Қәшқәрдә оғлини мисирға оқушқа әвәткән ата‏-ана 5 вә 8 йиллиқтин кесилгән

Мухбиримиз шөһрәт һошур
2020-04-21
Елхәт
Пикир
Share
Принт
17 яшлиқ оғли абдухалиқ әзизни шәхсий хираҗити билән мисирға оқушқа әвәткән әзиз насир билән аминә абдубақи, (2016-йили йәни тутқун қилиништин бирқанчә ай бурун), қәшқәр.
17 яшлиқ оғли абдухалиқ әзизни шәхсий хираҗити билән мисирға оқушқа әвәткән әзиз насир билән аминә абдубақи, (2016-йили йәни тутқун қилиништин бирқанчә ай бурун), қәшқәр.
Abduxaliq Eziz teminligen

Ашкарилинишичә, дәврниң қисмәтлири сәвәбидин башланғучтин юқири оқуш имканиға еришәлмигән шопур әзиз насир билән аилә аяли аминә абдулбақи һаятидики бу һәсрәткә шипа тепиш үчүн 17 яшлиқ оғли абдухалиқ әзизни шәхсий хираҗити билән мисирға оқушқа әвәткән. Улар бу қарари үчүн иқтисадий җәһәттин көп чиқимдар болуп кетиш хәвпини ойлиған, оғли билән бирқанчә йиллап көрүшәлмәй қелиш қийинчилиқини тәхмин қилған, әмма ахирида әр-аял иккийләнниң 5 вә 8 йиллиқтин кесиветилиш қисмитини хиялиға кәлтүрмигән иди.

Нөвәттә түркийәдә яшаватқан абдухалиқ әзизниң бу гуваһлиқ баянатидин мәлум болушичә, бу йил 55 яшларға киргән вә 3 йилдин буян из-дерики болмайватқан әзиз насир узун мәзгил қәшқәр шәһәрлик хәлқ бағчисиниң шопури болуп хизмәт қилған.

Әр-аял һәр иккиси башланғучтин юқири оқуш имканиға еришәлмигини үчүн көп һәсрәт чәккән әзиз насир билән аминә абдулбақи 20 йилчә тапқан-тәргәнлирини дәсмайә қилип 2015‏-йили оғли абдухалиқ әзизни мисирға оқушқа әвәткән. Абдухалиқ мисирда көргәнлири вә мәктәптә өгәнгәнлирини һәр күни дегүдәк аилисигә сөзләп берип, ата-анисиға зор үмидләрни беғишлап туруватқан мәзгилидә, йәни 2016‏-йилниң ахирлириға кәлгәндә уштумтут дадиси билән алақиси үзүлгән.

Телефонимизни қобул қилған қәшқәр шәһәрлик хәлқ бағчисиниң ишхана хадими дәсләптә өзлириниң әзиз насир исимлик бир хизмәтчиси болғанлиқи вә униң шопур икәнликини йошурмиди, әмма арқидин намәлум сәвәб билән бу идаридә әзиз насир дәп бир хизмәтчиниң йоқ икәнликини ейтти. Биз униңдин бу идаридики тутқун қилинған хизмәтчиниң ким икәнликини сориғинимизда, у тутқунда бир киши барлиқини ашкарилиған болсиму, әмма кимлики һәққидә мәлумат бәрмиди. Бу идариниң аманлиқ хадими өзиниң бу орунға йеңи икәнликини әскәртип, шопур әзиз насирни тонумайдиғанлиқини билдүрди.

Абдухалиқ дадисиниң әһвалини биләлмәй туруватқан мәзгилидә, йәни 2017‏-йилиниң бешида аписиниңму телефони азлашқа башлиған. Арида қисқа бир мәзгил алақиси үзүлүп тәкрар бағланған. 2017‏-Йили 4-айда аписи өзиниң «тәрбийәләш» кә елип меңилғанлиқини билдүрүп, үндидарда униң билән хошлашқан. Әнә шу күндин етибарән бәш җанлиқ бу аилиниң балисини чәтәлдә оқутуватқанлиқ хушаллиқи қабаһәтлик бир чүшкә айланған. 3 Йилғичә ата‏-аниси һәққидә һечқандақ учурға еришәлмигән абдухалиқ икки айниң алдида мәлум юртдашлири арқилиқ аписиниң 6 йил кесилгәнлик учурини алған. Әмма у юртдиши униң дадисиниң техичә ғайиб икәнликини ейтқан, қануний әһвали (салаһийити) һәққидә мәлумат берәлмигән.

Телефонимизни қобул қилған қәшқәр вилайәтлик партком тәшкилат бөлүминиң бир хадими хәлқ бағчисиниң шопури әзиз насирниң әһвалидин хәвирини йоқлуқини ейтти. Биз әзиз насирниң дөләтбағ йеза 10 ‏-кәнттә олтурушлуқ икәнликини билдүргинимиздин кейин, у шу йезидики қануний ишларға алақидар хадимниң телефон номурини тәминлиди.

Телефонимизни қобул қилған дөләтбағ йезисиниң қануний ишларға мәсул хадими нөвәттә әзиз насирниң маралбеши түрмисидә җаза муддитини өтәватқанлиқини ашкарилиди. Униң дейишичә, әзиз насир 3 йил бурун тутқун қилинған вә 3 ай қамақта тутуп турулғандин кейин 8 йиллиқ кесиветилгән. Бу хадимниң йәнә дәлиллишичә, әзиз насирниң аяли аминә абдулбақи 5 йиллиқ кесилгән. Нөвәттә у атуштики бир түрмидә җаза муддитини өтимәктикән.

Вәзийәттин хәвәрдар кишиләрдин бири әзиз насир билән аминә абдулбақиниң оғлини мисирға оқушқа әвәткәнлики үчүн җазаланғанлиқини тилға алди. Абдухалиқ әзизму ата-анисиниң өзини мисирға оқушқа әвәткән вә пул салғанлиқидин башқа «гунаһи» ниң йоқлуқини илгири сүрди.

Илгирики ениқлашлиримиз давамида ғулҗада таксим сода сарийиниң хоҗайини әнвәр турсунниң оғлини түркийәдә оқутқанлиқи үчүн «дөләт маарипини кәмситиш» билән әйиблинип, сотланғанлиқи вә сот һөкүминиң 3 ай кейингә қалдурулғанлиқи ашкариланған иди.

Пикирләр (0)
Share
Толуқ бәт