Хитайда "йемәклик бихәтәрлики" сәпсәтә болуп қалди

Мухбиримиз гүлчеһрә
2013-05-08
Share
yunda-turubisi-zeherlik-may-305.jpg Бир қанунсиз завутниң көлчикигә йиғивелинған мәйнәт май. 2011-Йили 10-май чуңчиң.
Imaginechina

"йемәклик бихәтәрлики" хитайниң 2013 - йили икки йиғин мәзгилидики әң қизиқ нуқтиниң бири болуп қалған иди шундақла йемәклик бихәтәрлик қануниғиму түзитиш киргүзүлди, әмәлийәттә бу мәсилә хитайда һәр йили хәлқ әң көңүл бөлидиған, җәмийәттә кәң зор ғулғула қозғиған мәсилә болуп кәлмәктә.

Әмма йеқинқи күнләр ичидила, "қуш зукими билән өлгән өй қушлири", "кесәл билән өлгән кала вә башқилар", "чашқандин ясалған қой гөши" қатарлиқларниң истимал базирида кәң көләмдә паш болуши, хитайниң сахта малларға қарши қайта - қайта елип бириватқан зәрбә бериш һәрикәтлириниң карға кәлмәй, йемәклик бихәтәрлики пәқәт бир сәпсәтә болуп қалғанлиқини ашкарилиди. Хитайдики йемәклик бихәтәрликигә аит мәвҗут мәсилиләр һәққидә мухбиримиз гүлчеһрә тәйярлиған мәлумат диққитиңларда болсун.

Хитайда ишләпчиқирилип инсанлар һаятиға тәһдит елип келиватқан сахта хәтәрлик маллар ичидә,сахта йемәкликләрниң даңқи бар. Гәрчә хитай һөкүмәт даирилири түрлүк васитиләрни қоллинип сахта вә зәһәрлик йемәкликләргә зәрбә берип келиватқанлиқини тәшвиқ қиливатқан болсиму әпсуски, хитайда сахта йемәкликләрниң түрлири көпийип, ишләпчиқириш усуллири барғанчә қәбиһлишип, ораш һәмдә тарқитиш техникилири барғанчә йеңилинип кеңийип бармақта. Даириләрниң зәрбә бериш һәрикитигә зор риқабәт яратмақта.

Хитай йемәклик бихәтәрлики ториниң - 3май хәвиридә көрситишичә,хитай җамаәт хәвпсизлик министирлиқиниң бу йил - 1 айдин башлап үч ай елип барған сахта вә хәтәрлик йемәкликләрни ишләпчиқириш вә сетишқа қаратқан мәхсус түр бойичә зәрбә бериш һәрикитидә еғир дәриҗидики делодин 2010 и паш болған, зәһәрлик вә хәтәрлик йемәкликләрни ишләпчиқирип сатқан йәр асти завуттин 1721 ни тапқан, сахта йһемәкликләрни ишләпчиқириш, сетиш ториға илинған қара завут, қара ширкәт вә җинайәтчиләрниң саниму интайин көп икән. Хитайда йеқиндин буян инсанларниң күндилик йемәк - ичмикигә зәһәр салған бу хил сахта йемәкликләрниң ичидә болупму өй һайванлири вә өй қушлири түридики йемәкликләрниң бихәтәрликидә еғир мәсилиләр көрүлмәктә. Һәтта бу хил сахта йимәкләрдин зәһәрлинип адәм өлүш вәқәлири көрүлди.

Һазирғичә хитайниң барлиқ өлкә, аптоном район, шәһәрлиридин йиғивелинған сахта қой, кала гөшлири, су уруп сәмиритилгән гөш, кесәлдин өлгән өй һайванлири, химийилик оғутта беқилған белиқ вә қушлар, қуш зукимида өлгән өй қушлири қатарлиқ хәтәрлик истимал гөшләр 20 тонна әтрапида болуп, базарға тарқалған йәнә 40 тонна сахта гөшниң из - дерики тепилмиған.

Нөвәттә җай - җайларда һәр дәриҗилик йемәклик бихәтәрлики, сүпәт өлчимигә мәсул орунлар базардики сахта вә зәһәрлик йемәк - ичмәк буюмлириға зәрбә бериш һәрикити елип бериватқан икән. Җүмлидин уйғур аптоном райони даирилириму мәхсус бақмичилиқ саһәсиниң бихәтәрликини нишан қилип, өлүш сәвәби ениқ болмиған өй һайванлири содиси, уни йөткәш вә пишшиқлап ишләш вә кесәлдин өлгән өй һайванлири вә қушлирини халиғанчә бир тәрәп қилишқа болған контроллуқни күчәйткән. Һазирғичә уйғур ели базарлирида сүпәт тәкшүрүштин лаяқәтлик өткән маллар 89% тин ашқан болсиму, хитай өлкиләрдин кириватқан вә йәр асти завутларда пишшиқлап ишлинип базарға селиниватқан йемәкликләр бу хил сүпәт тәкшүрүш даирисигә киргүзүлмигән.

Уйғур елида аччиқсу, пурчақ ечитқуси вә қачиланған суларда сүпәт мәсилиси бир қәдәр еғир икәнлики мәлум болған.

Уйғур елидики амминиң инкасиға қариғанда, уйғурлар асасән йемәклик сүпити вә пакизлиқиға алаһидә әһмийәт беридиған болғачқа, хитайда ғулғула вә әндишә қозғиған йемәклик бихәтәрлик мәсилиси уйғурларниң һаятиға истимал адитигә чоң тәсир көрситәлмигән. Лекин, хитайниң көп җайлирида гөш түридики йемәкликләрдин еғир мәсилиләрниң байқилиши, гөш баһасиниң өрлишигә сәвәб болуп кәлмәктә:

Уйғурларниң инкаслиридин, шундақла аммиви таратқуларда елан қилинған учурлардин уйғур елидә мусулманчә йемәкликләр бихәтәрлик мәсилисиниң еғирлиқи мәлум, базардики тәйяр мусулманчә йемәкликләргә һалал яки мусулманчә дегән хәт йезип қоюлған болсиму, болупму хитайдин киргән мусулманчә йемәкликләрниң сүпәт өлчимидә зор мәсилиләр көрүлмәктә,йеқинқи йиллардин буян, уйғур елидики мусулман амма даириләрниң мәхсус мусулманчә йемәкликләрниң сүпәт өлчимигә әһмийәт беришини, базардики гуманлиқ болған һалал йемәкликләрни тәкшүрүшини күчлүк тәләп қилип кәлмәктә. Әмма даириләр һазирға қәдәр мәхсус мусулманчә йимәкликләргә қаратмилиқ тәкшүрүш елип бармиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт