билән башланди.

Кейин йиғинниң күн тәртипигә бинаән әнқәрәдики һаҗәттәпә университети тарих оқутқучиси дотсент әркин әкрәм әпәнди «дөләт вә армийә», қаһраманмараштики сүтчү имам университети диний илимләр кәспи оқутқучиси доктор алимҗан боғда әпәнди болса «миллий армийәниң омумий әһвали», әнқәрә университети доктор аспиранти муһәммәтели мәмәтимин «миллий армийә билән гоминдаң армийәсиниң күч селиштурмиси» вә әнқәрәдики һаҗи байрам вели университети магистир оқуғучиси мәһмутҗан ясин болса «миллий армийәдә ишлитилгән һәрбий унван намлири вә орденлар» темилирида доклат бәрди.

Доктор әркин әкрәм әпәнди «дөләт вә армийә» мавзулуқ доклатида шәрқий түркистан миллий армийәсиниң 1945-йили 4-айниң 8-күни рәсмий қурулғанлиқини баян қилди.

Әнқәрә университети тарих кәспидә докторлуқ оқуватқан муһәммәтели мәмәтимин шәрқий түркистан миллий армийәсиниң сани гоминдаң армийәсиниң санидин аз болсиму, қисқа вақит ичидә күчлүк мунтизим армийәгә айланғанлиқини баян қилди.

Доктор алимҗан боғда әпәнди «миллий армийәниң омумий әһвали» темисида бәргән доклатида нуқтилиқ һалда 1933-йили қәшқәрдә елан қилинған шәрқий түркистан ислам җумһурийәти мәзгилидики уйғурларниң армийәси тоғрисида мәлумат бәрди. Доктор алимҗан боғда әпәнди шәрқий түркистан ислам җумһурийәти мәзгилидә мунтизим миллий армийә болмисиму, әмма армийә барлиқини оттуриға қойди.

Йиғинниң ахирида әнқәрәдики һаҗи байрам вәли университети магистир оқуғучиси мәһмутҗан ясин болса «миллий армийәдә ишлитилгән һәрбий унван намлири вә орденлар» темисида доклат бәрди. У, доклатида 1945-йили 4-айниң 8-күни қурулған шәрқий түркистан миллий армийәсидә ишлитилгән һәрбий унван намлири вә орденлар тоғрисида мәлумат бәрди.

Йиғин ахирлашқандин кейин «шәрқий түркистан миллий армийәсиниң 74-йиллиқини хатириләш йиғини» ға иштирак қилған әнвәр әпәнди вәтәндики вақтида шәрқий түркистан миллий армийәси тоғрисида мәлуматларға игә болғанлиқини, әмма бу йиғинда бу һәқтә көп йеңи мәлуматларға еришкәнликини баян қилди.

Бу әнқәрәдә өткүзүлгән тунҗи қетимлиқ шәрқий түркистан миллий армийәсини хатириләш йиғини болуп, уйғур институти мәсуллириниң ейтишичә бундин кейин һәр йил өткүзүлидикән.

Пикирләр (0)
Share
Толуқ бәт