«4-Нөвәтлик истратегийә муһакимә йиғини» голландийәдә ечилди

Ихтиярий мухбиримиз әркин тарим
2019-11-18
Елхәт
Пикир
Share
Принт
Мәркизи әнқәрәдики уйғур тәтқиқат институтиниң уюштурушида, голландийәниң амстердам шәһиридә ечилған «4-нөвәтлик истратегийә муһакимә йиғини» корунуш. 2019-Йили ноябир.
Мәркизи әнқәрәдики уйғур тәтқиқат институтиниң уюштурушида, голландийәниң амстердам шәһиридә ечилған «4-нөвәтлик истратегийә муһакимә йиғини» корунуш. 2019-Йили ноябир.
RFA/Erkin Tarim

Хәлқарада уйғур мәсилисиниң йүксилишигә әгишип дуняниң һәр қайси җайлиридики уйғурлар бундин кейин дуня вәзийитидә қандақ өзгириш болидиғанлиқи, бундақ бир вәзийәт өзгиришиниң дуня вәзийитигә көрситидиған тәсири, бундақ бир вәзийәттә уйғурларниң немиләрни қилиши керәклики тоғрисида баш қатурмақта.

Бу һәқтә музакирә елип бериш үчүн голландийәниң амстердам шәһиридә «4-нөвәтлик истратегийә муһакимә йиғини» өткүзүлди. Йиғинни мәркизи әнқәрәдики уйғур тәтқиқат институти уюштурған болуп, голландийәдики явропа шәрқий түркистан маарип җәмийити саһибханилиқ қилған. Йиғинға канада, австралийә, германийә, голландийә, шиветсийә вә түркийәдин болуп 17 мутәхәссис вә бәзи чоң аммиви тәшкилатларниң мәсуллириму иштирак қилди.

Йиғинни уюштурған мәркизи әнқәрәдики уйғур тәтқиқат институти мудири, тарихчи доктор әркин әкрәм әпәнди йиғинда хәлқара вәзийәт тоғрисида музакирә елип берип, уйғур дәвасида немиләрни қилиш керәклики тоғрисида пикир бирлики һасил қилинғанлиқини баян қилди.

15-Ноябирдин 18-ноябир күнигичә давамлашқан йиғинда мәвҗут хәлқара система вә дуня түзүмидики өзгиришләр, иқтисад вә сода, мудапиә вә қораллиниш, хәвпсизлик мәсилилири, йүксиливатқан хитай вә хәлқара система, йеңи дуня түзүми, йүксиливатқан хитайниң хәлқара система вә дуня түзүмигә көрситиватқан тәсирлири, хитайниң район характерлик вә дуня характерлик тәсирлири, хәлқара вәзийәттики өзгиришләр вә чәтәлләрдики уйғур тәшкилатлири, нөвәттики вәзийәттә уйғурлар қандақ ишларни қилишқа болиду? дегәнгә охшаш темиларда пикир баян қилинип, музакирә елип берилди.

Голландийәниң амстердам шәһиридә чақирилған «4-нөвәтлик истратегийә муһакимә йиғини» ға дуня уйғур қурултийи рәиси долқун әйса әпәндиму алаһидә тәклип бойичә қатнашти. Долқун әйса әпәнди зияритимизни қобул қилип, мәзкур йиғинда д у қ паалийәтлиридә пайдилинишқа тегишлик пикирләрниң оттуриға қоюлғанлиқини, гәрчә қарар мақулланмиған болсиму уйғур дәвасиға йол көрситидиған қиммәтлик ой-пикирләрниң пәйда болғанлиқини баян қилди.

Истанбулда паалийәт елип бериватқан шәрқий түркистан маарип вә һәмкарлиқ җәмийити рәиси һидайәтулла оғузхан әпәнди 4 қетимлиқ истратегийә йиғининиң һәммисигә иштирак қилғанлиқини, бу қетимқи йиғинниң бурунқи йиғинға охшимайдиған йиғин болғанлиқини баян қилди.

«4-Нөвәтлик истратегийә муһакимә йиғини» ға саһибханилиқ қилған мәркизи голландийәниң амстердам шәһиридә турушлуқ явропа шәрқий түркистан җәмийити рәиси абдурахман абдуллаһ әпәнди йиғинниң мувәппәқийәтлик өткәнликини ейтти.

Истратегийә муһакимә йиғининиң биринчи нөвәтлики шималий сипруш түрк җумһурийитиниң гирнә шәһиридә, иккинчи қетимлиқи болса германийәниң берлин шәһиридә, үчинчи нөвәтлики белгийәниң пайтәхти бирюсселда чақирилғаниди.

Пикирләр (0)
Share
Толуқ бәт