Ғулҗа шәһәрлик маарип идариси хадими шаир вә физик қасим сидиқниң тутқунда икәнликини дәлиллиди

Мухбиримиз шөһрәт һошур
2021-01-04
Share
Ғулҗа шәһәрлик маарип идариси хадими шаир вә физик қасим сидиқниң тутқунда икәнликини дәлиллиди Җәмийәтниң һәр саһә кишилири арисида көп қизиқиш вә ғулғула пәйда қилған шаир вә физик қасим сидиқ әпәнди. (Вақти вә орни ениқ әмәс)
Rahile Kamal teminligen

"мән шундақ қатилға амрақ" қатарлиқ лирик шеирлири, "зоқланғучилар писихологийәси" қатарлиқ илмий мақалилири вә "бошлуқ нәзәрийиси" темисидики физика тәтқиқати билән җәмийәтниң һәр саһә кишилири арисида көп қизиқиш вә ғулғула пәйда қилған шаир вә физик қасим сидиқ 4 йилдин буян тутқунда икәнлики, ғулҗа шәһәрлик маарип идарисиниң хадими тәрипидин дәлилләнди

Көзитишлиримиздин мәлум болушичә, 2017 ‏-йилдин етибарән, уйғур җәмийитидики көплигән сәркиләр қатарида шаир вә тәтқиқатчи қасим сидиқниңму илмий муназирә сорунлиридин сеймаси, тор бәт вә гезит-журналлардин исми ғайиб болған иди. Ғулҗа вәзийитидин хәвәрдар кишиләрдин бири өткән йилниң оттурилири радийомизға учур йоллап, шаир қасим сидиқниң2017 ‏-йили3-айда тутуп кетилгәнлики вә та һазирғичә из-дерики йоқлуқини мәлум қилди. Инкаста әскәртилишичә, қасим сидиқ илгирики йилларда көп қетим сорақ қилинған вә тутуп қоюп берилгән болғачқа, 2017 ‏-йил 4‏-айда сабиқ гумандар вә сабиқ тутқунлар қатарида тутуп кетилгән. Ғулҗа шәһәрлик һөкүмәттики алақидар хадимлар қасим сидиқ һәққидә мәлумат беришни рәт қилди.

Нөвәттә шиветсийәдә яшаватқан "или кәчлик гезити" ниң сабиқ тәһрири, шаирә раһилә камалниң тонуштурушичә, қасим сидиқ ғулҗа шәһәр дадамту оттура мәктипидә узун мәзгил әдәбият оқутқучиси болған. Кейинки йилларда әдәбият-сәнәт саһәсидә мустәқил тәшкилатчилиқ ишлири биләнму шуғулланған. Шу йилларда "бу кечә" қатарлиқ нахша текистлири сәвәблик көп аваричиликкә учриған.

Тор архиплиридин мәлум болушичә, йеқинқи йилларда қасим сидиқ физика саһәсидә оттуриға қойған йеңи пикир, йеңи нәзәрийәлири билән уйғур җәмийитидә һәр саһә кишилирини таң қалдурған. Әмма тәбиий пән саһәсигә баш чөкүрүп киришкән болсиму, уни сиясий боран-чапқунлардин қоғдап қалалмиған. Радийомизға кәлгән инкаста дейилишичә, қасим сидиқниң буниңдин 10-15 йиллар илигири язған шеир вә нахша текитслири сәвәблик "миллий қутратқулуқ" билән әйибләнгән.

Биз қасим сидиқниң нөвәттики әһвали һәққидә мәлумат елиш үчүн ғулҗа шәһәрлик маарип идарисигә телефон қилдуқ. Уларму қасим сидиқ һәққидә мәлумат беришни рәт қилди.

Биз қасим сидиқниң сабиқ иш орни дадамту оттура мәктипигә телефон қилдуқ. Мәктәпниң хитай мудири мәктәптә нөвәттә қасим сидиқ исимлик бир хизмәтчиси йоқлуқини баян қилди, әмма у бизниң пенсийәгә чиққанлар арисида қасим сидиқ дәп бириниң бар-йоқлуқи һәққидики соалимизни җавабсиз қалдурди.

Раһилә камал қасим сидиқниң кейинки йилларда елан қилған бир түркүм тәбиий пәнгә аит илмий мақалилири һәққидә қисқичә мәлумат бәрди.

Ахирида телефонимизни қобул қилған ғулҗадики маарип идарисиниң бир хадими шаир қасим сидиқ һәққидики соалимизға җавабән "тутқундики оқутқучилар һәққидә мәлумат берәлмәймиз" дейиш арқилиқ шаир қасим сидиқниң тутқунда икәнликини васитилик дәлиллиди. Әмма у қасим сидиқниң қанчә йиллиқ кесилгәнлики һәққидә мәлумат бәрмиди.

Шаирә раһилә камал қасим сидиқниң өзидә унтулмас тәсир қалдурған шиирлиридин бири сүпитидә, униң "мүшкүл" намлиқ шиирини оқуп өтти.

Қилип, доқ әй зулум көпләп,

Йешимни түкмикиң мүшкүл.

Бесип йәлкәмни тағларчә,

Белимни пүкмикиң мүшкүл.

Өзүңгә бу аян һәқтур,

Рәқибиңниң һесаби йоқ.

Демәк тәхтиңдә тәшвишсиз,

Қақаһлап өтмикиң мүшкүл.

Җаһан окянлири чоңқур

Әмәстур шундиму тәгсиз,

Өзидин өзгигә рәббим,

Өмүрдин бәрмигән чәксиз,

Зулум қилмишлириң нурғун

Һесаби бар, буниң шәксиз.

Һесап дәптирини ачсам,

Өлүмсиз пүтмигиң мүшкүл!

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт