Қәлбинур: «видейодики полу етиватқан қоллар мениң җапакәш анамниң ишчан қоллири иди»

Мухбиримиз гүлчеһрә
2019-06-13
Елхәт
Пикир
Share
Принт
Америкиниң вискансен шитатида яшаватқан қәлбинурниң икки йерим йилдин буян алақиси пүтүнләй үзүлгән аниси һавахан.
Америкиниң вискансен шитатида яшаватқан қәлбинурниң икки йерим йилдин буян алақиси пүтүнләй үзүлгән аниси һавахан.
RFA/Gülchéhre

Вәтини билән болған алақиси пүтүнләй үзүветилгән чәтәлләрдики уйғурлар үчүн тор дунясида тарқалған яки иҗтимаий таратқуларда учрап қалидиған өз юрти вә мәһәллисигә аит учурлар интайин қиммәтликтур.

Радийомиз илгири уйғур дияридики дарилетамларда туруватқан уйғур балилириниң һаятидин елинған қисқа син көрүнүшлиридин өз пәрзәнтлирини тонуп қалған уйғурларниң азаблиқ һекайилирини аңлатқан иди.

Уйғур елигә барған хитай саяһәтчиләр вә яки башқилар тарқатқан син көрүнүшлири вә қисқа видейолардиму бир қисим уйғур балилириниң ечинишлиқ әһвали көрситилгән болуп, чәтәлләрдики бәзи уйғур аилилириниң бу филимлардин юртида қалған балилирини тонувелиштәк мисаллар көпәймәктә.

Гәрчә хитай даирилири уйғурларниң чәтәл билән болған алақисини қаттиқ контрол қиливатқан болсиму, әмма һазирқи таратқуларниң тәрәққиятидики тезлик түпәйли хитайниң юқири техникилиқ тәқиб системисида йәнила бәзи йочуқларниң барлиқи билинмәктә.

Бүгүнки һекайимизниң қәһримани американиң вискансен шитатида яшаватқан қәлбинур ханимдур.

У радийомиз зияритини қобул қилип, өзиниң икки йерим йилдин буян алақиси пүтүнләй үзүлгән аниси һаваханни йеқинда фейсбукқа чапланған, әсли мәнбәси хитайниң «дойин» торидин тарқалған бир син көрүнүшидин тонуп қалғанлиқини билдүрди. Қәлбинур бир тәрәптин бу син көрүнүшидин анисиниң саламәт турғанлиқини көрүп хош болған болса, йәнә бир тәрәптин анисиниң җапа чекиватқанлиқини көрүп азабланғанлиқини баян қилди.

Қәлбинур өзиниң фейсбук бетигә мундақ дәп язған: «апам! . . . Қайсиңлар фейсбук арилаветип, йиллап авазини аңлаш вә чирайини көрүшкә қадир болалмиған ата-анаңларни учритип қалдиңлар? маңа учриди, мана видейодики полу өрүватқан аял мениң апам, җапакәш апам, миһнәткәш апам, ялғуз апам! бу видейони тарқатқан қериндишимиз ‹әрләрниң һәммиси лагерда, тиҗарәт қилғанларниң һәммиси аяллар икән' дегән тема астида тарқитиптикән. Әмма мениң апам қандақтур бир содигәр әмәс, аилә аяли, йәни деһқан аял, һүнәрвән-машинчи аял. Үч пәрзәнтини вә кичик инилирини оқутқанлиқи, уларни чәтәлләрдә оқутқанлиқи вә уларниң келәчикини қурғини үчүн лагерға соланған, лагердин чиққандин кейин харабийлиққа айланған һойлисида полу етиватқан апам! . . .»

Қәлбинур аписи бар бу видейони 8-июн көрүп, өзиниң фейсбук бетидә һәмбәһирлигән. Бу видейониң дойин ториға йолланған вақти 2019-йили 4-айниң 15-күни икән.

Қени әмисә, қәлбинур ханимниң һекайисини юқириқи аваз улинишидин аңлиғайсиләр.

Пикирләр (0)
Share
Толуқ бәт