Photo: RFA
Илгири үрүмчи, йиву, шенҗин, хоңкоң вә истанбулларда ширкәт қурған вә ташқи сода билән шуғуллинип бәлгилик игилик тиклигән, әмма хитай даирилириниң из қоғлап путликашаң қилиши билән бүгүн бир сиясий панаһланғучиға айланған сабиқ карханичи нурмәмәт абдулла мухбиримиз билән өткүзгән сөһбитиниң бүгүнки қисмида тутқундики қериндашлири һәққидә гуваһлиқ бәрди. У бир қериндишиниң лагердин чиқип җан үзгәнликини ашкарилаш билән бирликтә хитай тәрәптин қериндашлири һәққидә һесаб сорашни тохтатмайдиғанлиқини баян қилди.
Һөрмәтлик радио аңлиғучилар, нурмәмәт абдулла уйғур җәмийитидики көп сандики кәсип әһлилиригә охшашла өзи оқуған вә өзи мутәхәссиси болған кәспи биләнла шуғуллинишни арзу қилған болсиму, әмма реаллиқ буниңға йол қоймиған. Болупму у 4 қериндиши вә икки җийәниниң йиғивелиш лагериға әкетилгәнлики, булардин бириниң лагердин чиқип 3 күндин кейин җан үзгәнлик учурини аңлиғандин кейин, һаят йолини қайтидин тәңшәшкә мәҗбур болған.
Нурмәмәт абдулла бүгүнгә қәдәр җәмийәт вә милләт үчүн хизмәт қилишта пәрдә арқисида туруп қилишни тоғра тапқан болса, әмдиликтә зөрүр тепилса сәпниң алдиға өтүшкә қарар бәргән.
Хитайдики мәзгилидә һечқандақ бир дөләт ярдимигә таянмай туруп бәш шәһәрдә ширкәт қурған вә 7 дөләт билән сода қилған нурмәмәт абдулла сиясий саһәдиму уйғурларниң чәклик имканлиридин пайдилинип туруп хитайға чоң тәсир көрсәткүдәк ишларни қилалайдиғанлиқини оттуриға қойди.
Чәтәл тиллиридин инглизчә, хитайчә вә әрәбчидин ибарәт үч тилни яхши билгән нурмәмәт абдулла явропаға йәрлишип болғандин кейин әслидики ташқи сода ишиға қайтидин киришидиғанлиқини, әмма хитай тәрәптин лагердики қериндашлириниң әһвали вә ақивити тоғрилиқ һесаб елишни болса һечқачан тохтатмайдиғанлиқини тәкитлиди.
