Бейҗиң олимпик мусабиқисиға қарши узунға созулған намайиш башланди

Ихтиярий мухбиримиз әкрәм
2021.05.24
Бейҗиң олимпик мусабиқисиға қарши узунға созулған намайиш башланди Германийәдә башланған 2022-йиллиқ бейҗиң қишлиқ олимпик мусабиқисигә қарши узунға созулған намайиштин көрүнүш. 2021-Йили 22-май, мюнхен.
RFA/Ekrem

Германийәдә 2022-йиллиқ бейҗиң қишлиқ олимпик мусабиқисиға қарши узунға созулған намайиш башланди.

22-Май германийәниң мюнхен шәһридики ават саяһат мәркизи болған одионс мәйданида явропа шәрқий түркистан бирлики тәшкилатиниң уюштуриши билән 2022-йиллиқ бейҗиң қишлиқ олимпик мусабиқисиға қарши туруш намайиши елип берилди.

Явропа шәрқий түркистан бирлики тәшкилатиниң рәиси әсқәрҗан әпәндиниң бәргән мәлуматлириға асасланғанда, бу намайиш мюнхен шәһриниң охшимиған җайлирида һәмдә германийәниң башқа чоң шәһәрлиридә һәр шәнбә күни елип берилидиған болуп, 2022-йили феврал айлириғичә 10 ай давамлишидикән. Тунҗи қетимлиқ намайиш 5-айниң 15-күни мюнхен шәһриниң саяһәт һәм сода мәркизи болған мәрйәм мәйданида өткүзүлгән. Әсқәрҗан әпәнди бу һәқтә тохталғанда, бу намайишларға германийә вә баварийәниң парламент әзалирини шундақла кишилик һоқуқ тәшкилатлириниму қатнишишқа дәвәт қилип, мәктуплар әвәткәнликини билдүрди.

Германийәдә башланған 2022-йиллиқ бейҗиң қишлиқ олимпик мусабиқисигә қарши узунға созулған намайиштин көрүнүш. 2021-Йили 22-май, мюнхен.

22-Май өткүзүлгән намайишқа д у қ рәиси долқун әйса, муавин рәиси пәрһат муһәммиди қатарлиқларму қатнашқан. Пәрһат муһәммиди әпәнди нәқ мәйданда зияритимизни қобул қилғанда, бу намайишниң йәрлик хәлқләргә көрситиватқан тәсириниң наһайити зор болуватқанлиқини тилға алди. У сөзидә бүгүнки намайиш өткүзүлгән одионс мәйданиниң тарихи һәққидиму қисқичә изаһат берип өтти.

Намайиш җәрянида явропа шәрқий түркистан бирлики тәшкилатиниң рәиси әсқәрҗан әпәнди нутуқлар сөзләп, хитайниң 2017-йилидин буян шәрқий түркистанда елип бериватқан ирқий қирғинчилиқ җинайәтлирини тәпсилий тонуштуруп өтти. У сөзидә дуняниң һәрқайси әллиридики 20 дин артуқ дөләттә яшаватқан 10 миңлиған уйғурларниң 4 йилдин буян шәрқий түркистандики ата-ана, қәвми-қериндашлири билән алақә қилалмайватқанлиқини тәкитләп, дуня җамаитиниң залим хитай һакимийити 2022-йили өткүзмәкчи болған бейҗиң қишлиқ олимпик мусабиқисиға ортақ қарши туруш арқилиқ өзлириниң инсаний мәҗбурийәтлирини ада қилиши лазимлиқини әскәртти.

Германийәдә башланған 2022-йиллиқ бейҗиң қишлиқ олимпик мусабиқисигә қарши узунға созулған намайиштин көрүнүш. 2021-Йили 22-май, мюнхен.

Нөвәттә 2022-йиллиқ бейҗиң қишлиқ олимпик мусабиқисини байқут қилиш садалири америкаға охшаш бәзи ғәрб дөләтлири вә хәлқаралиқ кишилик һоқуқ органлирида барғансери күчәймәктә. Нурғунлиған тәшкилатлар хәлқара олимпик комитетиға хәтләр йезип, уйғурлар үстидин “ирқий қирғинчилиқ” вә “инсанийәткә қарши җинайәт” садир қиливатқан хитайниң олимпик мусабиқиси өткүзүш салаһийитини йоқлиқини, келәр йили хитайда өткүзүлидиған бу мусабиқини әмәлдин қалдурушни тәләп қилишмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.