Өмәр уйғур вәхпи: "канададин кәлгән ярдәмни пакистандики уйғурларға тарқаттуқ"

Мухбиримиз меһрибан
2020-04-01
Share
pakistan-omer-uyghur-wexpi.jpg Өмәр уйғур вәхпиниң "шәрқи түркистан җумһурийәтлирини хатириләш" паалийити
Photo: RFA

Пакистандики уйғур паалийәтчилиридин өмәр уйғур әпәнди 1-апрел күни радийомиз уйғур бөлүминиң зияритини қобул қилип, пакистандики "өмәр уйғур вәхпи" ниң йеқинда канаданиң ванковер шәһиридики өмәр давутниң намида әвәтилгән ярдәм пулини тапшурувалғанлиқини билдүрди.

Өмәр әпәндиниң билдүрүшичә, "өмәр уйғур вәхпи" 31-март күни бу ярдәм пулиға ун, яғ, гүрүч қатарлиқ асасий йемәкликләрни елип, корона вируси юқуми мәзгилидә иқтисадий қийинчилиқта қалған равилпиндидики еһтияҗлиқ уйғур аилилиригә тарқитип бәргән.

Өмәр уйғур әпәндиниң билдүрүшичә, корона вируси юқуми мәзгилидә пакистан һөкүмити юқумдин сақлиниш үчүн карантин тәдбирлирини йолға қойған болсиму, әмма һөкүмәт тәрәптин пуқраларға иқтисадий җәһәттин ярдәм берилидиған әмәлий тәдбирләр техи рәсмий йолға қоюлмиған. Бу сәвәбтин пакистанда қийинчилиққа учриған аһалиләргә аммиви җәмийәтләр ярдәм қилидиған вәзийәт шәкилләнгән. Шуңа өмәр уйғур вәхпи дуня уйғур қурултийи қатарлиқ тәшкилатлар вә дуняниң һәрқайси җайлиридики уйғурларға иқтисадий җәһәттин ярдәм мураҗиити йоллиған икән.

Биз өмәр уйғур әпәнди тәминлигән телефон учури бойичә канаданиң ванковер шәһиридики өмәр давут әпәнди билән алақиләштуқ.

Зияритимизни қобул қилған өмәр давут әпәнди пакистандики "өмәр уйғур вәхпи" елан қилған иқтисадий җәһәттин ярдәм мураҗиитини тапшурувалғандин кейин ванковердики канада шәрқий түркистан җәмийитигә әза уйғурлар тәрипидин йиғилған 1300 канада доллири ярдәм пулини өз намида әвәтип бәргәнликини билдүрди.

Өмәр давут әпәндиниң билдүрүшичә, у вә канаданиң ванковер шәһиридики уйғурлар бир йерим йилдин буян пакистандики уйғурларға иқтисадий җәһәттин бирқанчә қетим ярдәмдә болған икән. У йәнә бу қетимқи корона вируси юқуми мәзгилидә немә үчүн пакистандики уйғурларға ианә топлишиниң сәвәби һәққидиму тохталди.

Униң билдүрүшичә, гәрчә түркийә вә оттура асиядики уйғурлар олтурақлашқан дөләтләрдиму иқтисадий җәһәттин еһтияҗлиқ аилиләр бар болсиму, әмма уларниң алақә даириси пакистандики уйғурларға қариғанда кәңри болғини үчүн бу дөләтләрдики уйғурларниң ярдәмгә еришиш имканийити пакистандики уйғур җамаитигә қариғанда кәңри икән. Әмма пакистан һөкүмитиниң хитай билән болған алақиси вә пакистандики уйғурларниң тил җәһәттики қийинчилиқи қатарлиқ сәвәбләр түпәйлидин уйғур тәшкилатлири вә уйғур җамаити билән алақилишип ярдәмгә еришиш пурсити бәкла аз икән.

Мәлум болушичә, пакистанниң равилпинди, гилгит қатарлиқ җайлирида яшаватқан уйғурларниң зор көп қисми йәккә тиҗарәт вә ресторан мулазимәт кәспи қатарлиқлар билән шуғуллинип күндилик турмушини қамдайдикән. "өмәр уйғур вәхпи" қурулған йеқинқи бирқанчә йилдин буян, "өмәр уйғур вәхпи" вә "дуня уйғур қурултийи" қатарлиқ уйғур тәшкилатлириниң тәшәббуси билән дуняниң һәрқайси җайлиридики уйғурлар пакистандики иқтисадий қийинчилиқи бар уйғурларға ярдәмдә болуп кәлгән. Болупму 2020-йилниң бешида хитайдин тарқилип пүткүл йәр шари характерлик юқум апитигә айланған корона вируси юқуми мәзгилидә пакистандики уйғурлар корона вируси юқумидин башқа иқтисадий җәһәттинму еғир қийинчилиқта қалған икән.

Хәлқара таратқулар хәвиридин мәлум болушичә, 2020-йилниң бешида хитайдин тарқалған крона вируси пүткүл йәр шари бойичә еғир юқумға айланған мәзгилдә, иқтисадий җәһәттә хитайға тайинип қалған һәтта сиясий җәһәттиму хитай һөкүмити билән йеқиндин һәмкарлишип келиватқан пакистан һөкүмити крона вируси юқуми вә иқтисадий җәһәттин кәлгән еғир талапәткә учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт