Уйғур районидики йәрлик аһалиләр: намәлум дориларни йәватимиз, немиликини билмәймиз һәм сориялмаймиз

Мухбиримиз шөһрәт һошур
2020-08-28
Елхәт
Пикир
Share
Принт
Вирус сәвәбидин қамал қилинған мәлум мәһәллиниң дәрвазисида кириш вә чиқиш үчүн тәкшүрүлүватқан кишиләр. 2020-Йили 1-апрел, бейҗиң.
Вирус сәвәбидин қамал қилинған мәлум мәһәллиниң дәрвазисида кириш вә чиқиш үчүн тәкшүрүлүватқан кишиләр. 2020-Йили 1-апрел, бейҗиң.
REUTERS

Аңлиғучилиримиздин бири радийомизға учур йоллап уйғур райондики йәрлик аһалиләргә таҗсиман вирусқа қарши дегән нам билән намәлум дориларниң бериливатқанлиқи, бәзи җайларда ваксиниму урулуватқанлиқини мәлум қилған иди. Мухбиримизниң йәрлик аһалиләргә қарита елип барған телефон зиярәтлири давамида, аһалиләр өзлириниң намәлум дориларни йәватқанлиқи, бу дориларниң нами, роли вә нимидин ясалғанлиқиниму билмәйдиғанлиқини баян қилди. Йәнә бәзиләр, хадимлардин бу дориларниң немә дора икәнлики һәққидә соал сорашқа петиналмайватқанлиқини ашкарилиди.

Радийомизға кәлгән бир инкаста уйғур райониниң һәрқайси җайлиридики йәрлик аһалиләргә һәр хил дориларниң бериливатқанлиқи, бу дориларниң дохтур-сестиралар тәрипидин әмәс, аһалиләр комитетида ишләватқан мәмурий хадимлар тәрипидин тарқитиливатқанлиқи йезилған. Инкаста йәнә хадимларниң бу дориларни күнигә қанчилик йейиштин башқа чүшәндүрүш бәрмәйватқанлиқи, йәнә бәзи җайларда хадимларниң аһалиләрни дориларни өзлириниң көз алдида ичишкә зорлаватқанлиқи әскәртилгән. Ғулҗа наһийәсиниң оняр йезисидики бир аһалә, өзлириниң бирқанчә күн аввал суюқ бир дорини ичкәнлики, әмдиликтә болса ақ бир таблит дорини йәватқанлиқини, әмма дориниң намини билмәйдиғанлиқини ейтти.

Пәйзиваттики аһалиләрдин бири бағчида оқуватқан балиларғиму вә өзлиригиму намәлум дориларниң бериливатқанлиқини тилға алди. У өзи йәватқан дориниң дүгиләк вә топарәң бир дора икәнлики, әмма униң немигә пайда қилидиғанлиқидин хәвәрсиз икәнликини ейтти.

Радийомизға кәлгән инкаста бәзи аһалиләргә ваксина урулуватқанлиқи вә урулуштин бурун мәлум бир қәғәзгә имза қойғизиливатқанлиқи йезилған. Телефонимизни қобул қилған мәлум хусусий дохтурхана хадими, өзи туруватқан даиридә ваксина урулғинидин хәвәрсиз икәнликини ейтти. Әмма у аһалиләр комитети тарқатқан бир җуңйи дорисини бир айдин бери ичип келиватқанлиқини баян қилди.

Ғулҗа наһийәсиниң җелилйүзи базиридики аһалиләрдин бири, вирус мәзгилидә өзи йәватқан дориниң давалаш роли вә ян тәсирлирини сориғинимизда, буниңдин хәвәрсизликини баян қилиш билән бирликтә, бүгүнкидәк вәзийәттә бу һәқтә соал сорашқа болмайдиғанлиқини баян қилди.

Хәлқара уйғур кишилик һоқуқ вә демократийини илгири сүрүш фондиниңмтор бетидә алдинқи күни хитайниң уйғур районида йүргүзүватқан вирусқа қарши тәдбирлири һәққидә бир баянат елан қилинған. Рабийә қадир ханим намидики бу инглизчә баянатта, хитайниң уйғурларға тарқитиватқан дорилири вә карантин қурулушлириға қарита гуман вә әндишиләр оттуриға қоюлған. Рабийә ханим баянатида,» 3 милйондин артуқ уйғурни лагерларға соливалған вә миллий қирғинчилиқ елип бериватқан «хитай һөкүмитидин, йәрлик аһалиләргә қарита тоғра нийәтлик бир иҗраатни күтүшкә болмайдиғанлиқини әскәртип; хәлқара җамаәтни уйғурларға бериливатқан дора вә районда қурулған карантин қурулушлири үстидә мустәқил тәкшүрүш елип беришқа дәвәт қилған.

Пикирләр (0)
Share
Толуқ бәт